LEN - www.lankaenews.com |

රනිල්ලා ජයවික්‍රමලා ශිෂ්ඨත්වය රැක ගැනීමට පෙරට ආ ජනයාගේ මුහුණට මිරිස් කුඩු ගහති; එජාප නායකයන් ඥනසාරට නිදහස ඉල්ලූ ලිපිය මෙන්න..!!

විමල් ධීරසේකර ලියයි

(ලංකා ඊ නිව්ස් -2019.ජන.25, ප.ව.8.35) ඔක් 26 දා රාත්‍රී ඇඩ්‍රස් නැතිවී ගිය නමුත් පක්ෂ පාට නොබලා ශිෂ්ඨත්වය රැක ගැනීම සඳහා පෙළ ගැහුණු ජනතාව නිසා පුනරුත්පත්තිය ලද එක්සත් ජාතික පක්ෂ නායක රනිල් සහ එහි ජ්‍යෙෂ්ඨ නායකයෙකු වන ගාමිණී ජයවික්‍රම දෙදෙනා විසින් දැන් ශිෂ්ඨත්වය පැතූ ජනතාවගේ මුහුණට මිරිස් කුඩු ගසා තිබේ.

ඒ, “සුද්දාගේ නීතිය පිළිගන්නේ නෑ, ඔ්නෙ නම් මාව හිරේ දාපල්ලා” යැයි අධිකරණය ඇතුලේ ඩෙඟා නටමින් අධිකරණයට අපහාස කිරීම නිසා වසර 6 කදී වසර 18 ක සිර දඬුවමක් විඳින අශීලාචාර ඥානසාරට නිදහස දෙන ලෙස ඉල්ලා ජනාධිපතිට ලිපියක් යැවීමෙනි. මෙය ශිෂ්ඨත්වය ඉල්ලා පාරට බට ජනතාවගේ මුහුණට මිරිස් කුඩු ගැසීමකටත් එහා ගොස් ඔවුන්ගේ හිස මත පැහැරීමක් ලෙස සැලකිය හැකිය.

බුද්ධ ශාසන ඇමැතිවරයා ලෙස ගාමිණී ජයවික්‍රම පෙරේරා ජනාධිපතිට යවන ලද ඒ අශීලාචාර ලිපිය මෙහි දැක්වේ.

අපට පිහියෙන් ඇනීමකි

යහපාලනප්‍රේමී, ශීලාචාර, නීති ගරුක, 62 ලක්ෂයක් වූ ජනතාවටත් වඩා ලංකා ඊ නිව්ස්හි අපට සහ අප පාඨක සමාජයට ජයවික්‍රමගේ ලිපිය පිහියෙන් ඇන්නා සේ දැනේ. මන්ද යත් ඥානසාර එදින අධිකරණය ඇතුලේ ඩෙඟා නැටුවේ ලංකා ඊ නිව්ස් මාධ්‍යවේදී ප්‍රගීත් එක්නැලිගොඩ අතුරුදහන් කිරීමේ අපරාධයට රිමාන්ඩ් බන්ධනාගාර ගත කර සිටි අපරාධකරුවන් වෙනුවෙන් නිසා ය. අධිකරණයේ විනිසුරුතුමාටත් රජයේ නීතිඥතුමාටත් චන්ඩි පාට් දැමීමට පෙර ඥානසාර චන්ඩි පාට් එක දැම්මේ අතුරුදහන් කළ ලංකා ඊ නිව්ස් මාධ්‍ය සගයාගේ වියෝවින් තැවෙන ඔහුගේ දයාබර බිරිඳට ය. “තොගෙ මිනිහා කොටියෙක්. තෝ ගිහින් හිඟා කාපිය” කියා ඥානසාර ඇයට නින්දා සහගත ලෙස බැන වැදුනේ අධිකරණය ඇතුලේ දීම ය.

දැන් රනිල්-ජයවික්‍රම දෙදෙනා නිදහස් කරන්නැයි ඉල්ලා සිටින්නේ ඒ ඥානසාරව ය. නමුත් 2015 ජනවාරි 8 වෙනිදාට පෙර මේ දේශපාලකයන් දෙදෙනා ජනතාවට දස අතේ පොරොන්දු දුන්නේ එක්නැලිගොඩ අතුරුදහන් කළ වුන් නීතිය ඉදිරියට ගෙන එනවා කියා ය.

ගුද රුදාව

උන් නීතිය ඉදිරියට නොගෙනාවා පමණක් නොව උන් වෙනුවෙන් අධිකරණයටත් එක්නැලිගොඩ බිරිඳටත් අපහාස කළ එකෙකු හිරේ දැමූ විට දැන් මේ දේශපාලකයන් දෙදෙනා කියන්නේ ඔහුවත් නිදහස් කරන්න කියා ය. එසේ නම් නියම අපරාධකරුවන් වෙනුවෙන් මොවුන් කුමන ආකාරයකින් හොර රහසේ පෙනී සිටිනවා ඇතිදැයි අපට අනුමාණ කළ හැකිය. එසේ නැතිනම් ඥානසාර හිරේ ඉන්නවා කියා මේ තරම් ගුද රුදාවක් රනිල්ට, ජයවික්‍රමට ඇති විය නොහැකි ය.

ඉහත සියල්ල මේ අශීලාචාර ලිපියත් සමග ලංකා ඊ නිව්ස් හි අපට සහ අප පාඨකයනට දැනෙන පුද්ගලික හැඟීම් ය.

පොදුවේ සිදුකරන අශීලාචාරකමෙක මහත

පොදුවේ ගත් කළ මේ ලිපිය අශීලාචාර සහ නින්දා සහගත වන තවත් ප්‍රධාන කාරණයක් තිබේ. එක්සත් ජාතික පක්ෂ නායකත්වය සූදානම් වන්නේ ජාතික ප්‍රජාතන්ත්‍රවාදී පෙරමුණ නම් පුළුල් සන්ධානයක් ගොඩ නැගීමට ය. ඒ නම් ප්‍රජාතන්ත්‍රවාදය සඳහා ජාතික එකමුතුවකි. එවැනි කාරියක් අතෙක තබාගෙන ප්‍රජාතන්ත්‍රවාදයේ සොහොන් පල්ලෙකු වන ඥානසාර මේ තරම් ඉක්මනට හිරෙන් එළියට ගන්නට වළිකන්නේ ප්‍රජාතන්ත්‍රවාදය සඳහා ද? ඥානසාර නායකත්වය දෙන ෆැසිස්ට්වාදී අන්තවාදී ගෝත්‍රික බලවේග පිනවීම සඳහාද?

ඥානසාර හිරේ ගියේ අවම වශයෙන් වසර 6 කට ය. ශ්‍රෙෂ්ඨාධිකරණය ඔහුගේ අභියාචනය කුණු බක්කියට දැම්මේ 2018 ඔක්. 05 දාය. දැන් රනිල් - ජයවික්‍රම ඔහුව එළියට ගන්න වළිකන්නේ ලබන පෙබරවාරි 4 දාට ය.

අධිකරණයක් වරදකරුවෙකු හිරේ ලෑමෙන් කාරණා දෙකක් බලාපොරොත්තු වේ. එකක් ඒ වරදකරුවා පුනරුත්ථාපනය කිරීම ය. දෙවැන්න එවැනි වරදවල් නොකරන ලෙසට සමාජයට පණිවුඩයක් දීමට ය. වසර 6 කට හිරේ ගිය ඥානසාර නමැති වරදකරුවා මාස 6 ක් යෑමටත් මත්තෙන් එළියට ගැනීමෙන් ඒ කාරණා දෙකම ඉෂ්ඨ සිද්ධ වන්නේ නැත.

රනිල්ලාගේ ජයවික්‍රමලාගේ ගොබ්බකම

වසර 6ක් හිරේ ගිය එකා අඩුම ගණනේ වසරක් හෝ හිරේ හිඳිමින් කරන ලද වරද තේරුම් යෑමටවත් පෙර මාස 6 ක් යන්නටත් දවසකට මත්තෙන් එළියට ගැනීමට පුදුමාකාර හදිසියක් ඇති වී ඇත්තේ මන්ද? ඒ අන් කිසිවකට නොව ලඟ ලඟ එන මැතිවරණයකදී ඥානසාර නායකත්වය දෙන ෆැසිස්ට්වාදී අන්තවාදී ගෝත්‍රික බලවේග වල ඡන්දය තම සාක්කුවට දමා ගැනීමට ය.

