LEN - www.lankaenews.com | The innocent blood spilled on Easter Sunday has been smeared on the hands of four executive presidents. -Rasal Hewawasam

පාස්කු ඉරිදා ගලා ගිය අහිංසක රුධිරය විධායක ජනාධිපතිලා සිව්දෙනෙකු අතේ තැවරිලා..! රනිල්ට ප්‍රශ්න 10 ක්..!!

-පාස්කු ප්‍රහාරයට මාස 40 ක් පිරීම නිමිත්තෙන් රසල් හේවාවසම් හෙළිකරයි

(ලංකා ඊ නිව්ස් -2022.අගෝ.20, ප.ව.8.00) 2019 අප්‍රේල් 21 දා සමූහ ඝාතන පාස්කු ප්‍රහාරයේ ගලාගිය රුධිරය ශ්‍රී ලංකාවේ විධායක ජනාධිපතිලා සිව්දෙනෙකුගේ දෑතේ තැවරී ඇති බව "අලුත් ජනාධිපතිවරයකු" ලැබීමෙන් උද්දාමයට පත් වී සිටින ලාංකීය ජනතාවට අපි සිහි කැඳවා සිටිමු. ඇහැට ඇඟිල්ලෙන් ඇන මේ කාරණාව අප කියන්නේ මේ අමානුෂික ප්‍රහාරයට මාස 40ක් පිරෙන මේ වේදනාකාරී අවස්ථාවේ දී ය.

මේ, ඒ පිලිබඳව කිසිවෙකුට බැහැර කළ නොහැකි සාක්ෂි සහිත හෙලිදරව්වකි.

ලැජ්ජාවට කරුණ නම් රටේ පාලක තක්කඩි සමූහය පාස්කු සමූහ ඝාතනයට අදාලව යුක්තිය ඉටුකිරීම පැහැර හරිමින් එය වසා ගැනීම සඳහා ඒ ගැන ⁣විවිධ සුරංගනා කතා කිය කියා යෙහෙන් වැජඹීමයි. වින්දිත පවුල් තමන්ට අහිමි වූ ආදරණීයයන් වෙනු⁣වෙන් දුක් කදුළු සයුරක ගිලෙද්දී මේ තක්නකඩින්ගේ නින්දිත උත්සාහය වන්නේ කාලය නම් වැලිතලාවෙන් ඒ සමූහ ඝාතන මහා අපරාධය වසා දැමීම ය. වළලා දැමීම ය.

මිනිස්සුනේ ! බල ව්‍යාපෘතියක් වෙනුවෙන් ඝාතනය කරන ලද සහෝදර ජනතාව ගේ යුක්තිය වෙනුවෙන් නැගී හිටපල්ලා !

විධායක ජනාධිපතිලා හතර දෙනෙක් මේ අපරාධයට වගකිව යුතු ය...!

සහරාන්ලාගේ අන්තවාදය බිහිකරවීමට ආධාර සහ අනුබල දීම, එකී මහා අපරාධය ගැන දැනගෙනත් එය වැලක්වීමට පියවර නොගැනීම, දිගින් දිගටම විමර්ශනවලට බාධා කිරීම, සත්‍යය යටපත් කිරීමට කටයුතු කිරීම සහ තමන් දන්නා කරුණු හෙළිදරව් නොකර සිටීම මගින් මහමොලකරුවන්ට සදහටම සැඟවී ගැලවී සිටින්නට ඉඩ සලසා දීම රටේ සේනාධිනායකලා හෙවත් ඊනියා විධායක ජනාධිපතිලා සිව් දෙනාට එරෙහිව එල්ල වන චෝදනායි.

අපි මේ එකිනෙක ගනිමු..,

මහින්ද රාජපක්ෂ..

මේ මහා මිනිස් ඝාතනය ක්‍රියාත්මක කල අන්තවාදී සහරාන්ලාට සංවිධානය වීමට අවශ්‍ය සමාරම්භක පියවර තබන ලද්දේ 'පස්වන' ජනාධිපති මහින්ද රාජපක්ෂ පාලන සමයේ ය. එහි සංවිධාන ශක්තියට අමතරව මූල්‍ය සහ අනෙකුත් ආධාර අනුබලය ද ඇතුලත් පදනම එම කාලය තුළ දමනු ලැබිණි. එය මෙහෙයවීමේ යටි අරමුණ වී තිබුනේ ජාතිවාදය සහ ආගම්වාදය ඇවිලවීම ඔස්සේ දිගින් දිගටම රාජපක්ෂලා අත බලය ර‍ඳවා තබා ගැනීමයි. ජාතිවාදය සහ ආගම්වාදය ඇවිලවීම සහ ඒ ඔස්සේ ජනතාව බෙදීම තමන් අත බලය රඳවා ගැනීමේ එකම ක්‍රමය බව රාජපක්ෂලා අවබෝධ කරගෙන තිබිණි.

එවකට ආරක්ෂක ලේකම් ගෝඨාභය රාජපක්ෂ ගේ සට්ටැඹි බුද්ධි අංශ කන්ඩායමක් ද යොදා ගනිමින් සහරාන්ලාගේ අන්තවාදය රෝපණය කළ හැටි සහ පෝෂනය කළ හැටි අප මීට පෙර ගවේෂණාත්මකව වාර්තා කළෙමු.

මෛත්‍රීපාල සිරිසේන...

ඉන් පසුව, 2019.04.21 වන දා වන විට රටේ සේනාධිනායකයා වූ 'හයවන' ජනාධිපති මෛත්‍රිපාල සිරිසේන නොසෑහෙන්න මේ අහිංසක රුධිරයට වග කිව යුතු බව අපි වගකීමෙන් යළිත් කියා සිටිමු.

සියළුම ⁣බුද්ධි තොරතුරු ලැබී තිබියදී සහරාන්ලා සැලසුම් සහගතව එල්ල කළ අධම බියගුළු ප්‍රහාරය සිදුවීමට නිහඬ අනුබලය ලබාදුන්නේ සිරිසේන ය. ඔහු ඊට නිහඬව අනුබලය ලබා දීමේ අරමුණ ගෝඨාභයට බලයට ඒමට අවශ්‍ය පාර කපා දීම ය. සිරිසේන තවමත් හිටපු විධායක ජනාධිපතියෙකුට තරම් නොවන මට්ටමින් චේතිය රජුත් පරදවන ආකාරයේ බොරු ඇදබාමින් සිටියි. ප්‍රහාරය සම්බන්ධව ලැබුනු බරපතල සාක්ෂි නොසලකා මනුෂ්‍ය ජීවිත සමග සෙල්ලම් කළ සිරිසේන හදිසියේ සිංගප්පූරුවට ගියේ ය. එසේම එම සමූහ ඝාතනයෙන් පසුව කඩිනමින් රටට පැමිණීමට හැකියාව තිබියදීත් ඔහු නොපැමිණියේ ය. එවක අගමැතිවරයා කැඳවූ හදිසි ආරක්ෂක මණ්ඩල රැස්වීමට නොයන ලෙස ආරක්ෂක ප්‍රධානීන්ට උපදෙස් ද දුන්නේ ය. මේවාට හේතු විමර්ශනය නොකරම විමර්ශන යට ගස්වා තිබේ. ඔහු ගේ දුරකතනය වෙනත් අය සඳහා විවෘත නොවුවත් මේ කාලය තුළ ඔහු හා නිලන්ත ජයවර්ධන අතර දුරකථන ඇමතුම් රැසක් හුවමාරු වී තිබේ. ඔහුට එරෙහිව අපරාධ පරීක්ෂණයක් කළ යුතු අයකු ලෙස ඔහුගේ නම ජනාධිපති කොමිසමේ පවා සඳහන් ය. මේ තරම් අපරාධයකට වගකිව යුතු හිටපු සේනාධිනායකයා කිසිවක් නොදත්තා සේ දැන් සර්ව පූට්ටු ආණ්ඩු හැදීම ගැන දේශනා කරමින් සිටියි.

තමන් බලයෙන් පහ වීමෙන් පසුව හිටපු ජනාධිපති සිරිසේන වරින් වර ‘හත්වන’ ජනාධිපති ලෙස කටයුතු කළ ගෝඨාභය රාජපක්ෂට මේවා ගැන මතක් කරමින් අනතුරු අඟවා තිබේ. ගෝඨාභය බලය ලබාගැනීමට එකී පාස්කු අපරාධයට සම්බන්ධව සිටි ආකාරයත් ඔහුට ඒ අපරාධය සමග තිබූ සම්බන්ධතා ගැනත් තමන් දන්නා සියලුම සාක්ෂි හෙලිදරව් කරන බවට සිදුකළ තර්ජන ද ඒ අතර තිබේ. ඒවා එම විමර්ශන ⁣අතරමග නතර කරවීමට තරම් දරුණු විය.

ගෝඨාභය රාජපක්ෂ..

හත්වන ජනාධිපති ගෝඨාභය 2019 ජනාධිපතිවරණය ජය ගැනීම සඳහා රට ගිනි තැබුවේ "4/21 මතකද ?" යන සටන් පාඨයෙනි. (දැන් මතක ද?) එහෙත් ඔහු ඒ ගැන විමර්ශනය සඳහා කිසිවක් කළේ නැත. සිරිසේන විසින් පත් කරන ලද ජනාධිපති විමර්ශන කොමිෂන් සභාවේ වාර්තාව ගෝටා ජනතාවගෙන් සඟවා තැබුවේ ය. ප්‍රහාරය ගැන විමර්ශනය කරමින් සිටි ප්‍රධාන පෙලේ දක්ෂ රහස් පොලිස් නිලධාරීන් දඩයම් කළ අතර සෙසු නිලධාරීන් සී සී කඩ මාරු කර අවසානයේ CID ය කුප්‍රකට දේශබන්දු තෙන්නකෝන්ට භාර දුන්නේ ය.

රනිල් රාජපක්ෂ..

මේ වන විට පාස්කු සමූල ඝාතනයට අදාලව බෝලය පාස්කිරීම බාරගෙන ඇත්තේ 'අටවන' ජනාධිපති රනිල් රාජපක්ෂ ය.

තමන්ගේ පාලනයේ ආරම්භයත් සමග පාස්කු සමූල ඝාතනය සම්බන්ධව ජාත්‍යන්තර විමර්ශන සිදුකරන බවට ඔහු වහසි බස් දෙඩුවේය. ඔහු මෙසේ කීවේ කවුරුත් ඒ ගැන කතා කරන්නටත් පෙර ය. එයද බරපතල මට්ටමේ ඇස්බැන්දුමක් බව අපි වගකීමෙන් කියමු. ඔහු එසේ කීවේ තමන්ට එල්ලවන විරෝධය අවම කරගැනීමට ය. එසේම පාස්කු ප්‍රහාරය ගැන කතා කරන්නන් සන්සුන් කර නිහඬ කර තබා ගැනීමට ය.

රනිල්, රාජපක්ෂලාගේ අනුහසින් රාජපක්ෂ පවුලේ ආරක්ෂකයා ලෙස ඔවුන් ගේ ආශිර්වාදයෙන් හා අනුග්‍රහයෙන් ජනාධිපති ලෙස පත්වීමෙන් පසු දෙමසක් ගත වී ඇත. එකී කාලය තුල ජනාධිපති රනිල් මේ මහා අපරාධයට අදාලව යුක්තිය ඉටුකරවීමට අදාලව අබමල් රේණුවක තරම් දෙයක් හෝ කර නැත. ඔහු ඒ ගැන සතපහක උනන්දුවක් හෝ දක්වා නොමැත. ඔහු එසේ නොකරන බව ද මේ වන විට සක් සුදක් සේ පැහැදිලිය. මන්ද මහමොලකරුවන් විසින් ඔහු එම ධුරයට පත් කර ඇත්තේ තමන්ට එරෙහිව පියවර නොගන්නා බවට වූ පොරොන්දුව මත ය.

