LEN - www.lankaenews.com | Mirusuvil mass murderer along with the mass murderer of the monks of Aranthalawa, and what beasts are the politicians and followers who worship together?

නැගෙනහිර නිරායුධ පොලිස් නිලධාරීන්ගේ, අරන්තලාවේ සාමනේර වහන්සේලාගේ සමූහ ඝාතකයා සමග මිරුසුවිල් සමූහ ඝාතකයා ද එකට තියා නමදින දේශපාලුවන් සහ අනුගාමිකයන් යනු කවරනම් මෘගයන්ද?

සුන්දරා අසයි

(ලංකා ඊ නිව්ස් -2020.මාර්තු.29, ප.ව.6.30) මායිම් ගම් වල සිංහල දරු දැරියන් සමග ගැමියන්ද, නැගෙනහිර නිරායුධ පොලිස් නිලධාරීන් 700 ක් ද සහ අරන්තලාවේදී කුඩා සාමනේරයන් ඇතුළු භික්ෂූන් වහන්සේලාද කපා කොටා කුරිරු ලෙස ඝාතනය කළ කරුණා අම්මාන් නැමති සමූහ ඝාතකයා 'දේශප්‍රේමී' පොහොට්ටු පක්ෂයේ දේශපාලන නායකයකු වන විට, කුරිරු ලෙස කුඩා දරුවන් ඇතුළු දෙමළ සරණාතයන් අට දෙනෙකුගේ බෙලිකැපූ මිරුසුවිල් සමූහ ඝාතකයා ලෙස අධිකරණයෙන් මරණ දඬුවම නියම කළ සුනිල් රත්නායක ද 'දේශප්‍රේමී' පොහොට්ටු දේශපාලුවන්ගේ සහ අනුගාමිකයන්ගේ වීරයකු බවට පත්ව සිටිති.

හමුදාපති ජෙනරාල් බලගල්ල සහ පොලිස්පති රාජගුරු..

එල්ටීටීඊ ත්‍රස්තවාදයට එරෙහිව ශ්‍රී ලංකා ආණ්ඩුව සමග සිටි ඩග්ලස් දේවානන්දා ඇතුළු ඊපීඩීපී දේශපාලන නායකයන් එවක රජයට සහය දක්වමින් කටයුතු කළ අතර ඩග්ලස්ගේ දැනුම්දීම සහ බලපෑම් මත චන්ද්‍රිකා ජනාධිපතිනියගේ මෙහෙයැවීමෙන් එවක හමුදාපති ජෙනරාල් බලගල්ලගේ නියෝග අනුව යුද හමුදා පොලිසියත්, එවක පොලිස්පති රාජගුරුගේ නියෝග මත අපරාධ පරීක්ෂණ දෙපාර්තමේන්තුවත් මෙම අපරාධයට එරෙහිව පරීක්ෂණ ආරම්භ කෙළේය. පසුව
2007 මහින්ද රාජපක්ෂ ජනාධිපති යුගයේ දී ඇරඹි දීර්ඝ නඩු විභාගයකින් පසුව 2015 දී අදාල හමුදා භට කණ්ඩායමේ සිටි සෙබලෙක් වූ සුනිල් රත්නායකට පමණක් මහාධිකරණය මගින් මරණ දඬුවම නියම කෙරිණ. එකී නඩු විභාගයේදී යුද හමුදා පොලිසිය පවා මොවුන්ට විරුද්ධව සාක්කි කී බව අමතක නොකළ යුතුය.

යුද්ධ මෙහෙයුමක් තුල සිදුකරන ඝාතන සම්භබන්ධ නීතිමය රැකවරණයක් හමුදා සාමාජිකයන්ට හිමි වුව ද මෙම ඝාතනය යුද්ධයක් නොවන ඉන් පරිබාහිරව කුඩා දරුවන් සහ සිවිල් වැසියන් 8 දෙනෙකුගේ බෙලිකපා ම්ලේච්ඡ ලෙස සිදුකළ සමූහ ඝාතනයක් වූ බැවින් සාමාන්‍ය නීතිය යටතේ මෙන්ම යුධ නීතිය යටතේ ද බරපතල වරදක් සිදුකර ඇති බව පැහැදිලිවම සනාථ විණ.

අපරාධ නඩුව යද්දී ප්‍රමෝෂන්...

එහෙත්, නඩුව අතර තුර දී සුනිල් රත්නායක සම්බන්ධයෙන් චෝදනා වලින් නිදහස් වන තුරු චුදිතයෙකුට එරෙහිව ක්‍රියා කළ යුතු ආකාරයට යුධ නීතිය ක්‍රියාත්මක නොවීමත් තවදුරටත් ඔහුව යුධ මෙහෙයුම් සඳහා යොදවා ගැනීමත් අතරවාරයේ සාජන් තනතුර දක්වා උසස් වීම් ලබා දීමත් සිදුවිය.

සාමාන්‍ය නීතිය සහ යුධ නීතිය ක්‍රියාත්මක වීමට අමතරව ඔහුගේ මානසිකත්වය පිලිබඳව විමර්ශනය නොකිරීම ද මීට අදාලව සලකා බැලිය යුතු වැදගත් කාරණයකි. එවැනි කුරිරු ඝාතනයක් ස්වතන්ත්‍රව සිදුකළ අයකු නිසා අනෙකුත් සිවිල් වැසියන්ට පමණක් නොව හමුදා සාමාජිකයන් හට ද ඔහුගෙන් බලපවත්නා අනතුරු දායක බව බලධාරීන් විසින් සම්පූර්ණයෙන් නොසලකා තිබූ බව පෙනේ.

යුධ හමුදා⁣ සාමාජිකයන් ගේ මානසික සෞඛ්‍ය වර්ධනය සඳහා වූ වැඩ සටහන් ක්‍රියාත්මක කිරීම අත්හිටුවීමට බලධාරීන් කටයුතු කිරීම තුල, යුධ ආතතිය ලත් සෙබළුන් ස්වකීය දේශපාලන ඝාතන හා උවමනාවන් වෙනුවෙන් අවභාවිතා කිරීම රටේ නායකයන්ගේ අපේක්ෂාව වන්නට ඇති බව තහවුරු වන්නේ මාධ්‍යවේදී ලසන්ත වික්‍රමතුංග, ප්‍රගීත් එක්නැලිගොඩ වැනි ඝාතන හා අතුරුදන් රාශියක් සඳහා යුද සෙබලුන් අවභාවිතා කර ඇති නිසාය.

ගෝටා සර් යටතේ රණමරුවන්ට නිදහස..

මිරුසුවිල් ඝාතක සුනිල් රත්නායක නිදහස් කිරීමෙන් පසු කප්පන් ගැනීම පිනිස පැහැරගෙන ගොස් කුරිරු වධ හිංසාවට ලක්කර තරුණ සිසුන් 11 මරාදැමූ නාවික හමුදා ඝාතකයන්ට ද සැනසුම් හෙළිය හැකිය. මන්ද යත් ගෝටා සර් යටතේ රණමරුවන්ට එරෙහිව නීතිය ක්‍රියාත්මක වුව ද ගෝටා සර් තමන්ව නිදහස් කර ගන්නා බව දන්නා නිසා ය.

ඇත්ත වශයෙන් ම සිදුවිය යුතුව තිබුනේ ජනපති සමාව දීම නොව මානසික පුනරුත්ථාපන වැඩ සටහනක් හරහා සුනිල් රත්නායක බිහිසුනු සමූහ ඝාතන මානසිකත්වයෙන් මුදවා ගැනීම ය.

ඔහු විසින් අදාල ඝාතනයන් ස්වකීය අභිමතයට යටත්ව සිදුකර ඇති නිසා, ඔහු තුල පවතින මානසික ස්වාභාව මත තවත් දරුවන් ඝාතනය කිරීමට ඔහු නැවත යොමු නොවේ යැයි කාට නම් කිව හැකි ද?

මුහුණු පොතේ සැරිසරන රාජපක්ෂවාදී ගොබ්බ වහලුන්...

රණමරු සුනිල් රත්නායක ගේ නිදහසට එරෙහිව අදහස් දක්වන සාමකාමී ජනතාව වෙත ඉතා නිර්දය ලෙස අවමන් කිරීමට තර්ජනය කිරීමට සාප කිරීමට රාජපක්ෂවාදී ගොබ්බ වහලුන් කටයුතු කරන බව මුහුණු පොතේ සැරිසරන විට දක්නට ලැබේ.

මෙහිදී දකින බරපතල ඛෙදවාචකය නම්, එල්ටීටීඊ සන්නද්ධ අංශයේ නායකයා ලෙස ම්ලේච්ඡ ඝාතන රැසක් මෙහෙයැවූ කරුණා අම්මාන් රාජපක්ෂවාදී වූ විට 'දේශප්‍රේමියෙක්' ලෙස හඳුන්වන රාජපක්ෂවාදී වහලුන්, එල්ටීටීඊ ත්‍රස්තවාදයට සදා එරෙහිව කටයුතු කිරීම නිසා මරාගෙන මැරෙන ප්‍රහාරයක් ද සහිතව දෙවරක්ම එල්ටීටීඊයේ බරපතල ප්‍රහාරයන්ට ගොදුරු වූ ඊපීඩීපී නායක ඩග්ලස් දේවානන්දාගේ හිතවත් පවුලක දරුවකු වූ ඝාතනයට ලක්වූ කුඩා දරුවා 'ළමා සොල්දාදුවකු' ලෙස හඳුන්වාදීම ය.

