The Economic Times හි වාර්තාව සිංහලට නැගුවේ ආනන්ද
(ලංකා ඊ නිව්ස් -2021.මාර්තු.23, පෙ.ව.10.40) චීනයේ දැඩි බලපෑම නිසා ශ්‍රී ලංකාව Sinopharm නමැති කොරෝනා වෛරස් එන්නත හදිසි භාවිතය සඳහා අනුමත කර ඇත. (එම එන්නත BBIBP-CorV ලෙස ද හැඳින්වේ).
ජාතික ඖෂධ නියාමන අධිකාරිය (NMRA) විසින් මෙම අනුමැතිය ලබා දුන් බව ඖෂධ නිෂ්පාදන, සැපයුම් හා නියාමන රාජ්‍ය අමාත්‍ය මහාචාර්ය චන්න ජයසුමන ප්‍රකාශ කළේය.
මෙය සිදු වූයේ Sinopharm අනුමත කිරීම සඳහා වූ ආතතිය සමග දින කිහිපයක් කටයුතු කළ NMRA ප්‍රධානියා ඉල්ලා අස්වීමෙන් පසුවය. තෙවන අදියරේ අත්හදා බැලීමේ තොරතුරු ගැන ඔහු සතුටු නොවූ බව The Economic Times සඳහන් කරයි. ලෝක සෞඛ්‍ය සංවිධානය විසින් මෙතෙක් Sinopharm අනුමත කර නොමැත.
ශ්‍රී ලංකාවේ දේශපාලන ප්‍රධානීන් මුල දී Sinopharm ලබා ගැනීමට උනන්දු නොවූ අතර තනිකරම Covishield මත යැපීමට තීරණය කර තිබුණි.
කොළඹ චීන තානාපති කාර්යාලය ජනවාරි මාසයේ සිට කොළඹ දේශපාලන ප්‍රධානීන්ට දැඩි බලපෑමක් කරමින් සිටි අතර, ඔවුන්ගේ එන්නත පෙබරවාරි මැද භාගය වන විට පැමිණෙන බවටත්, එවිට නියාමන අනුමැතිය ලබා ගත හැකි බවටත් ප්‍රසිද්ධ ප්‍රකාශ නිකුත් කෙරිණ.
මීට පෙර ශ්‍රී ලංකාව විසින් Oxford AstraZeneca කොරෝනා වෛරස් එන්නත් මිලියන 13.5 ක් ඇණවුම් කර තිබුණි. ඒ ඉන්දියාව විසින් තෑගි කරන ලද මාත්‍රා පන්ලක්ෂයකට අමතරවය.
ප්‍රාථමික ගෝලීය එන්නත්කරණය සඳහා, ශ්‍රී ලංකා රජය විසින් ඉන්දියාවේ Serum ආයතනයෙන් ඩොලර් මිලියන 52.5 ක AstraZeneca මාත්‍රා මිලියන 10 ක් ද, Covax වැඩසටහන යටතේ එක්සත් රාජධානියේ AstraZeneca ආයතනයෙන් අතිරේක මාත්‍රා මිලියන 3.5 ක් කෙලින්ම ලබා ගැනීම සඳහා ද ඇණවුම් කර තිබූ බව ප්‍රකාශකයා පැවසීය.
ජනවාරි මස අග දී ශ්‍රී ලංකාවේ එන්නත්කරණය ආරම්භ කිරීම සඳහා සමාන එන්නත් මාත්‍රා 500,000 ක් ඉන්දියාව විසින් තෑගි කර තිබුණි.
‘අසල්වැසියා පළමුව’ යන ආවරණය යටතේ ඉන්දියාව පරිත්‍යාග කළ Covishield එන්නත් මාත්‍රා 500,000 ක් ලබා ගැනීමෙන් පසු ශ්‍රී ලංකා ජනාධිපති ගෝටාභය රාජපක්ෂ ඉන්දියාවේ ත්‍යාගශීලීභාවයට ස්තූතිවන්ත විය.
Covid-19 සඳහා චීන එන්නත්වල අකාර්යක්ෂමතාවය ඔප්පු වෙමින් පවතී. ගුණාත්මකභාවයෙන් අඩු චීන එන්නත් නිසා මිනිසුන්ගේ ජීවිත අවසන් වේ යැයි කිසිවෙකු සිතුවේ නැත.
බීජිං නුවර, Sinovac Biotech ආයතනයේ CoronaVac එන්නත් මාත්‍රාවක් ලබා දුන් සැණින් ඉන්දුනීසියානු හෙදියක වන අර්නි කුසුමා සුක්මා දේවි මිය ගිය බව, ‘චීනයේ නිෂ්පාදිත Covid-19 එන්නතට අන්තර්ජාතික කනස්සල්ල පළ වේ’ යන මැයින් Newsweek වාර්තා කරයි.
මෙම වසර මුල දී, චීන එන්නතක් අත්හදා බැලූ පේරු ස්වේච්ඡා සේවකයෙකු Covid-19 ආශ්‍රිත නියුමෝනියාවෙන් මිය ගියේය. නිව්ස්වීක් වාර්තාවට අනුව, ස්වේච්ඡා සේවකයෙකු මුහුණ පෑ “බරපතල අහිතකර සිදුවීමක්” හේතුවෙන් 2020 දෙසැම්බරයේ පේරු බලධාරීන් විසින් Sinopharm ආයතනයේ Covid-19 එන්නත අත්හිටුවන ලදී. චීනයේ Sinovac එන්නත නිසා බ්‍රසීලයෙන් ද මරණයක් වාර්තා වූ අතර, එහි ප්‍රතිඵලයක් ලෙස අත්හදා බැලීම් නතර කෙරිණ. චීන එන්නත්වල ප්‍රයෝජනවත්භාවය පිළිබඳව හොංකොං වැසියන් ද සැක පහළ කර ඇත.
2021 මාර්තු 20 වන දින The Economic Times වෙබ් අඩවියේ පළ වූ, Dipanjan Roy Chaudhury ලියූ, ‘Alleged Chinese hand: Sri Lanka approves Sinopharm vaccine for emergency use’ නම් ප්‍රවෘත්ති වාර්තාව සිංහලට පරිවර්තනය කළේ,
---------------------------
by (2021-03-23 05:26:47)
Read 32742 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි