(ලංකා ඊ නිව්ස් -2016.අප්‍රේල්.05, ප.ව.11.55) රවි ජයවර්ධන විචිත්‍ර චරිතයකි. ශ්‍රී ලංකාවේ සමාජ, දේශපාලන, ආර්ථික ගමන් මග වෙනස් කළ යුග පුරුෂයා වූ සිය පියාගේ දේශපාලන උරුමය ඔහු අලුයම ලූ කෙළ පිඩක් සේ ඉවත දැමීය. පළමුව ගුවන ජය ගැනීමට අවශ්‍ය වූ ඔහු ගුවන් නියමුවෙකු වීමට අවශ්‍ය විදේශ අධ්‍යාපනය ලැබීය. ගුවන් නියමු අධ්‍යාපනය නිමා කළ ඔහු සිය රට පැමිණ Air Ceylon ගුවන් සේවයේ පියාසර නියමුවෙකු වශයෙන් සේවයට එක්විය. මේ වකවානුවේ ඔහු ඉලක්කයට වෙඩි තැබීමේ ක්‍රීඩාව ප්‍රගුණ කර එහි ප්‍රමුඛයා වූයේ ය. ශ්‍රී ලංකාව නියෝජනය කරමින් 1964 ටෝකියෝ ඔලිම්පික් උළෙලට සහභාගී වූ ඔහු ඉලක්කයට වෙඩි තැබීමේ ඉසව්වට තරඟ කෙළේය. එම ඉසව්ව නියෝජනය කරමින් ඔලිම්පික් උළෙලකට තරඟ කළ පළමුවැන්නා රවි ජයවර්ධන විය. හැත්තෑව දශකය ආරම්භයේදී ඒ සියල්ල අත්හැර දමා ඔහු තායිලන්තවට ගියේ ය. තායිලන්තයේදී බෞද්ධ භික්ෂුවක් වශයෙන් මහණ ජීවිතයට පිවිසියේ ය. රවි ජයවර්ධන වසර තුනක් මහණ දම් දරා උපැවිදිව නැවත ලංකාවට පැමිණියේ ය. මේ වකවානුව පුරා ඔහුගේ සමීතම මිතුරෙකු වූයේ රඛිත වික්‍රමනායක ය. රඛිත සහ රවි දෙදෙනාම Air Ceylon ගුවන් සේවයේ සමකාලීන පියාසර නියමුවෝ වූහ. රඛිත වික්‍රමනායක ද ශ්‍රී ලංකාවේ ජාතික ගුවන් සේවය වන Air Ceylon යෙන් ඉවත් වී සිංගප්පූරුවේ ජාතික ගුවන් සේවය වන සිංගප්පූරු ගුවන් සේවයට එක්ව සිටියේ ය. වසර කිහිපයකින් ඔහු එම ගුවන් සේවයේ ජ්‍යෙෂ්ඨ පියාසර නියමුවෙකු බවට පත් විය. සීමිත ධාරිතාවයකින් ක්‍රියාත්මක වූ Air Ceylon මූල්‍ය වශයෙන් බංකොලොත් තත්ත්වයට පත්වෙමින් පැවැතියේ ය. ශ්‍රී ලංකාවට ශක්තිමත් ජාතික ගුවන් සේවයක් ස්ථාපිත කළ යුතු බවට රවි ජයවර්ධන ඒ දිනවල සිහින දකිමින් සිටියේ ය. රඛිත සේවය කරමින් සිටි සිංගප්පූරු ගුවන් සේවය ඔහුගේ නිදසුන විය. සිංගප්පූරු ගුවන් සේවය ස්ථාපිත කර වසර කිහිපයකින්ම එය කැපී පෙණෙන ජාත්‍යන්තර ගුවන් සේවයක් බවට පරිවර්ථනය කිරීමට එහි කළමනාකාරිත්වයට හැකි වූයේ ය.
හැත්තෑ හතේ මහ මැතිවරණයෙන් සිය පියාගේ නායකත්වයෙන් වූ එජාපය හයෙන් පහක බලයක් දිනා ගනිමින් රටේ දිශානතිය වෙනස් කිරීමත් සමග නව ජාතික ගුවන් සේවයක් ස්ථාපිත කිරීමේ සිහිනය සැබෑ කර ගැනීමේ අවස්ථාවක් රවි ජයවර්ධනට උදාවිය. ඒ වන විට Air Ceylon ජාතික ගුවන් සේවය බංකොලොත්ව පැවැති බැවින් රවි ජයවර්ධනයේ යෝජනාවට ශක්තිමත් පදනමක් තිබිණ. නව ජාතික ගුවන් සේවය ස්ථාපිත කිරීමට සිය මිතුරා වන රඛිත වික්‍රමනායක ගේ සහයෝගය ලබා ගැනීමට හැකි බව ඔහු සිය පියාට පෙන්වා දුන්නේ ය. නව ජාතික ගුවන් සේවයක් ආරම්භ කර එය සාර්ථක ජාත්‍යන්තර ගුවන් සේවයක මට්ටමට ලඟා වුවහොත් එය රටට විශාල කීර්තියකි. එමෙන්ම එය ශ්‍රී ලංකාවේ නව ආර්ථික ගමනේ සංඛේතයකි. මෙම පසුබිම තුල නව ජාතික ගුවන් සේවයක් ස්ථාපිත කිරීමේ යෝජනාවට ජේ.ආර්.ජයර්ධන ජනාධිපතිවරයා එකඟ විය.
පනහ දශකයේ ශ්‍රී ලංකාවට පැමිණ, සිංගප්පූරුව ශ්‍රී ලංකාවක් කිරීමට සිහින දැකි සිංගප්පූරු අගමැති ලී ක්වාන් යූ ඒ වන විට සිය ජාතික ගුවන් සේවය ස්ථාපිත කර එය ජාත්‍යන්තර මට්ටමට ගෙන ගොස් තිබිණ. ජයවර්ධන ජනාධිපතිවරයාට සිය පෞද්ගලික මිතුරෙකු වූ සිංගප්පූරු අගමැතිවරයාගෙන් සිංගප්පූරු ගුවන් සේවයේ සාර්ථකත්වයේ රහස පිලිබඳ දැන ගැනීමට අවශ්‍ය විය. නව ගුවන් සේවය සඳහා රඛිත වික්‍රමනායක මූලික කර ගැනීමට බලාපොරොත්තු වූ බැවින් ඔහු මූලික කර ගනිමින් නව ශ්‍රී ලාංකික ජාතික ගුවන් සේවය ආරම්භ කිරීම සාර්ථක වේද යන සැකයද සිංගප්පූරු අගමැති වරයා එහිදී මතු කෙළේය. මෙම සිද්ධිය පිලිබඳ විස්තර ලී ක්වාන් යූ ගේ චරිතාපදානයේ විස්තරාත්මකව සඳහන් වෙයි. ඔහු මෙම සිද්ධිය ශ්‍රී ලංකාවට තම ප්‍රමුඛතා හඳුනාගැනීමට නොහැකි වීමේ අවාසනාව වශයෙන් විස්තර කරයි.
