LEN - www.lankaenews.com | It is revealed that the black hatters are the green hatters..! All-party fighters are revealed..! The conspiracy to ban the Peratugami Party is also revealed..!

කලු තොප්පිකාරයෝ කොළ තොප්පිකාරයෝ බව හෙළිවේ..! සර්ව පාක්ෂික අරගලකරුවෝද හෙළිවේ..! පෙරටුගාමීන් තහනම් කිරීමේ කුමන්ත්‍රණයත් හෙළිවේ..!

-ස්නයිපර් ලියයි

(ලංකා ඊ නිව්ස් -2022.අගෝ.07, ප.ව.9.05) තමන් අරගල භූමියෙන් ඉවත් වන බවට ප්‍රසිද්ධ ප්‍රකාශයක් කළ ඊනියා කලු තොප්පි කරුවන්ගේ කණ්ඩායම, අරගල බිමෙහි කිසි දිනෙක නොසිටි බව ලංකා ඊ නිව්ස් වගකීමෙන් යුතුව ප්‍රකාශ කරයි. අරගල බිමෙහි නොසිට, තමන් එම බිමෙන් ඉවත් වන බවට ප්‍රකාශයක් කිරීමෙන්ම මෙම තොප්පිකරුවන්ගේ තොප්පිය හැලී නියම මුහුණුවර එළියට පැන තිබේ. පෙනෙන විදිහට මෙම රනිල්ගේ බිල්ලන් අරගලයට සහාය දක්වන ලද්දේ සිය කූඨ අරමුණ සාක්ෂාත් කර ගැනීම පිනිසය.

අරගලය ආරම්භ වීමට මාස ගණනාවකට පෙර, දැන් රනිල් රාජපක්ෂ විසින් ජනරාල්වරයකු බවට පත් කර ඇති සිවිල් නායකයකු, රනිල් රාජපක්ෂ ඉක්මනින් අගමැති බවට පත්වන බවත්, ඉන් අනතුරුව එජාපයේ ප්‍රබලයින් ගණනාවකටම ඉහළ තනතුරු ලැබෙන බවත් වෙනත් දේශපාලන පක්ෂ නායකයකුට ප්‍රකාශ කර තිබුණි. අප සතුව එම නම් ගම් සියල්ල තිබේ.

ගෝටා රනිල්ගෙන් ගත් පොරොන්දුව..

රනිල් රාජපක්ෂ අගමැති කිරීම ගෝඨාභය රාජපක්ෂගේ බලාපොරොත්තුව විය. මහින්ද රාජපක්ෂට වඩා රනිල් රාජපක්ෂ තමන්ට ප්‍රයෝජනවත් බව ගෝටා, කමල් ගුණේට කියා තිබුණි. අගමැතිබවට රනිල් රාජපක්ෂ පත් කරන ලද්දේ කමල් ගුණේ සහ සුරේශ් සලේ ඉවත් නොකරන බවට ගත් පොරොන්දුවකින් පසුය.

අරගලයේ මුල් අදියරෙහිදී රනිල් රාජපක්ෂගේ තවත් හෙංචයියකු වන ආශු මාරසිංහ ද අරගල බිමෙහි සැරි සැරුවේය. ඔහුට රනිල් රාජපක්ෂගේ අරමුදලින් කුඩාරම් පවා ලැබී තිබුණි.

සෞඛ්‍ය වෘත්තීයවේදීන්ගේ විද්වත් සංගමයේ සභාපති රවි කුමුදේශ් වීඩියෝ සාකච්ජාවකදී ප්‍රකාශ කළ පරිදි මැයි 28 වන දින පැවැති විරෝධතා පා ගමනට රනිල් රාජපක්ෂ ද සහාය දී තිබේ.

වරෙන් ප්‍රනාන්දු යැයි විරුදාවලී ලත් හරීන් ප්‍රනාන්දු තමන් රනිල් රාජපක්ෂ සමඟ එක් වූයේ ගෝටා එළවීමේ ප්ලෑනකට අනුව බව ප්‍රකාශ කරන ලද සටහන් ද අප සතුව තිබේ.

විවිධ තොප්පිකරුවන් මෙන්ම සර්ව පාක්ෂික අරගලකරුවන් නමින්ද පෙනී සිටියේ රනිල් රාජපක්ෂ විසින් එවන ලද බිල්ලන්ය. අරගල බිමෙහි කිසිදු සාධනීය කටයුත්තක නොයෙදුනු මෙම පිරිස් කරන ලද්දේ පුවත්පත් ප්‍රකාශ නිකුත් කිරීමත් රනිල් රාජපක්ෂ සමඟ සතුටු සාමිචී සඳහා සහභාගිවීමත්ය.

පොදු සමා ප්‍රෝඩා කතාව කරළියට ආ හැටි..

මේ තාක් අරගලයේ සමගිය වෙනුවෙන් අප මෙම තොරතුරු හෙලිදරව් නොකළ නමුත් දැන් මෙම තොප්පි සහ ඊනියා සර්ව-රනිල් පාක්ෂික පිරිස් අරගලය පාවා දී අරගලකරුවන් නඩු නැතිවම වරද කරුවන් කිරීමට දරණ දුෂ්ඨ උත්සාහය හෙළිදරව් කළ යුතුව තිබේ.

අරගල කරුවන්, නඩු නො විමසාම වරදකරුවන් කිරීමේ කූට සැලැස්මක් වන පොදු සමා ප්‍රෝඩා කතාව ගෙන ආවේද මෙම කණ්ඩායම විසිනි. ඉන් පසු තවත් රනිල් රාජපක්ෂගේ නව ලිබරල් කුඩා කණ්ඩායම් දෙකක් ද විවිධ නම් පටබැඳ ගෙන මෙම පොදු සමා ප්‍රෝඩාව ජනගත කරන්නට වලිකමින් සිටී.

කලු තොප්පි විමුක්ති සහ සර්ව පාක්ෂික අරගලකාරයෝ කව්ද?

මෙම තොප්පි කණ්ඩායමේ ප්‍රධානියා වූ විමුක්ති දුෂ්‍යන්ත රනිල් රාජපක්ෂගේ “කොළ ලේ” නම් කණ්ඩායමේ ප්‍රධානියකුව සිටි අයෙකු බවට ජායාරූපමය සාක්ෂි ලංකා ඊ නිව්ස් සතුව තිබේ. (මේ සමග ඇත) ඔහු රනිල් රාජපක්ෂගේ සමීපතමයකුව සිට තිබේ.

කලු තොප්පිකරුවන් යැයි කියා ගත් මෙම කුඩා කණ්ඩායම ඇත්ත වශයෙන්ම නම් 'කොළ තොප්පි' කණ්ඩායමකි. මෙහි ප්‍රධානියා අරගලයට සම්බන්ධ බව කියා දේශපාලන රැකවරණ පැතීමට කළ උත්සාහයක් පිලිබඳව ද දැන ගන්නට තිබේ.

'සර්ව පාක්ෂික අරගලකරුවෝ' නමින් පෙනී සිටින්නේ ද විවිධ පක්ෂ වලට අයත් පිරිසක් නොවේ. රතුපස්වල වෙඩි තැබීමෙන් පසු, විරෝධකරුවන්ම වෙඩි තබා ගත් බවට ලියූ රිවිර මාධ්‍යකරුවකු සහ ප්‍රසිද්ධියේම පොලිසියට පක්ෂ වාර්තා ලියූ දිවයින මාධ්‍යකරුවකු මෙම ඊනියා සාර්ව පාක්ෂික කණ්ඩායමේ ප්‍රධානීහු වෙති.

අරගලයේ ඇත්ත නායකයෝ කැලෑ වදිති..

අරගලයේ නායකයන් යැයි කියා ගන්නා ඊනියා උන් මෙලෙස මැදමූලන වැසිකිලි හෝදන්නා රනිල් රාජපක්ෂගේ ඇම්බැට්ටයන් වෙද්දී අරගලයේ සත්‍ය නායකයන් මේ වන විට ආරක්ෂාව පතා වන වැදී සිටිති. ඔවුන්ට එල්ල වී ඇති දැවැන්ත මර්දනය හමුවේ නිකරුනේ සිරබත් කෑමෙන් මිදීම සඳහා මෙලෙස වන වැදී සිටින තරුණයන් අතර මේ රටේ සැබෑ සිස්ටම් චේන්ජ් එකක් වෙනුවෙන් පෙරට ආ උගත් බුද්ධිමත් ඉංජිනේරුවන්, අයිටී වැඩ්ඩන්, කලාකරුවන් ආදී වෘත්තීයවේදීන් රැසක් සිටිති. සමහරුන්ට ඉතා ලෙහෙසියෙන් විදේශගත වී රැකියාවක් සොයා ගත හැකි වුව ද ඔවුන් තවමත් මේ රටේ සැබෑ 'සිස්ටම් චේන්ජ්' එකක් ගැන බලාපොරොත්තුවත් ඒ සඳහා ඔවුන්ගේ දායක්තවයත් අත්හැර දමා නැත. සැබෑ වීරයෝ ඔවුන් ය. (ඔවුන් ලංකා ඊ නිව්ස් සමග සම්බන්ධතා පවත්වති; අපි ඔවුන් අත නොහරින්නෙමු) ඒ නිසා රනිල් රාජපක්ෂ මේ ගෙන යන මර්දනය වහා අත්හැර දැමිය යුතුය. නැතිනම් රනිල් රාජපක්ෂට ගෙවන්නට වෙන 'වන්දිය' විශාල බවද සටහන් කර තබමු.

ගෝටා එළවා ජනාධිපතිකම ගන්න රනිල් ගැහූ ගේම්..

මෙරට බිහි වූ ඉතාම දක්ෂ ගුණ්ඩු සහ කෛයිරාටික දේශපාලනඥයා විය හැකි රනිල් රාජපක්ෂ, තරුණයන්ගේ සැබෑ අරගලය දඩමීමා කරගෙන එක අතකින් මහින්ද පලවා හැර අගමැතිකම ලබා ගැනීමටත් ඉන් පසු ගෝටා පලවා හැර ජනාධිපතිකම ලබා ගැනීමටත් සැළසුම් කළ බව පෙනී යයි. ඔහු අගමැතිකම ලබාගෙන 'ඊලඟ සති දෙක අමාරුම කාලයයි', 'ඊලඟ සති දෙක තවත් අමාරුම කාලයයි' කියමින් ජනතාව බියපත් කළේ ද ගෝටා එළැවීමට බව දැන් තහවුරු ය. මන්ද යත් ඒ කී සති දෙකේ කාල දැන් පසුවී ඇති අතර ඒවා එතරම් අමාරුම වූයේ නැත. රනිල් ජනාධිපති වී දැන් ඊටත් වඩා අමාරු වී තිබිය දී නමුත් රනිල් රාජපක්ෂ සහ වන්දිභට්ට රැල කියන්නේ 'දැන් නියමයි, දැන් නියමයි' කියා ය.

පෙරටුගාමීන් තහනම් කිරීමේ කුමන්ත්‍රණය සහ ඔත්තුකාරයා..

මේ අතර පෙරටුගාමීන් සමග සිටියදී රුපියල් ලක්ෂ 60 ක වාහන වංචාවක් හේතුවෙන් එම පක්ෂයෙන් එළවා දැමූ හිටපු පළාත් සභා මන්ත්‍රීවරයෙකු ද රනිල් රාජපක්ෂ මර්දන ජුන්ටාවේ ඔත්තු කරුවෙකු වී සිටී. ඔහු පෙරටුගාමී ක්‍රියාධරයන් 14 දෙනෙකුගේ නම් ලැයිස්තුවක් කමල්ගුණේ සහ සලේගේ මර්දන ඒකකයට ලබා දී තිබේ. රනිල් රාජපක්ෂ වලිකන්නේ කුමන හෝ 'ත්‍රස්තවාදී' කතාවක් ජනගත කර පෙරටුගාමී පක්ෂය තහනම් කිරීමට ය. රනිල් රාජපක්ෂට ලැබී ඇති අභ්‍යන්තර වාර්තා අනුව පෙරටුගාමීන්ට මුළු රටේම ඇත්තේ තිස් දහසකට අඩු සාමාජික සංඛ්‍යාවකි. එම ගණන මර්දනය කළ හැකි ගණනක් බවත් ඔවුන්ට 'ත්‍රස්තවාදී' ලේබල් ගසා මර්දනය කරමින් ආණ්ඩු විරෝධී සමස්ත ජනතාව බියපත් කර සී සී කඩ කඩා දැමිය හැකි වෙතැයි ඔවුන්ගේ නිගමනය ය.

පෙරටුගාමී පක්ෂය තහනම් කරනවාට සමහර විට ජවිපෙද හිත යටින් කැමැත්තක් දක්වනු ඇතැයි ද නොනිල සහායක් දක්වනු ඇතැයි ද රනිල්, කමල්ගුණේ, සලේ මර්දකයන්ගේ තක්සේරුවයි. ඔවුන් ඒ නිගමනයට පැමිණ ඇත්තේ 88-89 කාලයේ ජවිපෙ මර්දනයේ දී එවක තිබූ වාමාංශික පක්ෂ ඊට සහාය දැක්වූ ආකාරයයි. එකල රනිල්ලාගේ යූඇන්පිය ජවිපෙ දඩයම් කිරීමට වමේ පක්ෂ වලට ආයුධ පවා දුන්නේ ය. මෙකල පෙරටුගාමීන් මර්දනයට ජවිපෙ සහාය ලබා ගැනීම සඳහා පෙරටුගාමීන් කළා සේ ඇඟවෙන ආකාරයේ ප්‍රහාරයන් ජවිපෙ ඉලක්ක කර නිර්මාණය කිරීමට ද පුළුවන. මන්ද යත් පෙරටුගාමීන්ගෙන් වෙන්වූ අයද ඔත්තුකාරයන් වී මර්දකයන් සමග එක්ව සිටින නිසා ය. ගෝටාට ඔටුන්න ලබා දීමට පාස්කු බෝම්බ පිපිරැවූ උන්ට මේවා කජු කනවා වැනිය.

විකට අයිවන් ද ටෙරිබල් සහ කේවට්ටයෝ..

රනිල් රාජපක්ෂගේ කේවට්ටයකු දැන් අයිටීඑන් රූපවාහිනිය මෙහෙයවන අතර යහපාලන සමයේ රනිල්ගේ කේවට්ටයින් වූ කිහිප දෙනෙකුද අළු ගසා දමා නැගී සිටින්නට උත්සාහ කරති.

පෙනෙන අන්දමට අලුත්ම කේවට්ටයා වී ඇත්තේ ශ්‍රාස්ත්‍රකරුවන් පරයා භයානක අනාවැකි කියන්නකු වන විකට අයිවන් ද ටෙරිබල්ය. විකට අයිවන්ද ටෙරිබල් මෙරට පත්වූ සැම ජනාධිපතිවරයෙකුටම ස්තෝත්‍ර ගායනා කිරීමෙන් ජීවිකාව සරි කරගත් අදිමිටුවෙකි. ඒ බවට සාක්ෂි අවශ්‍ය නම් ඔහුගේම රාවය පුවත් පතෙහි පසුකාලීන පත් වූ කතුවරුන් දෙදෙනා ගෙන් අසා දැන ගත හැකිය.

ජවිපෙ- රාජ්‍ය බිහිසුණු සමයෙහි බටලන්ද වධකාගාරය නිරීක්ෂනය කරමින් සිටි රනිල් රාජපක්ෂ, බිය ගන්වා ප්‍රා සංවිධනයේ ධර්මසිරි ඇතුළු පිරිස තමන්ට අවශ්‍ය සියලු දේ රනිල්ගෙන් ලබා ගත් පරිදි අද විකට අයිවන් ද ටෙරිබල් ද රනිල් රාජපක්ෂ බිය ගන්වමින් චූන් ගන්නා බවට සැක නැත.

තොප්පිකරුවන් සහ ඊනියා සර්ව පාක්ෂික අරගලකරුවන් දැන් විකට අයිවන් ද ටෙරිබල්ගේ ගෝල බාලයින් වීමට සුදුසුකම් ලබා තිබෙන බව පමණක් දැනට ලියා තබමු.

ඇන්ජීඕ දෙපිට කාට්ටුවන් ගැන නවතම තොරතුරු ඊළඟ ලිපියෙනි.