රනිල්ට අභියෝගයක්..! ප්‍රශ්න 10 ක්..

ඔහු ඒ ගැන උනන්දුවක් දක්වනවා නම්, පහත දැක්වෙන කරුණු ගැන අපි ඔහුට අභියෝග කරමු. ඒ අතර ජනතා ඔබගේ අවධානය අපි ඒ දෙසට යොමු කරමු.

01. 300 කට ආසන්න පිරිසකට මරු කැඳවමින් පාස්කු ඉරිදා සමූහ ඝාතනය සිදුවන විට රටේ අගමැති රනිල්ය. තමන්ට ජනාධිපති සිරිසේන ආරක්ෂක කවුන්සිලය⁣ට ආරාධනා නොකළ බවත් ඒ නිසා තමන් කිසිවක් නොදැන සිටි බවත් එදා අගමැති ලෙස රනිල් ඇඟ බේරා ගැනීමට කීවේය. එහෙත් දැන් ජනාධිපති රනිල් ය. ඉතින් තමන් නිර්දෝෂී නම් ජනාධිපති රනිල් මෙම සමූහ ඝාතනය පිලිබඳව විධිමත් විමර්ශනයකට තවදුරටත් කල් මරන්නේ ඇයි?

02. පාස්කු අපරාධය පිලිබඳව පත්කළ ජනාධිපති කොමිසමට රනිල් රහසිගතව දුන් සාක්ශි හෙලිදරව් කරමින් ගැඹුරු සහ විධිමත් විමර්ශනයක් නොකරන්නේ ඇයි?
(තමන් අගමැති ධූරය දරනලද කාල සීමාවේදී බුද්ධි අංශ නියෝජනය කරන ලද කිහිපදෙනෙකුගේ සැක කටයුතු හැසිරීම් සම්බන්ධ හෙලිදරව් වු කරුණු ගැන ඔහු අවංක නම් විමර්ශන ආරම්භ කළ හැකිය. )

03. සහරාන්ලා සහ ගෝඨාභය ගැති බුද්ධි අංශ අතර තිබූ සබැඳියාවන් ගැන රනිල් හොඳින් දනියි. එසේ නම් පරීක්ෂණ මෙහෙයවන්නට පමා ඇයි ?

04. ජනාධිපති කොමිසමේ හෙළිදරව් නොකරන ලද වාර්තා සියල්ල ජනතාව ගේ දැන ගැනීම පිණිස ප්‍රසිද්ධ නොකරන්නේ මන්ද? මේවායින් හෙළිදරව් වන හිටපු නීතිපති ප්‍රකාශ කළ “මහා කුමන්ත්‍රණය” ගැන විමර්ශනය නොකරන්නේ මන්ද? තමන් කී ලෙස එංගලන්තයේ ස්කොට්ලන්ඩ්යාඩ් විමර්ශකයින් ගෙන්වා හෝ මෙම අපරාධය හෙලිදරව් කිරීමට සූදානම් කියා සඳහන් කළ ද මෙහි සඳහන් බරපතල කාරනා සම්බන්ධව නිහඬ ඇයි? ⁣ඒ පිලිබඳව නොසලකා හැර තිබෙන්නේ කවුරුන් රැවටීමට ද?

05. යුක්තිය පිලිබඳව අරගල කරන සියළුම දෙනාගේම බරපතල සැකයට බඳුන්ව සිටින, ගෝඨාභයවාදී චරිතයක් වන, මේජර් ජෙනරාල් සුරේශ් සලේ තවමත් රාජ්‍ය බුද්ධි අධ්‍යක්ෂ තනතුර දරන්නේ කෙසේද? ඔහුව එතැනින් ඉවත් නොකරන්නේ කාගේ උවමනාවට ද? කවර රහසක් රකින්නට ද?

06. පාස්කු අපරාධයේ විමර්ශන යටගැසීමේ අරමුණින් සාවද්‍ය තොරතුරු සමාජගත කරවීම සඳහා අවස්ථා රාශියකදී නොයෙක් විකාර කතා කියූ, විවිධ අසාර්ථක ව්‍යාපෘති දියත් කළ කමල් ගුණරත්න තවදුරටත් ආරක්ෂක අමාත්‍යංශයේ ලේකම් තනතුර දරන්නේ කෙසේද? ඔහුව ඉවත් නොකරන්නේ මන්ද?

07. පාස්කු අපරාධය යටගැසීමට අදාලව නොයෙක් විහිලු කතා කියන ලද පොලිස්පති තනතුර හෑල්ලු කළ සී.ඩී. විකටරත්න තවදුරටත් පොලිස්පති තනතුර දරන්නේ කෙසේද?

08. ජනාධිපති සිරිසේන යටතේ රාජ්‍ය බුද්ධි අධ්‍යක්ෂ තනතුර මන්ද බුද්ධිකයෙකු ලෙස දරමින් මහා මිනිස් ඝාතනයක් වීමට ඉඩ හැරියා වූ ද ජනාධිපති කොමිසමෙන් නම් කරනු ලැබ ඇත්තා වූ ද නිලන්ත ජයවර්ධනට අවම වශයෙන් රාජකාරී පැහැර හැරීම සම්බන්ධයෙන් හෝ බරපතල අපරාධ චෝදනා එල්ලකරමින් හෝ විමර්ශන සිදු නොකරන්නේ ඇයි? ඔහු ගේ අස්පර්ශනීය භාවයට (Untouchability) හේතුව කවු ද? කුමක්ද? ඔහු දන්නා රහස කුමක් ද? ඔහු ආරක්ෂා කිරීමට රනිල් රාජපක්ෂ බැඳී සිටින්නේ කවර හේතුවක් නිසා ද?

09. පොලිස් නිල ඇඳුම පාදඩකරනයට ලක් කළ කුප්‍රකට පොලිස් නිලධාරී දේශබන්දු තෙන්නකෝන් පාස්කු මහා අපරාධය දැනසිටි තවත් අපරාධකාරයෙකි. ඔහු සම්බන්ධයෙන් ද ජනාධිපති කොමිසම කරුණු සඳහන් කර තිබේ. ඔහුට දේශපාලන රැකවරණ සලසන්නේ ඇයි? මහින්ද, සිරිසේන සහ ගෝටා සමයේ එම කුප්‍රකට නායකයන් ගේ සුරතලා වෙමින් රටේ පොලිසියේ කීර්තිනාමය විනාශ කළ, පාස්කු ප්‍රහාරය ඉතා හොඳින් දැන සිටි මේ නිලධාරියා රනිල් රාජපක්ෂ ගේ විශ්වාසය දිනා සිටින්නේ මන්ද? (ඔහු ද තමන් දන්නා දේ හෙලිදරව් කරන බවට තර්ජනය කළ අයෙකි.)

10. තමන්ද රහසිගතව සාක්ෂි ලබාදුන් පාස්කු ප්‍රහාරය සම්බන්ධ ජනාධිපති කොමිසමේ අවසන් වාර්තාව විකෘති කරවීම, සම්පුර්ණ වාර්තාව පාර්ලිමේන්තුවට නිසිපරිදි ලබා නොදීමට හේතු පිලිබඳව සහ ඒ සම්බන්ධයෙන් නීතිපති දෙපාර්තමේන්තුවට බලපෑම් කරවීම සම්බන්ධව රනිල් රාජපක්ෂ ගේ ස්ථාවරය කුමක්ද? නිහඬ ඇයි?

අරගලයේ නව රැල්ලක් ආරම්භ කරමු..

තුන්සියකට පමන ජීවිත අහිමි කළ පන්සියයක් පමණ සදාකාලික ආබාධිතයන් කළ 04/21 ප්‍රහාරයට (මතක ද?) මාස 40 යි. දැන් අවුරුදු 4 කට ආසන්නයි.

යුක්තිය ඉටු නොවීම තුළ ඇති යටිපෙළ කතාව නම් රටේ විධායක ජඩාධිපතිලා සිව්දෙනෙකුගේ දෑත්වල නිරායුධ අහිංසක මිනිසුන් ගේ ලේ තැවරී ඇති බව නොවේද?

ඉතින් අපි තවත් යුක්තිය ඉල්ලා ඔවුන් ඉදිරියේ පින්සෙන්ඩු වෙමු ද?
"ඔහේ මොකුත් වෙන්නේ නැහැ" කියා දෑත් දෙපා හකුලා උකටලීව සිටිමු ද?
නැති නම්, අපෙන් අහිමි කරන ලද දයාබර සහෝදර සහෝදරියන් වෙනුවෙන් අරගලයේ නව රැල්ලක් ආරම්භ කරමු ද?

මාස 40ක් ගත වන මේ මොහොතේ මේ ප්‍රශ්න කිහිපය වෙතත් අවධානය යොමු කරමු:

බල ව්‍යාපෘතියක් අරභයා ඝාතනය කරන ලද මේ අහිංසකයන් වෙනුවෙන් හදවත හඬා වැටෙන්නේ මැල්කම් රන්ජිත් කාදිනල් හිමිපාණන් වහන්සේ ගේ පමණ ද? අදීනව කට හඬ අවදි වන්නේ උන්වහන්සේ ගේ පමණ ද? කඳුළු ගලන්නේ උන්වහන්සේට පමණක් ද? සෙසු ගිහියන් සහ පූජක වරුන් පාරට බහින්නේ විදුලිය, ගෑස් සහ සිය සුඛෝපබෝගී වාහන වලට ඉන්ධන නැති වූ විට සහ ජනතාවට අත මිට හිඟ වී සිය එදිනෙදා බත් පතට තර්ජන එල්ල වූ විට පමණද? යුක්තිය ඉල්ලා මේ වින්දිතයන් නගන වේදනාවේ හඬට ඔබ අවදි නොවන්නේ ඇයි ?

තවත් රහසක්..

අපි ඔබට මෙසේ කියමු. මහමොලකරුවන් විසින් රනිල් රාජපක්ෂ ජනාධිපති ධුරයට පත් කරන ලද්දේ පාස්කු ප්‍රහාරයේ විමර්ශන මරා දමා සදහට ම වල ලා දැමීම සඳහා ය.

තවත් එක් රහසක් අපි ඔබට අනාවරණය කරමු. පාස්කු ප්‍රහාරය සම්බන්දයෙන් හෝ ජන මතයකින් තොර සිය ජනාධිපති ධුරය ගැන හෝ කාදිනල් හිමියන් හඬ නගන්නේ නම්, උන්වහන්සේට එරෙහි වී, උන්වහන්සේ නින්දාවට පත් කිරීම සඳහා දැඩි ලෙස හඬ නැගීමේ කුමන්ත්‍රණයක් රනිල් රාජපක්ෂ විසින් සූදානම් කර තිබේ. ඔහු ඒ සඳහා යොදා ගන්නට යන්නේ ඥානසාර වැනි රටම දන්නා තක්කඩින් නොව කිසියම් පිළිගැනීමක් සහිත දේශපාලන කහ සිවුරු කාරයන් පිරිසකි. ඔවුන්ට සහය වීම සඳහා තනතුරු ලෝබයෙන් පසුවන වියතුන් කියා ගන්නා යුඇන්පී වහලුන් පිරිසක් ද සමාජ මාධ්‍ය කොමෙන්ටු දැමීම සඳහා කුලී ලියන්නන් ද යොදා ගැනීමට නියමිත ය.

මේ නිසා අපි යලිත් මෙසේ අවධාරණය කරමු:

සමස්ත රටම එක්ව රනිල් රාජපක්ෂට දැඩි බලපෑමක් නොකරන්නේ නම් අවුරුදු හතර පිරෙන විට ඔහු පාස්කු ප්‍රහාරයේ අබිරහස වල දැමීමේ කාර්යය අවසන් කර තමන්ට "භාර දුන් ‘බබා’ වීදුරු පාලමෙන් එගොඩ කර" තිබෙන්නට ද පුළුවන.