සිංගප්පූරු අගමැතිවරයාගේ අනතුරු ඇඟවීම නොසළකා හරින ජයවර්ධන ජනාධිපතිපතිවරයා 1979 දී රඛිත වික්‍රමනායක සභාපති සහ කළමනාකාර අධ්‍යක්ෂ වශයෙන් කටයුතු කරන ‘‘එයාර් ලංකා‘‘ නමින් නව ජාතික ගුවන් සේවයක් ස්ථාපිත කෙළේය. එය සම්පූර්ණ රජයට අයත් සමාගමක් විය. ඉතිහාසයේ සරදමකට මෙන් ‘එයාර් ලංකා‘ ගුවන් සේවය ආරම්භ කිරීමට සිදුවූයේ සිංගප්පූරු ගුවන් සේවයෙන් ලීසින් ක්‍රමයට මිලදී ගත් ‘බෝයින් 707‘ ගුවන් යානා දෙකක් උපයෝගී කර ගනිමිනි.
එයාර් ලංකා උපන්නේ 1947 දී බ්‍රිතාන්‍ය පාලන සමයේ ආරම්භ කළ Air Ceylon මරා දමමිනි. නව ගුවන් සේවය ආරම්භ කිරීම සඳහා ජයවර්ධන රජය පැරණි ජාතික ගුවන් සේවය ඈවර කෙළේය. නිදහස ලැබීමත් සමග රටේ ජාතික ගුවන් සේවය වශයෙන් නම් ලැබූ Air Ceylon ගුවන් සේවය මූලික වශයෙන් අභ්‍යන්තර ගුවන් සේවයක් වශයෙන් ක්‍රියාත්මක විය. සීමිත ජාත්‍යන්තර ගුවන් ගමන් පවත්වාගෙන යෑම සඳහා Air Ceylon ගුවන් සේවය Australion National Airways, KLM, British Overseas Airways Coporation සහ ප්‍රංශයේ UTA වැනි ගුවන් සේවා සමග විටින් විට ගිවිසුම් ඇති කර ගත්තේ ය. එම විදේශ සමාගම් Air Ceylon හි ගුවන් ගමන් මෙහෙයැවීය. එවැනි ප්‍රමුඛ ජාත්‍යන්තර ගුවන් සේවාවන් සමග එක්ව කටයුතු කළ දශක තුනක කාලයේදී පවා Air Ceylon ගුවන් සේවයට ස්ථාවර මූල්‍ය පදනමක් නොවීය. ජාතික ගුවන් සේවය දිගින් දිගටම පාඩු ලැබීය. දූෂන වංචා අයථා ගණුදෙනු පිලිබඳව විවිධ චෝදනා එම වකවානුවේද මතු වූ අතර අවසානයේ දිගින් දිගට පාඩු ලැබූ ජාතික ගුවන් සේවය Air Ceylon ඈවර කරන ලදී.
රජයට පූර්ණ අයිතිය පැවැති Air Ceylon ගුවන් සේවය වසා දැමීමට සිදුවූයේ මන්ද යන්න එයාර් ලංකා නව ජාතික ගුවන් සේවය ආරම්භ කිරීමට පෙර අධ්‍යයනය කෙළේ නැත. ලෝකයේ ප්‍රමුඛ ජාත්‍යන්තර ගුවන් සේවා සමග එක්ව කටයුතු කරන අවදියේ පවා පාඩු ලැබුවේ මන්ද යන්න සොයා බැලුවේ නැත. කළමනාකාරීත්වයේ දුර්වලතා මෙන්ම අලෙවිකරණයේ පසු බැසීම් සෙයා බලා විසඳුම් හඳුනාගත්තේ නැත. ඒ වෙනුවට බංකොලොත් වූ ජාතික ගුවන් සේවය ඈවර කර ‘එයාර් ලංකා‘ නමින් නව ගුවන් සේවයක් ආරම්භ කෙළේය. මෙය අටුව කඩා පුටුව හැදූ වර්ගයේ විසඳුමක් විය.
සිංගප්පූරු අගමැති ලී ක්වාන් යූ පෙන්වා දුන් පරිදිම නව ජාතික ගුවන් සේවය ශ්‍රී ලංකාවේ ආර්ථික සංවර්ධනයට දායක වනවා වෙනුවට එයට බාධා කරන ඊයම් බරුවක් විය. වාර්ෂිකව මහා භාණ්ඩාගාරයේ මුදල් පොම්ප කරමින් ‘එයාර් ලංකා‘ ගුවන් සේවය පවත්වාගෙන යෑමට සිදුවිය. ඕනෑම ව්‍යාපාරයක් ආරම්භ කර වසර කිහිපයක් යන තුරු ලාභයක් ලබා ගත නොහැක. එහෙත් වසර කිහිපයකින් පසුව හෝ පාඩුව අවම කර ගැනීමට හැකි විය යුතුය. එහෙත් ‘එයාර් ලංකා‘ ගුවන් සේවයේ වාර්ෂික අලාභය වර්ධනය වූවා මිස අවම වූයේ නැත. එයට අමතරව අල්ලස්, දූෂන, කොමිස් මුදල් සහ කළමනාකරණයේ දුර්වලතා පිලිබඳ විවිධ චෝදනා දිගින් දිගටම එල්ල වූයේ ය. අවසානයේ ‘එයාර් ලංකා‘ ගුවන් සේවය ආරම්භ කර වසර 10 ක් යෑමට පෙර එහි වංචා, දූෂණ පිළිබඳ සොයා බැලීම සඳහා ජනාධිපති කොමිෂන් සභාවක් පත් කිරීමට ජයවර්ධන ජනාධිපතිවරයාට සිදුවීම ඉතිහාසයේ සරදමකි.
ජයවර්ධන පවුලේ හිතවතෙකු මෙන්ම සිය පුත්‍රයාගේ හොඳම මිතුරෙකු වූ රඛිත වික්‍රමනායක මත තැබූ විශ්වාසය මෙන්ම රවි ජයවර්ධනගේ ශක්තිමත් ජාතික ගුවන් සේවාවවක් පිළිබඳ සිහිනය ද බිඳ වැටුණි. ජයවර්ධන ජනාධිපතිවරයා තම උපදෙස් පිළිගත්තේ නම් ‘එයාර් ලංකා‘ වලේ නොවැටෙන බව සිංගප්පූරු අගමැතිවරයා සිය චරිතාපදානයේ සඳහන් කරයි.