මෙය, බියෙන් ත්‍රස්තව මරහඬ දෙද්දි, මොට්ට පිහියකින් ගෙල කපා මරා දැමූ මෙම දරුවාට පමණක් සිදුවූ අසාධාරණයක් නොව රාජපක්ෂලා යටතේ ඝාතනය වූ මාධ්‍යවේදී ලසන්ත වික්‍රමතුංග, ප්‍රගීත් එක්නැලිගොඩ ලා මෙන්ම නාවික හමුදා නායකයන් විසින් කප්පන් ලබා ගැනීමට පැහැරගෙන කුරිරු වධහිංසාවට ලක්කර මරා දැමූ රණවිරු දරුවා ඇතුළු 11 දෙනා හටද සිදුවූ දෙවන අපරාධය ලෙස හැඳින්විය හැකිය.

අනෙක් අතට සුනිල් රත්නායක නීතියේ රැහැනට අල්ලා ගැනීමට නියෝග දුන් ජෙනරාල් බලගල්ලේ, හිටපු පොලිස්පති රාජගුරු, විරුද්ධව සාක්කි දුන් යුද හමුදා පොලිසිය ආදීන් අද දේශද්‍රෝහීන්ද කියා රාජපක්ෂලා සහ උන්ගේ වහලුන් කිව යුතුය.

කිසිදා රණවිරුවෙකුට මිනීමරුවෙකු විය නොහැකි බවත් මිනීමරුවෙකුට රණවිරුවෙකු විය නොහැකි බවත් හිටපු නාවික හමුදාපතිවරයෙකු වරෙක පැහැදිලිව ප්‍රකාශ කෙළේය. කුරිරු ඝාතක මිනීමරුවන් හෙවත් "රණමරුවන්" රණවිරුවන් වෙත්දී, රාජපක්ෂලාට එරෙහි නම් සැබෑ රණවිරුවන් ද ද්‍රෝහීන් බවට පත්කරන ශ්‍රී ලංකාවේ මුහුණු පොතේ සැරිසරන මජර රාජපක්ෂවාදී ගොබ්බ බයියන් විසින් අපරාධ වින්දිතයන් ත්‍රස්තවාදීන් බවට පත් කිරීම යනු අප රටේ බහුතර ජනතාවකගේ මානුෂීය ස්වාභාවය පිලිබඳව ද බරපතල ගැටලුවක්ද වන්නේ ය.

සියළු ඝාතකයන් රාජපක්ෂලාගේ මිනීමරු කඳවුරට එක්වූ කල...

පැවති රජයන්ට සම්බන්ධව කොටි ත්‍රස්තවාදයට එරෙහිව සිටි ද්‍රවිඩ ජන කණ්ඩායමකට අයත් කුඩා දරුවන් ඇතුළු පුද්ගලයන් අට දෙනෙකු බෙලිකපා මරා දැමූ සුනිල් රත්නායක, සිංහල ජාතියට හා රජයට එරෙහිව කොටි සංවිධානයේ ඝාතන මෙහෙයවූ කරුණා අම්මාන් (විනයාගමුර්ති මුරලිදරන්) මෙන්ම, වෛද්‍ය ශිෂ්‍යයකු ගේ ඔලුවට පරාල ඇණ ගසා මරාදැමූ එදා එජාප දේශපාලකයකු වූ සුසන්ත පුංචිනිලමේ ආදීන් ද අද රාජපක්ෂලාගේ එකම ඝාතක කඳවුරට එක්ව සිටින අතර, සුනිල් රත්නායක ගේ නිදහස පිළිබඳ ජනතා ප්‍රතිචාරය මත සිරගතව සිටින අනෙකුත් මිනීමරුවන් හට ද ජනාධිපති සමාව ලැබීමට නියමිතව ඇත.

ඒ අනුව සුනිල් රත්නායක නැමති කුරිරු සමූහ ඝාතකයා ට ජනපති සමාව හිමිවීම පිලිබඳව රටේ බහුතර බයි ජනතාව දක්වන ප්‍රතිචාර මත සියලු මිනීමරුවන්ගේ අනාගතය පමනක් නොව රටේ සාමකාමී ජනතාවගේ ඉරණම ද තීන්දු වනු නිසැක ය.