රනිල්ලාගේ ජයවික්‍රමලාගේ ගොබ්බ කම එළියට පනින්නේ මෙතැන දී ය. ඥානසාර නායකත්වය දෙන බලවේග ඉන්නේ කොහොමටත් රාජපක්ෂ කඳවුරේ ය. රනිල්ලා ජයවික්‍රමලා ලියුම් ගසා නොව පිනුම් ගසා හෝ ඥානසාර එළියට ගත්ත ද ඒ බලවේග වලින් එකෙකු හෝ රනිල්ට ඡන්දයක් දෙන්නේ නැත. එසේ සිතනවා නම් ගෝඨාභය රාජපක්ෂ මුස්ලිම් පල්ලි ගානේ ගොස් සෙල්ෆි ගහන ප්‍රමාණයට ගෝඨාට මුස්ලිම් ඡන්ද ලැබිය යුතුය. මෙසිරි ලංකාවේ නම් එහෙම වන්නේ නැත.

දෙසැම්බර් 13 දා යලි ඉපැදුනු රනිල් වික්‍රමසිංහ ලවක් දෙවක් නැතිව පන්සල් ගානේ යමින්, ගස් ගල් වල හිස් ගෙඩිය ගසා ගනිමින්, කිරි දියෙන් පිළිම නාවමින්, කෙදිනකවත් නොකළ ජවුසමක් නටන කල ඔහු මෙවැනි බොරු වලකට පැනීමට ඉතාම ආසන්න බවට අපි සැක කෙළෙමු. දැන් මේ ලිපියකින් සිදුකරගෙන ඇත්තේ එ් බොරු වලට පැනීමයි.

පරාජයේ තීරණාත්මක හැරුම් ලක්ෂය සහ ඥානසාරගේ සිනහව

හැට දෙලක්ෂයක ජනතාව පාවා දුන්නේ සිරිසේන පමණක් යැයි සිතා සිටියද එය රනිල් වික්‍රමසිංහද සිදුකර ඇති බව මේ ලිපිය සනාථ කරයි. ඈත සිටින සතුරු බලවේගයක අතලොස්සක් දිනා ගැනීමට ගොස් ලඟම සිටින මිතුරන් බුසලක් අහිමි කරගෙන තිබේ. මෙම ලිපිය රනිල් වික්‍රමසිංහගේ පරාජයේ තීරණාත්මක හැරුම් ලක්ෂයක් වීම වැළැක්විය හැකි ජගතෙක් නැත. මෙහි ‘විශ්වාසී’ කියා අත්සන් කර ඇත්තේ ඒ ‘පරාජයේ විශ්වාසය’ ගැන විය යුතුය.

(ලිපියට අත්සන් කර ඇත්තේ ගාමිණී ජයවික්‍රම පමණක් නමුත් අප ලිපිය මගින් දිගටම රනිල් වික්‍රමසිංහටද චෝදනා කෙළේ එජාප නායකයාගේ අනුදැනුමකින් තොරව ගාමිණී ජයවික්‍රම හිතුමතේ ක්‍රියා නොකරන බව අප ඉන්තේරුවෙන්ම දන්නා නිසා ය.)

මේ ලිපිය අවසන් කිරීමට පෙර කුඩා සටහනක් තැබිය යුතුය. ඥානසාර හිරේ යෑමට පෙර නිතර මේ යහපාලන ආණ්ඩුව හැඳින්වූයේ ‘නපුංසක ආණ්ඩුව’ කියා ය. ඔහු හිරෙන් එළියට ආ පසු එය ප්‍රසිද්ධියේ නොකීමට ඉඩ තිබුනත් උදේ හවා සිත යටින් එයම කියමින් සිනාසෙනවා නොඅනුමාන ය.