-සුනන්ද දේශප්රිය ජිනීවා සිට
(ලංකා ඊ නිව්ස් -2021.මාර්තු.27, ප.ව.8.30) රාජපක්ෂ ආන්ඩුව ශ්රී ලංකාවට අන්තර් ජාතික වශයෙන් තවත් පරාජයත් අත්කර දුන්නේය. රාජපක්ෂ ආන්ඩු පැවතුනු තාක් 2012, 2013, 2014 වශයෙන් එක්සත් ජාතීන්ගේ මානව හිමිකම් කවුන්සිලයේදී ලංකාන්ඩුව ලැබූයේ පරාජයන්ය. දැන් යළිත් එම කළ දසාවම ලබා තිබේ.
දැන් ජිනීවාහි දී පරාජය වී ඇත්තේ රාජපක්ෂලා බලයට ඒමට පාවිච්චි කළ පටු ජාතිවාදයයි. එම දෘෂ්ඨිවාදය නිසාම රාජපක්ෂ ආන්ඩුව 2020 මාර්තුවේදී ඒ තාක් කල් ශ්රී ලංකාන්ඩුව මානව හිමිකම් කවුන්සිලය, වෙනත් වචනයකින් කියන්නේ නම් අන්තර් ජාතික මානව හිමිකම් ප්රජාව සමඟ ඇති කරගෙන තිබූ එකඟතාවයන්ට පයින් ගැසුවේය. දැන් හරියටම ඊට වසරකට පසු අන්තර් ජාතික මානව හිමිකම් ප්රජාව ඊට පිළිතුරු දී තිබේ.
ශ්රී ලංකාව පිළිබඳ යෝජනාව ඡන්ද විමසීමට ලක්කිරීමට දිනකට පෙර අන්ඩුවේ ලේක්හවුස් හොරණෑ කරුවන් කීවේ තත්වය ශ්රී ලංකා ආන්ඩුවට වාසිදායක වී ඇති බවයි. ඒ කොතෙක්ද යත් ගෝඨාභය රාජපක්ෂගේ විදේශ ලේකම් අද්මිරාල් කොළඹගේ ඉන්දියාව යෝජනාවට විරුද්ධවන බවට ශ්රී ලංකාවට පොරොන්දුවක් දී ඇතැයි කීවේ ය. එහි ප්රතිපලය වුයේ තමිල්නාඩුවෙහි ප්රධාන පෙළෙහි සියළුම දේශපාලන පක්ෂ වහාම කොළඹගේ ප්රකාශය සඳහන් කරමින් අගමැති නරේන්ද්ර මෝඩිට ලිපියක් යැවීමය. එම ලිපිය මගින් යෝජනාවට පක්ෂව ඡන්දය දෙන ලෙස ඉල්ලා තිබුණි.
ජිනීවාහී දී ශ්රී ලංකා තානාපති වන්ද්රප්රේම කළේ ඊටත් වඩා දුරදිග නොබලන ප්රකාශයන්ය. ඔහු 'දි අයිලන්ඩ්' පුවත්පතට ලියූ ලිපි දැන් ශ්රී ලංකාන්ඩුවේ ස්ථාවරය ලෙස මානව හිමිකම් කවුන්සිලයේ දී කියවනවා වැනි ය. ඔහු බටහිර රටවලට පමණක් නොව 'ක්වොඩ්' නමින් හඳුන්වන ඇමෙරිකාව, ඉන්දියාව, ජපානය සහ ඕස්ට්රේලියාව යන රටවල සන්ධානයට ද දිගට හරහට පහර ගැසුුවේය. සමහර විට තමාගේ ප්රහාරයන්ට බියෙන් එම රටවල් යෝජනාවට විරුද්ධ වනු ඇතැයි ඔහු සිතන්නට ඇත.
ඊටත් වඩා ජිනීවා හි ශ්රී ලංකා තානාපති චන්ද්රප්රේම උත්සාහ කළේ සමස්ත එක්සත් ජාතීන්ගේ ක්රමයටම පහර ගැසීමටය. එමෙන්ම මහ කොමසාරිස්වරිය තමන්ට අයත් නැති දේ කරන බවට තර්ක ගෙන ඒම ය. එම තර්ක නෙළුම් කොළයකට වට වැහි බිඳු මෙන් පිටතට ගලා ගියේය.
අඩුම වශයෙන් සිය ආන්ඩුව ඉදිරියේ දී මානව හිමිකම් රැකීමට ගන්නට සිටින පියවර එකක් හෝ ඉදිරිපත් කිරීමට තානාපතිවරයා සමත්වූයේ නැත. ඉන් සාමාජික රටවලට ඒත්තු ගැණුනේ එවැනි වැඩ පිළිවෙලක් රාජපක්ෂ ආන්ඩුවට නැති බවයි.
කවුන්සිලයේ පැවැති විවාදයන්හිදී රාජපක්ෂ ආන්ඩුව තමන්ගේ මිතුරන් ලෙස ලෝකයාට හඳුන්වා දුන්නේ වර්ථමානයෙහි දරුණුතම ඒකාධිපති ආන්ඩු පවතින උතුරු කොරියාව, එරිත්රියාව, වෙනිසියුලාව, ඊජිප්තුව වැනි රටවල්ය. එවැනි මිතුරන් සිටින රටකට සතුරන් අවශ්ය නැති තරම්ය. මන්ද යත් එවිට ඉබේම සතුරු ආකල්පයක් ඇතිවන නිසා ය.
සාමාන්යයෙන් ඡන්දය දීමෙන් වැළකී සිටින දකුණු කොරියාව මෙවර යොජනාවට පක්ෂව ඡන්දය දුන්නේය. ආසියනු රටවලින් රාජපක්ෂ ආන්ඩුවට සහාය ලැබුණේ පකිස්තානය, බංගලිදේශය සහ පිලීපීනය යන රටවලින් පමණි. තමන් විසින්ම සැකකරුවෙකුට ගුවනේ දී වෙඩි තබා මරා දැමූ බව ප්රසිද්ධියේ පිළිගත් පිලිපීන ජනාධිපති දුතර්තේ ද අද රාජපක්ෂ පාලනයේ ගජ මිතුරෙකි.
ශ්රී ලංකාව පිලිබඳ යෝජනාවට පක්ෂ ඡන්දය විමසීමට පෙර කතා කළේ කියුබාව, පකිස්ථානය, චීනය, වෙනිසියුලාව සහ රුසියාව යන රටවල්ය. මෙම රටවල් අතරින් නාමික හෝ පාර්ලිමේන්තු ප්රජාතන්ත්රවාදයක් පවතින්නේ පකිස්තානයේ සහ රුසියාවේ පමණි. නමුත් එම රටවල් දෙකෙහි ද ඇත්ත බලය දරන්නේ යුද හමුදාවන්ය.
රාජපක්ෂ ආන්ඩුවට පක්ෂව ඡන්දය ප්රකාශ කළ රටවල් 11, එනම් චීනය, රුසියාව, කියුබාව, වෙනිසියුලාව, සෝමාලියාව, පකිස්තානය, බංගලිදේශය, උස්බෙකිස්තානය, පිලිපීනය, බොලිවියාව, සහ එරිත්රියාව යන රටවල් දෙස බලන විට පෙනී යන්නේ රාජපක්ෂ ආන්ඩුවේ මිතුරන් වැඩි දෙනෙක් ඒකාධිපතියන් බවය.
ඇත්ත වශයෙන්ම නම් රාජපක්ෂ විදේශ පිළිවෙත නොබැඳි එකක් නොවේ. එය ඒකාධිපතියන් සමඟ බැඳී පවතින දුෂ්ඨ පිළිවෙතකි. ජිනීවාහි දී පරාජය වුයේ එම දුෂ්ඨ පිළිවෙතයි.
මේ යෝජනාව ශ්රී ලංකාවට විරුද්ධ යෝජනාවක් නොවේ. ශ්රී ලංකා ජනයාගේ මානව හිමිකම් වෙනුවෙන් නැගෙන අන්තර් ජාතික හඬකි. යෝජනාව විවාදයට ගැනීමට දෙදිනකට පෙර ගෝඨාභය රාජපක්ෂ කියා සිටියේ තමන්ට ඇහුම්කන් නොදෙන ජනමාධ්යන්ට පාඩම් ඉගැන්වීමට තමන් දන්නා බවයි. ඒ හඬ සහ ලසන්ත කියන්නේ කව්දැයි අපහාසාත්මක කොක්හඬ ළෑමකින් ඇසූ හඬ අතර වෙනසක් නැත.
ශ්රී ලංකාවේ මාධ්ය නිදහස සහ ජනමාධ්යවේදීන්ගේ අයිතීන් ද වෙනුවෙන් ලෝක මානව හිමිකම් පාර්ලිමේන්තුවෙහි, එනම් මානව හිමිකම් කවුන්සිලයෙහි රාජපක්ෂ ආන්ඩුවට විරුද්ධව යෝජනාවක් සම්මත වූ දිනයේම, ශ්රී ලංකාවේ ප්රධාන පෙළේ මාධ්ය සංවිධාන 6 ක් එක්ව ගෝඨාභය රාජපක්ෂගේ මාධ්ය දඩයමට විරුද්ධව ප්රකාශයක් නිකුත් කිරීම ඉතිහාසයේ අරුමයක් වැන්න.
ශ්රී ලංකාවෙහි ඇතිවන්නට නියමිත මර්දනකාරී දේශපාලනය ගැන මානව හිමිකම් කොමසාරිස්වරිය පසුගිය පෙබරවාරි මුලදී කළ පුරෝකතනය දැනටමත් යථාර්තය බවට පත් වෙමින් තිබේ.
ශ්රී ලංකාව පිළිබඳ යෝජනාව පිලිබඳ සාකච්ඡා වට හතරක් පැවැති මෙම මාර්තු මාසයෙහි රාජපක්ෂ ආන්ඩුව විසින් මුදා හරින ලද මානව හිමිකම් විරෝධී පියවරයන් පෙළට තැබූ විට ඉහත කී පුරෝකතනය කොතරම් යථාර්තවාදී දැයි පෙනේ. නමුත් ශ්රී ලංකාන්ඩුව දිගින් දිගටම කීවේ එකී පුරෝකතනයන් වැරදි බවයි.
රාජපක්ෂ ආන්ඩුවට සහ දේශපාලනයට ජිනීවාහි දී ප්රදර්ශණය වූ ලෝක දේශපාලනය තේරුම් ගැනීමට හැකියාවක් නැත. ඔවුන් තවදුරටත් තුරුලු වනු ඇත්තේ දරුණු ඒකාධිපතියන් සමඟය. ඉදිරි දෙවසර තුළ ශ්රී ලංකාව තව තවත් අන්තර් ජාතික වශයෙන් හුදකලා වනු ඇත. එහි විපාක විඳින්නට වන්නේ රාජපක්ෂ පවුලට නොව රටේ සාමාන්ය ජනයාට ය.
---------------------------
by (2021-03-27 15:11:24)
Leave a Reply
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්ය අජිත් අමරසිංහ ලිපි