වඳ පෙති, වඳ කොත්තු, වඳ යට ඇඳුම් හා වඳ දොස්තරලා වෙනුවට 'වඳ පොල්තෙල්' ලැබී ඇත..!

-හෙළ බොදු සවිය

(ලංකා ඊ නිව්ස් -2021.මාර්තු.29, ප.ව.10.30) Aflatoxin විෂ පිළිකා කාරක අඩංගු පොල්තෙල් වෙළඳපොළට මුදාහැර ඇත. මෙය පුස් විශේෂයකි. මේ පුස් විශේෂය ශරිරගත වූ විට අක්මා පිළිකා හට ගැනීමේ සම්භාවිතය වැඩිය. අක්මා පිළිකාවක් හට ගැනීම මරණය ඉක්මන් වීමකි. Aflatoxin අඩංගු පොල්තෙල් තොග මෙට්‍රික් ටොන් 37000 ක් දැන් ලංකවේ වෙළඳ පොලට ඇතුල් වී ඇත. මීට පෙර ද Aflatoxin අඩංගු වියළි මිරිස් ආනයන කර එවා ද ජනතාවට බෙදා අවසන්ය. 

වරායේ සභාපති වරයා එම විෂ සහිත තෙල් හොරාටම තබා ගැනීමට අවසර ලබා දී ඇත. මෙවැනි තෙල් ඉන්දියාව ඇතුළු රටවල් කීපයක්ම තහනම් කර ඇත. දෙමාපියෙක් තම දරුවන්ට දෙන්නේ හොඳම දේ පමණි. එහෙත් අද දෙමාපියන්ට එසේ කිරීමට වාසනවක් නැත. මෙවැනි කූඨ ව්‍යාපාරිකයන්ගේ හා දේශපාලකයන්ගේ දරුවන් පමණක් නොව මෙවැනි කූඨ ව්‍යාපාරවලට  උදව් උපකාර කරන නිළධාරීන්ගේ දරුවන්  ද ජීවත් වන්නේ පිටරටවල ය. 

ගෝඨාභය ආණ්ඩුවේ බන්දුල ගුණවර්ධන වෙළඳ අමාත්‍යවරයා කියා සිටින්නේ මහජනතාවගෙන් මෙවැනි විෂ සහිත තෙල් සම්බන්ධයෙන් තමන්ට පැමිණිලි ලැබී නැති බවයි. මෙවැනි බලධාරීන් සිටින රටක ඔබත් මමත් අද ජීවත් වන්නේ නීතියක් නොමැති,  දුබලයාට පමණක්  නීතිය ක්‍රියත්මක කරන රටක ය. ගෝඨාභය ආණ්ඩුව බලයට පත්වීමට පෙර කියා සිටියේ සාෆි වැනි වෛද්‍යවරුන්ගෙන් සිංහල ජාතිය බේරා ගැනීමට එන බවයි. නමුත් පිළිකා කාරක සහිත පොල්තෙල් හරහා මෙවැනි සමූහ ඝාතන 30 වසරක යුද්ධයේ දී එල්.ටී.ටී.ඊ ත්‍රස්වාදීන් විසින් වත් සිදු කර නොමැත. අද වන විට ලංකාවේ පිළිකා රෝගීන්ගේ සීග්‍ර වර්ධනයක් දැකිය හැක්කේ මෙවැනි දෑ නිසා ය.  

මෙම පොල්තෙල් නැවත ප්‍රති අපනයනය කළ ද ඉන් සිදුවන්නේ ලෝකයේ කොහේ හෝ ජනතාවකට ලබා දීම ය. සිදුවිය යුත්තේ මෙවැනි සමාගම් සඳහා දැඩි දඩුවම් පැනවීමටත්, ඒ සඳහා මුල් වූ පිරිස් වලට දඬුවම් කිරීමත් නොවේද ? ශ්‍රී ලංකා ප්‍රමිති  ආයතනයෙන් සිදුකළ පරීක්ෂාවේ දී පිළිකා කාරක හමු නොවීම පුදුම සහගත ය. නමුත් රජයේම වෙනත් ආයතනයක් කළ පරීක්ෂාවේ දී ඉහළ ප්‍රතිශතයකින් පිළිකා කාරක අඩංගු බව සඳහන් වෙයි. එහි දෙවන තත්ත්ව පරීක්ෂණයේ දී ද Aflatoxin තිබෙන බව අද වන විට ඔප්පු වී අවසන්ය. අද වන විට වඳ පෙති, වඳ කොත්තු, වඳ යට ඇදුම්, වඳ සාෆිලා වෙනුවට වඳ පොල්තෙල් විද්‍යානුකූලවම ලැබී ඇත. දැන් කළ යුත්තේ දඬුවම් දීම පමණි. 

මෙරට සිංහල සහ හින්දු අවුරුද්ද එළැඹීමට ඇත්තේ ඉතා කෙටි කලකි. සිංහල සහ හින්දු අවුරුදු සඳහා සිංහල සහ හින්දු කාන්තාවෝ රසකැවිලි සාදාගැනීමට පොල්තෙල් භාවිතා කරති. එපමණක් නොව බිස්කට් වර්ගවලට ද මෙම තෙල් භාවිතා කර අවසන්ය. එබැවින් මෙම කාලය තුළ වැඩි ඉල්ලුමක් පොල්තෙල් සඳහා ඇත. රටේ ජනතාව දීර්ඝ කාලීනව රෝගී ජනතාවක් කිරීම කිසිවෙකුගේ කුරිරු සැලසුමක් ද? එබැවින් මෙවැනි දූෂිත නිළධාරීන් හා ව්‍යාපාරිකයන් නීතියේ රැහැනට ගැනීම ජනාධිපතිවරයාට ඡන්දය ලබා දුන් 69 ලක්ෂයක් ජනතාවට පමණක් නොව සමස්ත ජනතාවට නිරෝගීව ජීවත් වීම සඳහා කරන්නා වූ පිං කමකි. එම නිසා වරද කළවුන් සියලු දෙනාම නීතිය ඉදිරියට පමුණුවන ලෙස ජනාධිපතිවරයාගෙන් ඉතා ඕනෑ කමින් ඉල්ලා සිටිමු.  

හෙළ බොදු සවිය

---------------------------
by     (2021-03-29 17:35:17)

Read 21894 Times

Leave a Reply

  0 discussion on this news