වාර්ෂිකව රුපියල් මිලියන ගණනින් පාඩු ලැබූ ‘එයාර් ලංකා‘ ජාතික ගුවන් සේවය බේරා ගැනීමට විවෘත ආර්ථිකයේ ප්‍රමුඛයා මෙන්ම ආර්ථිකය හැසිරවීමේ පකීර්ලා වන එජාප රජයන්ට නොහැකි විය. මරණාසන්නයේ පණ අදිමින් සිටි ‘එයාර් ලංකා‘ ගුවන් සේවයට නව එන්නතක් ලබා දීමට සිදුවූයේ ‘විවෘත ආර්ථිකයට මානුෂික මුහුණුවරක්‘ ලබා දීමට ඉදිරිපත් වූ පොදු ජන එක්සත් පෙරමුණු රජයේ චන්ද්‍රිකා බණ්ඩාරනායක කුමාරතුංගට ය. ඇය ඉතා නිර්භීත තීරණයක් ගනිමින් ‘එයාර් ලංකා‘ සමාගමේ රජයේ හිමිකාරිත්වයෙන් සියයට 40 ක් පෞද්ගලීකරණයට තීරණය කළා ය. ලෝකයේ ජාතික ගුවන් සේවාවන් සම්පූර්ණයෙන්ම රජය පාලනය කිරීමේ ක්‍රමවේදය වෙනස් වෙමින් තිබුණු වකවානුවක එනම් 1998 දී ආර්ථික පකීර් කෙනෙකු නොවූ ඇය මෙම අවදානම් තීරණය ගත්තා ය. අද වන විට ලෝකයේ ජාතික ගුවන් සේවා අතරින් සියයට 10 ක් වත් සම්පූර්ණ රජයේ පාලනයේ නොපවතී. ජාතික ගුවන් සේවාවන්ගෙන් සියයට 90 ක්ම බහුතර කොටස් ප්‍රමාණයක් හෝ සුළුතර කොටස් ප්‍රමාණයක් හෝ පෞද්ගලික අංශයට අලෙවි කර ඔවුන් ගුවන් සේවාවවන්හි මෙහෙයුම් හෝ කළමනාකරණයට එක් කරගෙන ඇත.
ගුවන් සේවා මෙහෙයැවීමේ විශිෂ්ඨයෙකු වූ කටාර් රාජ්‍යෙය් ‘එමිරේට්ස්‘ සමාගම සමග 1998 දී ගිවිසුමකට එළැඹීමට චන්ද්‍රිකා රජය සමත් විය. එම ගිවිසුම අනුව ‘එයාර් ලංකා‘ සමාගමේ රජයේ කොටස් සියයට 40 ක් එමිරේට්ස් සමාගම ඇ.ඩො. මිලියන 70 කට මිලදී ගත්තේ ය. (පසුව එම කොටස් ප්‍රමාණය සියයට 43.6 ක් දක්වා වර්ධනය විය.) වසර 10 ක් පුරා ක්‍රියාත්මක එම ගිවිසුම අනුව ‘එයාර් ලංකා‘ ජාතික ගුවන් සේවය ‘ශ්‍රී ලංකන්‘ නමින් හඳුන්වා දුන් අතර ගුවන් සේවය මෙහෙයැවීමේ සහ කළමනාකරන තීන්දු ගැනීමේ බලය එමිරේට්ස් සමාගමට හිමි විය. වසර 10 කට පසුව ගිවිසුම අවලංගු වන අතර එමිරේට්ස් සමාගමට විකිණූ සියයට 40ක කොටස් ප්‍රමාණය යලි ශ්‍රී ලංකා රජය මිලදී ගැනීමට නියමිත විය. ‘ශ්‍රී ලංකන්‘ ගුවන් සමාගම ශ්‍රී ලංකාවේ ජාතික ගුවන් සේවය වශයෙන් පවතිනු ඇත.
පෞද්ගලීකරණය යන නම ඇසූ පමණින් බූමිතෙල් ගෑවුනු ගැරඬියන් සේ දැඟලීම අපේ වාමාංශිකයන්ගේ පුරුද්දකි. ‘එයාර් ලංකා‘ සමාගමේ සුළුතර කොටස් ප්‍රමාණයක් එම්රේට්ස් සමාගමට අලෙවි කිරීමට රජය ගත් තීරණය සම්බන්ධයෙන්ද වාමාංශිකයෝ සිය සුපුරුදු රංගනයේ නිරත වූහ. එහෙත් පුදුමයකට මෙන් ‘එයාර් ලංකා‘ සමාගමේ සුළුතර කොටස් ප්‍රමාණයක් වසර 10 කට එමිරේට්ස් සමාගමට පවරා දීමට එරෙහිව පොළොවේ පස් කෑවේ රනිල් වික්‍රමසිංහ මහතාගේ නායකත්වයෙන් යුත් එජාපය යි. විවෘත ආර්ථිකය මෙන්ම පෞද්ගලීකරණය ජනතාකරණය නමින් රටට හඳුන්වා දුන් එජාපය එමිරේට්ස් ගිවිසුමට විරුද්ධ වූයේ දේශපාලන කුහක කමට ය.
වර්තමාන රජයේ රාජ්‍ය ආයතන සංවර්ධන නියෝජ්‍ය ඇමැති එරාන් වික්‍රමරත්න මහතා ඒ බව පසුගිය සතියේදී පාර්ලිමේන්තුවේදී තහවුරු කෙළේය. ‘එයාර් ලංකා‘ පෞද්ගලීකරණයට චන්ද්‍රිකා රජය ගත් නීත්දුව නිවැරදි බව කියා සිටි එරාන්, වෙනත් රජයක් එම තීන්දුව ගත්තද එය පැසසිය යුතු බව අවධාරණය කෙළේය. එරාන් වික්‍රමරත්න යනු ලංකාවේ සිටින ප්‍රමුඛතම බැංකු කරුවෙකි. වසර 2001 සිට වසර 10 ක් ජාතික සංවර්ධන බැංකුව (NDB) මෙහෙයැවූ ඔහු එම වකවානුවේ දී එම බැංකුව ශක්තිමත් තැනකට ඔසවා තැබුවේ ය. පක්ෂ බේදයෙන් තොරව ඔහුට ව්‍යාපාරික ක්ෂේත්‍රයේ සහ බැංකු කරුවන් අතර ඉහළ පිළිගැනීමක් හිමිය. ජ්‍යෙෂ්ඨයින්ට කැබිනට් ඇමැති ධූර පිරි නැමීමේ ගල් යුගයේ මිණුම් දණ්ඩ හේතුවෙන් එරාන්ලා සිටිය යුතු කැබිනට් මණ්ඩල වල සිටින්නේ ජෝන් අමරතුංගලා වැනි තක්කඩියන් ය. රාජපක්ෂ රෙජීමයේ වසර 10 ක කාලය පුරා ඔවුන් සමග දේශපාලන මෙන්ම ව්‍යාපාරික ඩීල් දමමින් සිටි ජෝන් අමරතුංග කිසිදු හිරිකිතයකින් තොරව මහින්ද රාජපක්ෂගේ දැවැන්ත විදේශ සංචාර නඩ වලට එක් වූයේ වරක් දෙවරක් නොවේය. රාජපක්ෂගේ දෑත ශක්තිමත් කිරීමට ඔන්න මෙන්න කියා සිටියදී එජපයේ කරුමයට ඔහු පොදු අපේක්ෂකයාට සහාය දීමට තීරණය කෙළේය. එජාප නායකයා මහින්ද රාජපක්ෂ ලඟට තල්ලු කර යැවිය යුතුව තිබුනේ දූෂිත ජෝන් අමරතුංග මිස කුමන අඩුපාඩු මධ්‍යයේ වුවද පක්ෂයට දර දිය ඇද්ද තිස්ස අත්තනායක නොවේ. එහි විපාක අද සමස්ථ යහපාලන රජයට ගෙවීමට සිදුව ඇත.
පොදු ජන එක්සත් පෙරමුණේ හවුල්කාර වාමාංශික පක්ෂ මෙන්ම එජාපයේ ආර්ථික පකීර්ලාගේ දැඩි විරෝධයන් හමුවේ නොසැලුණු චන්ද්‍රිකා කුමාරතුංග ජනාධිපතිවරිය එමිරේට්ස් ගිවිසුම අත්සන් කළාය. වසර කිහිපයකින්ම එහි ප්‍රථිපල ලැබෙන්නට විය. 1979 සිට පාඩු ලැබූ ‘එයාර් ලංකා‘ ගුවන් සේවය ක්‍රම ක්‍රමයෙන් ලාබ ලැබීමට පටන් ගත්තේ ය. වසර 2008 දීඑනම් වසර දහයේ ගිවිසුම අවසන් වූ වසරේ දී පමණක් ශ්‍රී ලංකන් ගුවන් සේවය ලැබූ ලාබය රුපියල් බිලියන 4.4 කි. එම වසර අවසානයේ ඉදිරියට ගෙන ගිය ලාභය රුපියල් බිලියන 9.288 කි. එනම් වසර දහයේ එමිරේට්ස් ගිවිසුම අවසන් වන විට ආයතනය ඉදිරියට ගෙන යෑමට බිලියන 9 ක ශුද්ධ ලාභයක් තිබිණ.
එවකට ජනාධිපති ලෙස බලයේ සිටි මහින්ද රාජපක්ෂ ජනාධිපතිවරයා කළ යුතුව තිබුණේ ශ්‍රී ලංකා රජයට වඩාත් වාසි වන අන්දමින් එමිරේට්ස් ගිවිසුම දීර්ඝ කිරීම හෝ වෙනත් විදේශ ගුවන් සේවාවක් එක්කර ගැනීමය. එහෙත් ඔහු එමිරේට්ස් ගුවන් සමාගම පළවා හැර රුපියල් බිලියන 9 ක ලාභයක් ලැබූ ශ්‍රී ලංකන් ගුවන් සේවය 8 වෙනි ශ්‍රේණිය සමත් සිය මස්සිනා වන නිශාන්ත වික්‍රමසිංහට බාර දුන්නේ ය.
එමිරේට්ස් ගිවිසුම අවසන් කිරීමට මූලිකව බලපෑ සිද්ධියද රාජපක්ෂ රෙජීමයේ මෝඩ, තකතීරු බව මෙන්ම අහංකාර උඩඟු බව ලෝකයටම හෙලි කළ අවස්ථාවක් විය.
ඒ වසර 2007 යි. මහින්ද රාජපක්ෂ ජනාධිපතිවරයා විදේශ සංචාර වල නිරත වන්නේ සිය ගණනින් යුත් සට්ටැඹි නඩ පිරිවරා ගෙනය එවැනි නඩයක් සමග හදිසියේ බ්‍රිතාන්‍යයේ ලන්ඩන් නුවරට යෑමට රාජපක්ෂ ජනාධිපතිවරයාට අවශ්‍ය විය. එවක විදේශ ඇමැතිවරයා වූයේ සජින් වාස් ගුණවර්ධනය. (නිල ඇමැතිවරයා මහාචාර්ය ජී.ඇල්. පීරිස් වුවද විදේශ අමාත්‍යාංශය මෙහෙයැවූයේ අටවන ශ්‍රේණිය සමත් සජින් වාස් ය. ඔහු මහාචාර්ය ජී.ඇල්. ඇමැතුවේ “අයිසේ“ කියා වන අතර ඔහුගේ ලොක්කා රාජපක්ෂ ජනාධිපතිවරයා මහාචාර්යවරයාට බැන වැදුනේ ඔහුගේ මව් පාර්ශවයේ ගුණ මතක් කරමිනි) සජින් වාස් ශ්‍රී ලංකන් ගුවන් සේවාවේ ප්‍රධාන විධායක නිලධාරී බ්‍රිතාන්‍ය ජාතික පීටර් හිල් අමතමින් කියා සිටියේ රාජපක්ෂ ජනාධිපතිවරයා ඇතුලු නඩයට වහාම ආසන වෙන් කරන ලෙසයි. එහෙත් පීටර් හිල් කියා සිටියේ අවසාන මොහොතේ එවැනි විශාල පිරිසකට ආසන වෙන් කළ නොහැකි බවයි. ජනාධිපතිවරයා ඇතුළු කිහිප දෙනෙකුට පමණක් ආසන වෙන් කර ගැනීමට හැකි බවද ඔහු පැවසුවේ ය. ඒ වන විටත් ගුවන් මගීන්ට තම සමාගම ගුවන් ටිකට් පත් අලෙවි කර ඇති බැවින් එම ටිකට් පත් හදිසියේ අවලංගු කළ නොහැකි බව පීටර් හිල් පෙන්වා දුන්නේ ය. ගුවන් ටිකට් පතක් නිකුත් කිරීම යනු ගුවන් මගීන් සහ සමාගම අතර ගිවිසුමක් බැවින් එම ගිවිසුම අවලංගු කිරීම දුෂ්කර බවත් එමගින් ශ්‍රී ලාංකික පුරවැසියන්ට අසාධාරණයක් වන බවත් පීටර් හිල් කියා සිටියේ ය. තමන්ගේ හිසට ඉහලින් කපුටෙක් හෝ පියාඹා යා නොහැකි මානසිකත්වයෙන් සිටි රාජපක්ෂලාට සහ ඔහුගේ සට්ටැඹියන්ට පාරිභෝගික අයිතිවාසිකම් යනු හාස්‍යයට හේතුවක් විය. සජින් වාස් පීටර් හිල්ගේ ප්‍රතිචාරය රාජපක්ෂ ජනාධිපතිවරයාට දැනුම් දුන්නේය. විනාඩි කිහිපයකින් යලි ශ්‍රී ලංකන් ප්‍රධාන විධායක නිලධාරියා ඇමැතූ සජින් වාස් රජයේ පිළිතුර ලබා දුන්නේ ය. “හෙට ගෙදර යන්න ලෑස්ති වෙයන්“ පිළිතුර විය. පසුදින අදාළ පිිළිතුර සනාථ කරමින් පීටර් හිල්ගේ වීසා බලපත්‍රය රාජපක්ෂ රෙජීමය අවලංගු කෙළේය. වසර 2008 අවසන් වන එමිරේට්ස් ගිවිසුම දීර්ඝ කිරීමට රාජපක්ෂ රෙජීමය ක්‍රියා නොකළ අතර එමිරේට්ස් සමාගම සිය සියයට 40 කොටස් ටික රජයට විකුණා ඉවත්ව ගියේ ය.
