-LeN අභ්‍යන්තර තොරතුරු සේවයේ 'සොල්දාදු උන්නැහේ' හෙළිකරයි
(ලංකා ඊ නිව්ස් -2022.ජුලි.18, ප.ව.11.50) අරගලකරුවන් හෙවත් පීඩාවන් රැසකට පත් මෙරට ජනතාව උපරිම බලය හෙවත් වෙඩි තබා හෝ මර්දනය කිරීම සඳහා වැ.බ.ජනාධිපති රනිල් රාජපක්ෂ විසින් උතුරේ සිටින හමුදාවේ විශාල පිරිසක් හෙට (19) කොළඹ ඇතුළු දකුණට කැඳවා තිබේ.
අස්ගිරියේ අනුනායකයා හිට්ලර් කෙනෙකු වී හෝ රට හදන්න යැයි ගෝටාට අනුශාසනා කෙළේ ය. ඒ අනුශාසනාව ඇසු හැට නව ලක්ෂයක් බයියෝ පොහොට්ටුවට ඡන්දය දී ගෝටා ජනාධිපති කෙළෝ ය. ඉන්පසු මට රට හදන්න නම් තුනෙන් දෙකක බලයක් අවශ්‍ය යැයි ගෝටා කී විට එකී බයියෝ තුනෙන් දෙකක බලයක් සහිත පාර්ලිමේන්තුවක් ද ගෝටා ට දුන්නෝ ය. එසේ ආ ගෝටා ජනාධිපති ද වී තුනෙන් දෙකේ බලයද විසි වැනි සංශෝධනයෙන් ලැබුණු බලය ද අතට ගත් නමුත් ආරක්ෂක ලේකම් කාලේ රතුපස්වල දී, කටුනායක දී කළාක් මෙන් හමුදාව ලවා ජනතාවට වෙඩි තැබීමට නියෝග දුන්නේ නැත. එදා ජනාධිපති මන්දිරය වැටලූ අවස්ථාවේ දී ද 'ජනතාවට වෙඩි තබන්න එපා මං පලා යන්නම්' කියා පැනලා ගියේ ය.
හැට නම ලක්ෂයක් ද තුනෙන් දෙක ද තිබූ ඒකා එසේ කරද්දී ඒ කිසිවක් නැති අඩුම ගණනේ ජනතා කැමැත්තෙන් මන්ත්‍රී කෙනෙක්වත් වීමට නොහැකි වූ රනිල් රාජපක්ෂ වැඩ බලන ජනාධිපති වීමෙන් පසු හමුදාව යොදවා ජනතාව මර්දනය කිරීම ආරම්භ කර ඇත. ඔහු පළමුවෙන්ම පැය 24 ක් යාමට මත්තෙන් කෙළේ ජනතාවට වෙඩි නොතැබූ බ්‍රිගේඩියර් අනිල් සෝමවීර සහ ලුතිනන් කර්නල් පී.එච්.ජී.පී ගුණවර්ධන රාජකාරියෙන් ඉවත් කිරීමය. ඒ ගැන ප්‍රශ්න කළ යුද ලේකම් මේජර් ජෙනරාල් චන්දන වික්‍රමසිංහ ද තනතුරෙන් ඉවත් කළේ ය. 'මගේ නියෝග ක්‍රියාත්මක නොකළොත් වෙන දේ බලා ගනිං' කියා එසේ හමුදාව බය කරගත් රනිල් දැන් හෙට(19) කරන්න යන්නේ තවත් බිහිසුණු මර්දනයකි. පෙට්‍රල් ඉල්ලා, ගෑස් ඉල්ලා, බෙහෙත් ඉල්ලා, සිස්ටම් වෙනසක් ඉල්ලා පාරට බසින අතේ ගල් කැටයක් වත් නැති ජනයා දැන් රනිල්ට 'ෆැසිස්ට්වාදීන්ය'. මේකා වැඩ බලන ජනාධිපති හෝ වුනේ ද ඒ ජනයාගේ අරගලය නිසා බව මේ තක්කඩියාට මතකයක් නැත. සාමාන්‍ය තැනක ඉන්න හිටින්නට නොහැකිව අකුරේගොඩ යුද හමුදා මූලස්ථානයට වී ජනාධිපති ධූරයේ වැඩ බලන මේ වියරු මිනිසා කරන්නට තටමන කුමන්ත්‍රණය ජනතාවට හෙළි කිරීම ලංකා ඊ නිව්ස් හි වගකීම නිසා මෙම සටහන තබමු.
ගෝටා රටින් යෑමට පෙර රනිල්ට දී ඇති විශේෂ උපදේශයක් නම් කමල් ගුණරත්න ආරක්ෂක ලේකම් ලෙස විශ්වාසවන්ත බවත් ඔබ දෙන නියෝග ඔහු අකුරට පිළිපදිනු ඇති බවත් කමල් ගුණරත්න සමග දිගටම වැඩ කරගෙන යන ලෙසත් ය.
ඒ අනුව දැන් රනිල් තම වියරු නියෝග කමල් ගුණේට ලබා දෙන අතර කමල් ගුනේ සිය විශ්වාසවන්තයා ලෙස හමුදාපති තනතුරට පත් කර ගත් විකුම් ලියනගේ හරහා එම වියරු නියෝග ක්‍රියාත්මක කිරීමට යයි.
20 වැනිදා ජනතාව පාර්ලිමේන්තුව වටලාවි හෝ කොළඹ දැවැන්ත විරෝධතා ක්‍රියාත්මක කරාවි කියා බිය වී සිටින රනිල් රාජපක්ෂ උතුරේ වැඩිපුර සිටින සියළු අතිරේක බල ඇණි කොළඹ කැඳවන ලෙස නියෝග කර ඇත. ඔවුන් 19 වැනිදා වන විට කොළඹ ස්ථාන ගතවිය යුතු බවද දන්වා තිබේ.
ඒ අනුව යාපනය ආරක්ෂක සේනා ආඥාපති මේජර් ජෙනරාල් ඩබ්.එම්.ජී.සී.එස්.බී. විජයසුන්දරට (චන්දන විජයසුන්දර) ඔහු යටතේ වැඩිපුර ඇති සේනා කොළඹට එවන ලෙස දන්වා ඇත. දැන් ඒවා කොළඹ පැමිණෙමින් සිටී.
ඉන්පසුව එදිනම මේ වන විට 1 Corps ලෙස නම වෙනස් කර ඇති කිලිනොච්චි ආරක්ෂක සේනා මූලස්ථානයේ ආඥාපති මේජර් ජෙනරාල් ක්‍රිෂාන්ත ඥානරත්නට ද නියෝගයක් නිකුත් කර තිබේ. 53 සහ 58 සේනාංක, කොමාන්ඩෝ බලකාය, විශේෂ බලකාය(SF) ආදී බලකායන් කිලිනොච්චියේ 1 Corps හි අනුයුක්තව සිටින බල ඇණි වේ. ඒවායින් 53 වැනි සේනාංකයට අයත්, ගුවන් සංග්‍රාමික බලකාය ද, (Air Mobile Brigade), නාගරික ප්‍රදේශ තුල සටන් සඳහා විශේෂ පුහුණුව ලත් විශේෂ බලකායේ ඒකකය ද, විශේෂ බලකායේ යතුරු පැදි ඒකකය ද මේ වන විට කොළඹ බලා පැමිණෙමින් සිටී.
මේ අතර බස්නාහිර ආරක්ෂක සේනා ආඥාපති මේජර් ජෙනරාල් පුස්සැල්ල වෙත නියෝග කර ඇත්තේ ඔහු යටතේ මේජර් ජෙනරාල් වික්‍රමසේන අණ දෙන 14 වැනි සේනාංකයේ නිවාඩු අවලංගු කර 19 දා සිට සීරුවෙන් තබන ලෙසයි. 19 දා සිට බස්නාහිර මාර්ග බාධක දමා ඕනෑම අවස්ථාවක මෙහෙයුම් සඳහා තම සේනාංකය සූදානමින් තබන ලෙස නියෝග කර ඇත.
ඒ සමගම මධ්‍යම ආරක්ෂ සේනා මූලස්ථානයේ ආඥාපති මේජර් ජෙනරාල් සමන්ත සිල්වාට ඔහු යටතේ ඇති 12 සහ 11 සේනාංක 19 දා සිට සූදානමින් තබන නියෝග කර ඇත. 12 වැනි සේනාංකාධිපතිට මාතර, හම්බන්තොට ආදී ප්‍රදේශද අයත් ය. 12 වැනි සේනාංකයට අණ දෙන්නේ බ්‍රිගේඩියර් අමරපාල ය. ඔහු ඕනෑවටත් වඩා හීලෑ අයෙකි. ඔහු කලක් යුද හමුදාවේ මානසික මෙහෙයුම් බාර අධ්‍යක්ෂකව සිටි බැවින් දකුණේ කඳවුරු වලට නියෝග කර ඇත්තේ සිවිල් ඇඳුමින් සැරසුනු නිලධාරීන් සහ සෙබලුන් අරගල කරුවන් අතරට යොදවා අරගලයට එරෙහිව මානසික මෙහෙයුම් ක්‍රියාත්මක කරන ලෙසයි.
මධ්‍යම ආරක්ෂක සේනා මූලස්ථානය යටතේ ඇති 11 වැනි සේනාංකයට අයත් වන්නේ මාතලේ, නුවර, නුවරඑළිය, බදුල්ල ආදී ප්‍රදේශයන් ය. එහි සේනාංකාධිපති මේජර් ජෙනරාල් කල්ප සංජීව යටතේ 111 සහ 112 බලසේනා හෙවත් බ්‍රිගේඩ දෙක පවතී. ඒවාද 19 දා සිට ඉහත ප්‍රදේශ වල අරගල මැඩලීම සඳහා යොදවන්නැයි නියෝග දී ඇත.
මීට අමතරව සෑම තැන්හිම අරගලකරුවන් අතරට හමුදා බුද්ධි සේවයේ සහ රාජ්‍ය බුද්ධි සේවයේ කොණ්ඩ රැවුල් වවා ගත් පිරිස් අරගලයේ තරුණයන් සේ වෙස් ගන්වා විශාල වශයෙන් යොදවා ඇත. ඔවුන් මෙහෙයවන්නේ රාජ්‍ය බුද්ධි ප්‍රධානී මේජර් ජෙනරාල් සුරේෂ් සලේ සහ හමුදා බුද්ධි අංශය බාර රොබින් පීරිස් විසිනි.
ඉහත සියළු අංශ වලට නියෝග දී ඇත්තේ අකුරේගොඩ හමුදා මූලස්ථානයේ හැංගී සිටින වැඩ බලන ජනාධිපතිකාරයා රනිල් රාජපක්ෂ විසින් කමල් ගුණරත්න හරහා ය. එම නියෝග වල ඇත්තේ 19 දා සිට ආරක්ෂක ජංගම මුර කපොළු වැඩි කරන ලෙසත් අරගල මර්දනය සඳහ උපරිම හමුදා බලය යොදවන ලෙසත් ය. උපරිම හමුදා බලය යනු වෙඩි තැබීම මිස අනෙකක් නොවේ. එසේ නොකරන හමුදා නිලධාරීන්ට දැනටමත් දඬුවම් දී ඇත.
වැඩ බලන ජනාධිපතිකාරයා මේ සියලු මානව විරෝධී, ප්‍රජාතන්ත්‍ර විරෝධී නියෝග දී තිබෙන්නේ එක්සත් ජාතීන්ගේ සංවිධානයත් එහි මානව හිමිකම් කවුන්සිලයත් සාමකාමී විරෝධතාකරුවන්ට බලය යෙදවීමෙන් වලකින ලෙසත්, එසේ කළහොත් කිසිදු ආධාරයක් ලෝකයෙන් නොලැබේවි කියාත් අනතුරු අඟවා තිබිය දී ය.
කිසිදු ජන පදනමක් නැති තක්කඩි රනිල්ගේ හිතුවක්කාර මර්දනය බාර දී තිබෙන දෙවන ලුතිනන්ගේ සිට මේජර් ජෙනරාල් දක්වා සියළුම හමුදා නිලධාරීන් ගේ නම් ගම් හමුදාවේ නිල අංක මෙන්ම ජංගම දුරකථන අංකයන් ද අප සතු බව සෑම සියළු දෙනෙක්ම දැන ගත යුතු ය.
නෙදර්ලන්තයේ හේග් නුවර ජාත්‍යන්තර අපරාධ අධිකරණයේ (ICC) ලසන්ත ඝාතන නඩුව අද (18) ප්‍රථම වරට විභාගයට ගත් අවස්ථාවේ දීම ඊට වග කිව යුතු ගෝටාභය රාජපක්ෂ වසන් කිරීම සඳහා ක්‍රියා කළ නිලධාරීන්ගේ නම් ලෙස මේජර් ජෙනරාල් කපිල හෙන්දාවිතාරණ ( හිටපු CNI), හිටපු හමුදා බුද්ධි ප්‍රධානී මේජර් ජෙනරාල් අමල් කරුණාසේකර, හිටපු රාජ්‍ය බුද්ධි ප්‍රධානී නි.පොලිස්පති කීර්ති ගජනායක යන අයගේ නම් හෙළිදරව් විය. ඔවුන් ජාත්‍යන්තර අපරාධ අධිකරණයෙන් වැරදිකරුවන් වුවහොත් ඔවුන් බේරා ගැනීමට ඔවුන්ට එදා නියෝග දුන් කිසිවෙකු ඉදිරිපත් වන්නේ නැත.
මේ බව හෙට දවසේ වැරදි නියෝග පිළිපදිනා සෑම නිලධාරියෙකුම මතක තබා ගත යුතුය.
---------------------------
by (2022-07-18 22:25:27)
Read 49740 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි