"රෝහල්වල තදබදයක් නැහැ" -අවංකව කතා කළොත් යළි කතා කරන්න නොලැබෙනවායි කියන දොස්තර හේමන්ත හේරත් කියයි...!

-ඩේලි මිරර්, අයිලන්ඩ් වාර්තා සිංහලට නැගුවේ ආනන්ද

(ලංකා ඊ නිව්ස් -2021.අගෝ.08, පෙ.ව.5.35) මහජනයා සහ වෛද්‍ය ප්‍රජාවට අනතුරු හඟවමින්, රෝහල් කොරිඩෝවල වැතිර සිටින රෝගීන්ගේ වීඩියෝ සහ ඡායාරූප අන්තර්ජාලයේ සංසරණය වන අවස්ථාවක, සෞඛ්‍ය අමාත්‍යාංශය පැවසුවේ, පින්තූර සහ වීඩියෝවල දැක්වෙන පරිදි රෝහල්වල විශාල තදබදයක් ඇති වන කිසිදු සිද්ධියක් වාර්තා නොවන බවයි.

සෞඛ්‍ය ප්‍රවර්ධන කාර්යාංශයේ පැවති ප්‍රවෘත්ති සාකච්ඡාවකට එක් වෙමින් නියෝජ්‍ය සෞඛ්‍ය සේවා අධ්‍යක්ෂ ජනරාල් වෛද්‍ය හේමන්ත හේරත් කියා සිටියේ, මෙවැනි හදිසි අවස්ථාවල දී නිසි වේලාවට කටයුතු කරන ලෙස සියලුම රෝහල් වෙත දැනුම් දී ඇති බවයි.

“එම ඡායාරූපවල පේන සියලුම පුද්ගලයින් කොරෝනා රෝගීන් දැයි කීමට අමාරුයි. සාමාන්‍යයෙන්, කොරෝනා රෝගීන් තියන්නේ පිටස්තරයින්ට ඇතුළු වීමට ඉඩ නොදෙන මුද්‍රා තැබූ වාට්ටුවලයි. වාට්ටුවලට ඇතුළු වෙන කොට සෞඛ්‍ය නිලධාරීන්ට පවා පුද්ගලික ආරක්‍ෂක උපකරණ පැළඳීමට සිදු වෙනවා,” යයි ඔහු අවධාරණය කළේය.

ඔහු පැවසුවේ කොරෝනා රෝගීන්ට ප්‍රතිකාර කරන රෝහල් කිහිපයක වාට්ටු පිරී පවතින බවයි. කෙසේ වෙතත්, එවැනි ස්වභාවයක් ඇති වූ විට ක්‍රියා කිරීමට සියලු රෝහල්වලට ක්‍රමවේදයක් ඇත.

"මා දන්නා පරිදි, ධාරිතාව ඉක්මවා ඇති රෝහල්වල රෝගීන්ට නවාතැන් සැපයීමට සහ ඔවුන්ට හොඳින් ප්‍රතිකාර කිරීම සහතික කිරීම සඳහා අදාල බලධාරීන් කඩිනම් පියවර අර ගෙන තියෙනවා," යයි ද ඔහු පැවසීය.

කොරෝනා රෝගීන්ට ප්‍රතිකාර කිරීම සඳහා රෝහල්වල ඇඳන් නොමැතිකමට මෙහි කිසිදු සම්බන්ධයක් නැති බව ද දොස්තර හේරත් පැවසීය.

හදිසි අවස්ථාවල දී කෝවිඩ් රෝගීන් සඳහා වැඩි වැඩියෙන් ඇඳන් වෙන් කරන ලෙස සෞඛ්‍ය සේවා අධ්‍යක්ෂ ජනරාල්වරයා අදාල රෝහල්වලට අවශ්‍ය උපදෙස් ලබා දී ඇති බව ද වෛද්‍ය හේරත් පැවසීය.

(2021 අගෝස්තු 6 වන දින Daily Mirror Online වෙබ් අඩවියේ පළ වූ, Sheain Fernandopulle ලියූ, ‘No congestion of COVID patients at hospitals, says Health Ministry’)

පසු සටහන:

ඉහත ප්‍රකාශය කළ දොස්තර හේරත් එදිනම අයිලන්ඩ් පුවත් පතට කළ ප්‍රකාශයක් 'DDGH tight-lipped on real situation' මැයෙන් එම පුවත් පතේ වාර්තාකාර රතීන්ද්‍ර කුරුවිට වාර්තා කර තිබුනේ මෙසේය. 

"ඉදිරි දින කිහිපය තුළ වසංගතයේ ගමන් මග පිළිබඳව අවංකව කථා කළහොත් තමාට නැවත මාධ්‍යයට කතා කිරීමට ඉඩ නොලැබිය හැකි බව නියෝජ්‍ය සෞඛ්‍ය සේවා අධ්‍යක්ෂ ජනරාල් වෛද්‍ය හේමන්ත හේරත් මහතා ඊයේ (06) මාධ්‍ය වෙත පැවසීය.

ආචාර්ය හේරත් මහතා මේ බව කියා සිටියේ ඉදිරි දිනවලදී ශ්‍රී ලාංකිකයින් මුහුණ පෑමට සිදු වන වාතාවරණය පිළිබඳව අවංකව අදහස් දක්වන ලෙස මාධ්‍යවේදියෙකු ඔහුගෙන් කළ විමසීමකට පිළිතුරු ලෙස ය." (2021/08/7 -The Island)

-ප්‍රවෘත්ති සිංහලට පරිවර්තනය කළේ,

- ආනන්ද

ලියුම්කරුගේ පරිවර්තන එකතුව
https://www.lankaenews.com/category/68

---------------------------
by     (2021-08-08 00:18:06)

Read 17160 Times

Leave a Reply

  0 discussion on this news