එමිරේට්ස් සමාගම සමග එළැඹි ගිවිසුමට වඩා ශ්‍රී ලංකා රජයට වාසි දායක ගිවිසුමකට වෙනත් විදේශීය ගුවන් සමාගමක් සමග ගිවිසුමකට එළැඹෙනවා වෙනුවට ශ්‍රී ලංකන් ගුවන් සේවය රාජපක්ෂ රෙජීමය තමා සතු කර ගත්තේ ය. රටේ සම්පත් හොරා කෑම තම එකම අභිප්‍රාය කරගත් රාජපක්ෂ රෙජීමයේ ඇස යොමු වූයේ ඒ වන විට ශ්‍රී ලංකන් ගුවන් සේවය ලබා තිබූ රුපියල් බිලියන 9 ක ලාභය වෙත ය. රුපියල් සියය හෝ හොරා කෑමට ඇති විට ඉතාම කෑදර ලෙස එම ඩැහැ ගන්නා රාජපක්ෂ රෙජීමයට ශ්‍රී ලංකන් එයාර් යනු රස බොජුනක් විය. එම රස බොජුන වැළැඳීමට තම පවුලේ ලේ ඥාතියෙකු නොවන කෙනෙකු පත් නොකර තම මස්සිනාවම ඒ සඳහා නම් කිරීමට රාජපක්ෂ ජනාධිපතිවරයා පරිස්සම් විය.
ශිරන්ති රාජපක්ෂගේ සොහොයුරා වූ නිශාන්ත වික්‍රමසිංහ යනු රාජපක්ෂ පවුලටම ගැලපෙන පුද්ගලයෙකු විය. රාජපක්ෂ පවුලේ අධ්‍යාපන සුදුසුකම් ඉක්මවා නොගිය ඔහු සමත්ව තිබුනේ අට වෙනි ශ්‍රේණිය පමණි. හිටපු ගුවන් සේවා ඇමැති ප්‍රියංකර ජයරත්න පාර්ලිමේන්තුවේදී මේ බව තහවුරු කෙළේ ජවිපෙ මන්ත්‍රීවරයෙකු නැගූ ප්‍රශ්නයකට පිළිතුරු දෙමිනි. ශ්‍රී ලංකන් සභාපති නිශාන්ත වික්‍රමසිංහ අපොස සා.පෙළ අසමත් බව ඔහු පිළිගත්තේ ය. නිශාන්ත වික්‍රමසිංහ ද අංක එකේ දූෂිතයෙකු වූ අතර ස්ත්‍රීධූර්තයෙකු විය. ගුවන් සේවා ක්ෂේත්‍රය පිළිබඳව කිසිදු අවබෝධයක් නොතිබුණු නිශාන්ත වික්‍රමසිංහ රුපියල් බිලියන ගණනක ශේෂ පත්‍රයක් සහිත සමාගමක ඉහළ කළමණාකාරිත්ව තනතුරක් ජීවිතයේ කිසිදු දිනෙක දරා තිබුණේ නැත. එයට එකම හේතුව වන්නේ එවැන්නක් සඳහා කිසිදු සුදුසුකමක් ඔහුට නොතිබීම ය.
ශ්‍රී ලංකන් ගුවන් සේවායේ ප්‍රධාන විධායක නිලධාරියා වශයෙන් කපිල චන්ද්‍රසේන පත් කිරීමට රෙජීමය තීරණය කෙළේය. විදුලි සංදේශ ක්ෂේත්‍රයේ අත් දැකීම් තිබූ කපිල චන්ද්‍රසේන ජීවිතයේ කිසිදු දවසක ගුවන් සමාගමක සේවක කර තිබුණේ නැත. නිශාන්ත වික්‍රමසිංහ සහ කපිල චන්ද්‍රසේන ජාඩියට මූඩිය විය. ජාතික ගුවන් සේවයක ප්‍රධාන විධායක නිලධාරියා වශයෙන් ගුවන් සේවා පිළිබඳ කිසිදු අවබෝධයක් නොමැති පුද්ගලයෙකු පත් කළ ප්‍රථම අවස්ථාව මෙය විය. ලෝක ගිනස් වාර්තා පොතට එක්වූ කපිල චන්ද්‍රසේන යනු හිටපු ක්‍රිකට් ක්‍රීඩක අරවින්ද ද සිල්වාගේ මස්සිනා ය. අන්ත දූෂිතයෙකු වූ අරවින්ද ද සිල්වා ඒ වකවානුවේ නාමල් රාජපක්ෂ සමග එක්වෙමින් ව්‍යාපාරික ඩීල් දමමින් සිටියේ ය. නාමල් හරහා අරවින්ද තම මස්සිනා ශ්‍රී ලංකන් වෙත තල්ලු කෙළේය.
නිශාන්තලා චන්ද්‍රසේනලා සමග එක් වූ රාජපක්ෂ රෙජීමය ශ්‍රී ලංකන් ගුවන් සේවය බංකොලොත් කළේය. වසර 2008 සිට 2015 දක්වා කාලය පුරා ශ්‍රී ලංකන් ගුවන් සේවයේ දූෂණය වංචාව ඉහ වහා ගිය අතර නිශාන්ත වික්‍රමසිංහ ගුවන් සේවිකා සුරතලියන් පිරිවරා ගෙන ලෝකය පුරා සැරිසැරුවේ ය. ඔහු කිසිදු විටෙක පූර්ණ කාලීන සභාපතිවරයෙකු වශයෙන් කටයුතු නොකෙළේය. ඔහු පූර්ණ කාලීනව තම ස්ත්‍රීධූර්ත කටයුතු මෙහෙයැවීය. ගුවන් සේවා සමාගමක් මෙහෙයැවීම පිළිබඳ මෙලෝ හසරක් නොදන්න කපිල චන්ද්‍රසේන රාජපක්ෂ පවුල සමග ශ්‍රී ලංකන් ගුවන් සේවය සුද්ධ කෙළේය. එමිරේට්ස් ගිවිසුම අවසන් වන විට පැවැති රුපියල් බිලියන 9 ක ලාභය වසර 2015 වන විට රුපියල් බිලියන 128 ක අලාභයක් බවට පත් කිරීමට ඔව්හු සමත් වූහ. ඒ වන විට එකතු වූ ණය ප්‍රමාණය රුපියල් බිලියන 76 කි. මෙම සංඛ්‍යා ලේඛන උපුටා ගනු ලැබුවේ ශ්‍රී ලංකන් සමාගම ප්‍රසිද්ධියට පත් කළ ලාභාලාභ ගිණුම සහ ශේෂ පත්‍රයට අනුකූලව ය. මෙය රාජපක්ෂ රෙජීමයේ එසේ මෙසේ කෑමක් නොව රජ කෑමකි. රුපියල් බිලියන 9 ක් ලාබ ලැබූ සමාගමක් වසර 6 ක් තුලදී රුපියල් බිලියන 128 ක පාඩු ලබන මට්ටමට පත් කිරීමත්, තවත් රුපියල් බිලියන 76 ක ණය ලබා ගැනීමත් ජාත්‍යන්තර මූල්‍ය ප්‍රමිතීන්ට අනුව මූල්‍ය අපරාධයකි.
එමිරේට්ස් සමාගම නික්ම යන විට එනම් 2008 දී ශ්‍රී ලංකන් ගුවන් සේවයේ සමස්ථ සේවක සංඛ්‍යාව 5113 ක් විය. රාජපක්ෂලා නික්ම යන විට එය 6987 ක් දක්වා වර්ධනය වී තිබිණ. එය සියයට 30 ක වර්ධනයකි. මෙලෙස අලුතින් සේවයට බඳවා ගත් පිරිසෙන් සියයට 95 ක්ම හම්බන්තොට බයියන් වීම විශේෂත්වයකි. කිසිදු මූලික සුදුසුකමක් නොමැති වූ ඔව්හු රුපියල් හැට හැත්තෑදහසේ වැටුප් තලයන්හි අනුයුක්ත කළහ. ඒ අනුව ශ්‍රී ලංකන් ගුවන් සේවයේ එක් ගුවන් යානයක් සඳහා සිටින සේවක සංඛ්‍යාව 365.21 කි. පුදුමයකට මෙන් ශ්‍රී ලංකන් ගුවන් සේවාව සතුව ආසන 300 ට වඩා වැඩි ගුවන් යානා නොමැත. එම ගුවන් සේවයේ බහුතර යානා ප්‍රමාණයක ආසන ධාරිතාවය 140 කි. ජාත්‍යන්තර ගුවන් සේවා ප්‍රමිතීන්ට අනුව මෙවැනි ගුවන් යානා සේවක අනුපාතිකය සාමාන්‍ය මට්ටමට ඉතා ඉහළ ස්ථානයක පවතින්නකි.
ශ්‍රී ලංකන් ගුවන් සේවය රාජපක්ෂ රෙජීමය යටතේ අත් පත් කර ගත් රුපියල් බිලියන 130 ක පාඩු සමාන කළ හැක්කේ ඇඳන් 300 කින් සමන්විත රෝහල් 300 ක් ස්ථාපිත කිරීමට වන ආයෝජනයකට හෝ සියළු පහසුකම් සහිත පාසැල් 130 ක් ස්ථාපිත කිරීමට වැය වන මුදලට ය. මෙම මූල්‍ය අලාභය සඳහා හේතු වී ඇත්තේ ඉතාමත් දුර්වල කළමනාකාරිත්වය සහ අසීමිත දූෂණයයි.
මේ මහා පරිමාණ දූෂණයන්ට එක් උදාහරණයක් වශයෙන් එයාර් බස් A330 සහ A350 ගුවන් යානා මිලදී ගැනීමේ ගණුදෙනුව පෙන්වා දිය හැකිය. එයාර් බස් A350 - 900S ගුවන් යානාවන් එක දිගට පැය 17 ක් ගුවන් ගත වීමේ ධාරිතාවයක් සඳහා නිෂ්පාදනය කළ ඉහළ මිලක් සහිත ගුවන් යානාය. ශ්‍රී ලංකන්හි දීර්ඝතම අඛණ්ඩ ගුවන් ගමන පැය 11 කි. එවැනි ගුවන් සේවයක් එයාර් බස් A350 - 900S මිලදී ගන්නේ අහවල් කෙං ගෙඩියකටද? උපරිම කොමිස් මුදලක් කඩා ගැනීමේ අභිප්‍රාය හැරෙන්නට වෙනත් කිසිදු අරමුණක් එහි නොවීය. අනෙක් අතට මෙකී එයාර් බස් මිල දී ගෙන තිබුනේ වෙළෙඳ පොල මිලට වඩා සියයට 30 ක වැඩි මිලකට ය. එම තීරණය ගන්නා ලද අධ්‍යක්ෂ මණ්ඩල රැස්වීම පැවැත්වූයේ කථානායක නිල නිවසේ දීය. කථානායකයා චමල් රාජපක්ෂ ය. ඇමරිකානු ඩොලර් මිලියන ගණනක කොමිස් මුදල ඩැහැ ගත්තේ කව්ද යන්න පැවසීමට අටුවා ටීකා අවශ්‍ය නැත. මෙකී එයාර් බස් ගනු දෙනුවෙන් ඇමරිකානු ඩොලර් මිලියන 80 ක තැන්පතු මුදලක් දැනටමත් ගෙවා අවසන් ය.
ශ්‍රී ලංකන් ගුවන් සමාගම රාජපක්ෂ පවුලේ බූදලයක්ව පැවැති බව පෙන්වා දීමට නිත්‍යා සමරනායක උදාහරණය පමණක් ප්‍රමාණවත් ය.
ගුවන් සේවිකාවක් වන නිත්‍යා සමරනායක නාමල් රාජපක්ෂගේ එක් සුරතලියකි. මේ සුරතලිය තමා අසලම තබා ගැනීමේ අවශ්‍යතාවයට නාමල් ඇයව ශ්‍රී ලංකන් ගුවන් සේවයේ කටයුතු වලින් මුදවා ජනාධිපති ලේකම් කාර්යාලයට අනුයුක්ත කෙළේය. ඇය ජනාධිපති ලේකම් කාර්යාලයේ ප්‍රතිලාභ ලබා ගන්නා අතරේ ශ්‍රී ලංකන් සමාගමේ වැටුප්ද ලබා ගත්තා ය. ප්‍රවාහන වියදම් වශයෙන් මසකට රුපියල් 75000 ක දීමනාවක් ශ්‍රී ලංකන් සමාගමෙන් ඇය ලබා ගත්තා ය. ශ්‍රී ලංකන් කළමණාකාරිත්වය ප්‍රවාහන වියදම් සඳහා ආදාල කාලයේදී නාමල්ගේ සුරතලීට රුපියල් 2,853,934/04 ක් ගෙවා ඇත. එම මුදලට වඩා ඇය ප්‍රවාහන වියදම් සඳහා ලදුපත් ඉදිරිපත් කළ ඇතත් ඒවා ව්‍යාජ ලදුපත් බැවින් ඇතැම් ඒවා ප්‍රතික්ෂේප කර ඇත. සමස්ථයක් ලෙස ඇය ශ්‍රී ලංකන් සමාගමෙන් අයථා ලෙස ලබා ගෙන තිබෙන මුදල රුපියල් මිලියන 4.2 කි. මෙම වංචාව හෙළි වූ විට නිත්‍යා සමරනායකගේ කුමාරයා කියා සිටියේ රුපියල් මිලියන 4.2 ක් යනු සුළු මුදලක් බවයි. ඇත්ත වශයෙන්ම එම ප්‍රකාශය සත්‍යයකි. නාමල් රාජපක්ෂ එසේ ප්‍රකාශ කෙළේ පසුගිය වසර 10 තුල තමන් සොරා ගත් මහජන මුදල් ප්‍රමාණය සංසන්දනය කරමිනි. ‘වෙහෙර ගිල්ල එකාට අග්ගලාවත් කජ්ජක්ද?‘ යි කියූ සේ තම සුරතලිය සොරා කෑ රුපියල් මිලියන 4.2 සුළු මුදලකි.
ශ්‍රී ලංකන් ගුවන් සේවයේ රාජපක්ෂලාගේ රජ කෑම් ගැන උදාහරණ සිය ගණනක් ඉදිරිපත් කළ හැකි වුවද එයාර් බස් ගණුදෙනුව සහ නිත්‍යා සමරනායක සුරතලී සිද්ධීන් දෙක පමණක් ගෙන හැර දැක්වූයේ එහි ඇති සංඛේතාත්මක වටිනාකම හේතුවෙනි.
ජාත්‍යන්තර සම්මතයන්ට අනුව මූල්‍ය අපරාධයක් සිදුවූ ශ්‍රී ලංකන් ගුවන් සමාගමේ දූෂණ ගැන සෙවීමට යහපාලන රජය බලයට පැමිණි අවස්ථාවේදී විශේෂ පරීක්ෂණ කමිටුවක් පත් කෙළේය. එම කමිටුවට ද ඉහලම ගෙවීමක් කෙළේය. ජේ.සී.වැලිඅමුණ, යූ.එච්.පලිහක්කාර, බී.ඒ.ඩබ්.අබේවර්ධන සහ එම්. කේ. බණ්ඩාරගෙන් සමන්විත එම කමිටුව සති 6 ක් පුරා සිය විමර්ශන කටයුතු කළහ. ‘වැලිඅමුණ වාර්තාව‘ නමින් ප්‍රකට එම වාර්තාව 2015 මාර්තු 31 වෙනිදා රනිල් වික්‍රමසිංහ අගමැතිවරයාට බාර දුන්නේ ය. වැලිඅමුණ වාර්තාවේ එයාර් බස් ගණුදෙනුව මෙන්ම නිත්‍යා සමරනායක ගේ වංචාව ඇතුළු දූෂන සිය ගණනක් දක්වා ඇති අතර එම දූෂනයන්ට වගකිව යුතු නිශාන්ත වික්‍රමසිංහට සහ කපිල චන්ද්‍රසේනට විරුද්ධව අපරාධ නීතිය අනුව වහාම කටයුතු කරන ලෙස නිර්දේශ කර ඇත.
නමුත් ‘වැලිඅමුණ වාර්තාව‘ අගමැතිවරයාට බාර දී වසරකට වඩා වැඩි කාලයක් ගතව තිබුනද ශ්‍රී ලංකන් ගුවන් සේවයේ මූල්‍ය අපරාධයන්ට වගකිව යුතු කිසිවෙකුට එරෙහිව මේ වන තෙක් කිසිදු ක්‍රියාමාර්ගයක් ගෙන නැත. ඒ වෙනුවට යහපාලන ආණ්ඩුව ජනාධිපති ලේකම් කාර්යාලයේ සිට නැවත ශ්‍රී ලංකන් ගුවන් සේවයට නැවත පැමිණි නාමල්ගේ සුරතලියට උසස්වීමක් ලබා දුන්නේ ය. ඉදිරි මාස 3 තුලදී ආන්ඩුව පෙරලී තම කුමාරයා රජ වන බවට ඇය තැන තැන කට මැත දොඩවමින් සිටින්නී ය. යහපාලන ආණ්ඩුවේ නපුංසක භාවයට මෙය කදිම නිදසුනකි.
ශ්‍රී ලංකන් ගුවන් සේවයේ නව සභාපති අජිත් ඩයස් ය. ප්‍රධාන විධායක නිලධාරියා සුරේන් රත්වත්තේ ය. (චරිත රත්වත්තේ ගේ සොහොයුරා) අජිත් මෙන්ම සුරේන් රනිල් වික්‍රමසිංහ අගමැතිවරයාගේ රාජකීය විදුහලේ මිතුරන් වන අතර අගමැතිවරයාට ‘රනිල්‘ යයි ආමන්ත්‍රණය කළ හැකි මට්ටමේ පුද්ගලයෝ වෙති. වසර 2002 දී එජාපය බලය ලබා ගත් අවස්ථාවේදී ත් මෙම කණ්ඩායම ආණ්ඩුව තුල ඉතා බලවත් විය. අගමැතිවරයා සමග ඇති දැඩි පෞද්ගලික මිත්‍රත්වය නිසා මෙම පිරිස විෂය බාර ඇමැතිවරයා, ලේකම්වරයා හෝ අනෙකුත් නිලධාරීන තඹ පයිසෙකට ගණන් ගන්නේ නැත. මෙය යහපාලන ආණ්ඩුවේ සුපිරි කුලයයි. ශ්‍රී ලංකන් ගුවන් සේවා මෙහෙයැවීමට පැමිණ ඇත්තේ ලංකාවේ ව්‍යාපාරික ලෝකයේ පකීර්ලාගෙන් සමන්විත මෙම සුපිරි කුලයයි. එහෙත් පසුගිය වසරක කාලය පුරා මෙම පකීර්ලා සිදුකළ කෙං ගෙඩියක් නැත.
දැඩි මූල්‍ය අර්බුදයකට මුහුණ පා සිටින සමාගමකට නවක සේවකයන් බඳවා ගන්නේ නැත. එය සරල න්‍යායකි. එය අවබෝධ කර ගැනීමට ව්‍යාපාරික පකීර්ලා විය යුතු නැත. පණ අදිමින් සිටින ශ්‍රී ලංකන් එයාර් ගුවන් සේවය සඳහා නවක කළමනාකරණ පුහුණු නිලධාරී තනතුරු සඳහා මේ දිනවල සම්මුඛ පරීක්ෂණ පවත්වන්නේ මොන මගුලකටදැයි යන්න මේ පකීර්ලා පැහැදිලි කරන්නේ නම් මැනවි ය.
‘වැලිඅමුණ වාර්තාව‘ නිර්දේශ කර ඇති පරිදි පසුගිය වසර 6 ක කාලය පුරා ශ්‍රී ලංකන් ගුවන් සමාගමින් අයථා ලෙස මුදල් සොරා ගත් පුද්ගලයන්ගෙන් එම මුදල් නැවත අයකර ගත යුතුය. ‘වැලිඅමුණ වාර්තාව‘ බාර දී වසරක් ගත වුවද මෙම ව්‍යාපාරික පකීර්ලාට ශත පහක් නැවත අයකර ගැනීමට හැකි වී නැත. අවම වශයෙන් නාමල්ගේ සුරතලී වන නිත්‍යා සමරනායක අයථා ලෙස ලබා ගත් රුපියල් මිලියන 4.2 න් ශත පහක් වත් නැවත අයකර ගැනීමට හැකි වී නැත. පසුගිය වසරක කාලය පුරා මොවුන් ඇට බෝල ගැසුවාදැයි ප්‍රශ්න කිරීම අසාධාරණ නැත. වසරක කාලයක් පුරා මෙම අන්ත දූෂණ ඉදිරියේ දෑස් වසා ගෙන සිටින්නේ එම වංචා දූෂන යට ගැසීමේ දුෂ්ඨ අරමුණ හේතුවෙන් බවට සැකයක් නැත. ව්‍යාපාරික ක්ෂේත්‍රයේ මෙන්ම ආර්ථික කටයුතු පිළිබඳ පකීර්ලා සේ පෙනී සිටින මෙම සුපිරි කුලයට එදා චන්ද්‍රිකා කුමාරතුංග ජනාධිපතිනියට තිබූ ධෛර්ය හෝ නිර්භීත භාවයෙන් දශමයක් නොමැති ය. ඉක්මන් තීරණ ගැනීමේ හැකියාවක් ද නැත.
ශ්‍රී ලංකන් ගුවන් සේවය නැවත පෞද්ගලීකරණය කරනවා හැරෙන්නට වෙනත් විකල්පයක් නැත. එහෙත් රාජපක්ෂ රෙජීමය විසින් බංකොලොත් කළ ගුවන් සේවයක් මිලදී ගන්නේ කවරෙක්ද යන් ප්‍රශ්නයකි. පසුගිය කාලය පුරාම ශ්‍රී ලංකන් ගුවන් සේවය පවත්වාගෙන යෑම සඳහා සෑම වසරකම මහා භාණ්ඩාගාරය ඇමරිකානු ඩොලර් මිලියන 100 ක් පොම්ප කෙළේය. සෑම වසරකම මෙසේ පොම්ප කරන මුදල් අයත් වන්නේ රටේ පොදු මහජනතාවට ය. තව දුරටත් මෙකී බංකොලොත් ගුවන් සේවයට මහජන මුදල් පොම්ප කළ යුතු නැත. වර්තමාන ආර්ථික පකීර්ලා තවදුරටත් කල් මරන්නේ නැතිව ශ්‍රී ලංකන් ගුවන් සේවය ගැන වහාම තීරණයක් ගත යුතුය. නැවත ගොඩ ගත නොහැකි නම් එය ඈවර කර දමා පාඩුව විඳ ගැනීම දීර්ඝ කාලීනව ලාබ දායක ය.
වර්තමාන ලෝකයේ තම අභිමානය පිණිස ජාතික ගුවන් සේවා පවත්වාගෙන යනවා මිස එය අත්‍යාවශ්‍ය සාධකයක් නොවේ. අද අපට අවශ්‍යය ඇත්තේ ඉක්මන්, නිවැරදි නිර්භීත තීන්දු මිසක ප්‍රශ්න යට ගැසීමේ උපක්‍රම නොවේ. එහෙත් අවාසනාවකට මෙන් යහපාලන ආණ්ඩුව ශ්‍රී ලංකන් ගුවන් සේවයේ මෙන්ම අනෙකුත් ක්ෂේත්‍රවලද අනුගමනය කරමින් සිටින්නේ ප්‍රශ්න යට ගැසීමේ නපුංසක ක්‍රියා මාර්ගයයි
---------------------------
by (2016-04-18 20:59:10)
Read 172242 Times
Leave a Reply
3 discussion on this news
Any company with business sense ,when faced with dire financial situation would neither be recruiting new staff as well as extending retirement age of non productive and non/operational staff just because of the influence of a retired Political Head who is claimed to be the brainchild of Emirates Deal.
-- by ex UL staff on 2016-04-06
Superb article.What you written is exactly correct! I don't no to which direction our country is leading
-- by Dushan on 2016-04-06
Very Informative and revealing.Have we been swindled well and true by the so called "Yahapalakayas"?
-- by Gamini on 2016-04-08
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි