චන්ද්‍රප්‍රදීප් ලියයි
(ලංකා ඊ නිව්ස් -2021.පෙබ.10, පෙ.ව.7.45) රට විකුණන්නේ නැතැයි පොළොවේ පස් කකා දිවුරමින් බලයට ආ ගෝඨාභය - මහින්ද ප්‍රමුඛ රාජපක්ෂ පවුලේ ජුන්ටා ආණ්ඩුව රජයට අයත් වටිනා තේ වතු 21 ක් චීනයට විකිණීමට සියළු කටයුතු සම්පාදනය කර ඇතැයි ලංකා ඊ නිව්ස් වෙත වාර්තා වේ.
මෙහි මූලික පියවරක් ලෙස ආණ්ඩුව ප්‍රචාරය කරන්නේ චීනය සමග ශ්‍රී ලංකාවේ තේ මණ්ඩලය ව්‍යාපාර ගිවිසුමක් අත්සන් කර ඇති බවයි. ඒ අනුව චීනයේ 'හුජියෑන්' නම් චීන ජාත්‍යන්තර වෙළඳ සමාගමක් සමග ලංකාවේ තේ මණ්ඩලය ගිවිසුමක් අත්සන් කර ඇති බවත්, වසර 15 යන තුරු අපගේ තේ වසරකට කිලෝ මිලියන 4 ක් බැගින් වෙළඳ පොලේ මිලට චීනය මිල දී ගන්නා බවත් ආණ්ඩුවේ කැබිනට් ප්‍රකාශකයා පවසා ඇත.
ලංකා ඊ නිව්ස් කළ අන්තර්ජාල සොයා බැලීමේ දී 'හුජියෑන්' (Hujian) නමින් ජාත්‍යන්තර වෙළඳාම් සිදුකරන චීන සමාගමක් නැත. එමෙන්ම චීන ප්‍රධාන තේ වෙළඳ නාම 10 අතර හෝ 'හුජියෑන්' නමින් වෙළඳ නාමයක් ද නැත. එය මෙම ගණුදෙනුව සඳහාම නිර්මිත සමාගමක් විය යුතුය.
කෙසේ වෙතත් ලංකා ඊ නිව්ස් වෙත වාර්තා වන්නේ වෙළඳ පොළ මිලට වසර 15 ක් යන තුරු චීනය තේ මිලදී ගන්නවා යයි කැබිනට් ප්‍රකාශකයා කියන කතාව බොරුවක් බවයි. චීනය තේ මිලට ගන්න යන්නේ ස්ථාවර මිලකට ය.
ඒ සඳහා ශ්‍රී ලංකා රජය සතු තේ වතු 21 ක් චීනයට පවරා දීමට ද නියමිත ය. මෙම තේ වතු චීනය මිල දී ගැනීමට යන්නේ (මිලදී ගැනීමට අලුතින් කියන නම ආයෝජනයයි) සිතා ගැන්මටවත් නොහැකි තරම් විශාල මිලකට බව ද දැන ගන්නට තිබේ. ඒ ඉහළ මුදල ලංකාවේ සියළු ණය ගෙවීමට තරම් ප්‍රමාණවත් බවද පැවසේ. පසුගියදා ලංකාව ඉන්දියාවෙන් ලබා ගෙන තිබූ ඩොලර් මිලියන 400 ක ණයක් ගෙවන්නැයි ඉන්දියාව කී විට චීනය ඒ සඳහා ඩොලර් මිලියන 1500 ක්ම ලංකාවට ලබා දී තිබිණ. ඉන්දියාව කියා දින දෙකක් තුල ලංකාව ණය ගෙවා දමා තිබිණ. එය ඉන්දියාවේ පුදුමයට හේතු වී තිබිණ.
කෙසේ වෙතත් තේ වතු ගන්නේ නැතිව ස්ථාවර මිලකට ශ්‍රී ලංකා තේ මිලට ගැනීමට මීට පෙර චන්ද්‍රිකාගේ පාලන යුගයේ දී ඉන්දියාව ශ්‍රී ලංකාවට යෝජනා කළ ද ඉන්දියානු යෝජනාවට එවක ආණ්ඩුව කැමැති නොවීය. හේතුව ලෙස කියා සිටියේ එවිට 'ශ්‍රී ලංකා තේ' නම් ජාත්‍යන්තර වෙළඳ සන්නාමය ලංකාවට අහිමි වනවා කියා ය. නමුත් දැන් චීනය කරන්න යන්නේ ද එයම ය.
ඉන්දියානු සම්භවයක් සහිත තේ වතු කම්කරුවන් හරහා ඉන්දියාව ශ්‍රී ලංකාවේ දේශපාලනයට කරනු ලබන බලපෑම් අවසන් කිරීම ද තේ වතු චීනයට විකිණීමෙන් රාජපක්ෂ ජුන්ටාව බලාපොරොත්තු වේ. රුපියල් 1000 ක අවම වැටුප දීමට නොහැකි වතු සමාගම් වේ නම් ඒ වතු ආණ්ඩුවට දෙන්නැයි මහින්දානන්ද කයිවාරු ගහන්නේ මෙම චීන ගනුදෙනුව පසුපස තිබෙන නිසා ය.
කොළඹ වරායේ නැගෙනහිර ජැටිය ඉන්දීය - ජපාන හවුල් සමාගමකට ලබා දෙනවාට වලිගයට ගිනි ගත්තා සේ විරුද්ධ දේශප්‍රේමීන් ලංකාවේ දේපොල චීනයට දෙනවාට කිසිදු විරෝධයක් දක්වන්නේ නැත. කොළඹ වරායේම කොළඹ ජාත්‍යන්තර බහාලුම් පර්යන්තය චීනයට දුන්නාට දේශප්‍රේමීන් විරුද්ධ වූයේ නැත. හම්බන්ත‌ොට වරායම සහ ඒ අවට අක්කර 15000 ක් අවුරුදු 99 කට චීනයට දුන්නාට දේශප්‍රේමීන් විරුද්ධ වූයේ නැත. කොළඹ වරාය නගරයෙන් විකිණිය හැකි ඉඩම් අක්කර 420 න් අක්කර 266 ක් ම චීනයට අයත් වූව ද දේශප්‍රේමීන් විරුද්ධ වූයේ නැත. දැන් කොටුවේ පිහිටි ලංකා බැංකු මූලස්ථාන ගොඩනැගිල්ල චීනයට දෙන්න යනවාට ද දේශප්‍රේමීන් මීක් කියන්නේ නැත. සියල්ලටම වඩා පෝක් සමුද්‍රසන්ධියේ ලංකාව සතු හොඳම දූපත් 3 ක් චීනයට දෙනවාට ද දේශප්‍රේමීන් මීක් නැත. ඒ අනුව තේ වතු 21 ක් චීනයට දුන්නද දේශප්‍රේමීන් නොදුටුවා සේ සිටිනු නොඅනුමාන ය.
ඊට හේතුව අන් කිසිවක් නොව මේ කියන දේශප්‍රේමීන් සියලු දෙනා ට චීනය අල්ලස් දෙන නිසා ය. නැගෙනහිර ජැටිය බේරාගන්න ආ වරායේ වෘත්තීය සමිති නායකයන්ගේ සහ ලඟම ඥාතීන්ගේ ගිණුම් පරීක්ෂා කළහොත් ඒ බව ඔ්නෑම කෙනෙකුට තහවුරු කර ගත හැකිය. වෘත්තීය සමිති පමණක් නොව ලංකාවේ සියළුම දේශපාලන පක්ෂ වලට ද, සංඝයාට ද, ජඩමාධ්‍යයට ද චීනය මදියි නොකියන්න අල්ලස් ලබා දේ. ඉන්දියාවට ඇමරිකාවට යුරෝපයට විරුද්ධව දේශප්‍රේමය උත්සන්න වන්න‌ේත්, චීනයට විරුද්ධව ඒ දේශප්‍රේමය දෙපර හැන්ද අස්සේ සැඟවෙන්නේත් එබැවිනි. මොවුන් දේශප්‍රේ-මීයන් යැයි අප කියන්නේ ද එබැවිනි.
ලියුම්කරුගේ පෙර ලිපි එකතුව
https://www.lankaenews.com/category/54
---------------------------
by (2021-02-10 02:16:59)
Read 40992 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි