වත්කම් තහනම්..! සංචාර තහනම්..! ජාත්‍යන්තර අපරාධ නඩු..! ගෝඨාන්ඩුව හොම්බෙන් යවන යෝජනා ජිනීවා වලින් ලංකාවට දැනුම් දීලා..! ඉන්දියාවත් රතු එළි දල්වලා..!

චන්ද්‍රප්‍රදීප් ලියයි

(ලංකා ඊ නිව්ස් -2021.‍ජන.24, පෙ.ව.10.35) “මානව හිමිකම් උල්ලංඝනය කිරීම් සම්බන්ධයෙන් විශ්වාසදායී චෝදනා ලැබ සිටින” ශ්‍රී ලාංකිකයින් ගේ වත්කම් තහනම් කිරීම සහ සංචාරක තහනම් පැනවීම වැනි ඉලක්කගත සම්බාධක පැනවිය යුතු යැයි එක්සත් ජාතීන්ගේ මානව හිමිකම් මහ කොමසාරිස්වරිය මිචෙල් බැචලේ ලබන මාසයේ ජිනීවාහි ආරම්භ වන මානව හිමිකම් සැසිවාරයේදී ඉදිරිපත් කරන ශ්‍රී ලංකාව පිළිබඳ නවතම වාර්තාවේ දී ලෝකයාගෙන් ඉල්ලා සිටිනු ඇත.

ඊටත් වඩා දුර දිග යන මහ කොමසාරිස් වරිය එකී මානව හිමිකම් උල්ලංඝනය කළවුන්ට ජාත්‍යන්තර අපරාධ අධිකරණයේ (ICC) අපරාධ නඩු විභාග කිරීම සහ යුද අපරාධ පිළිබඳ චෝදනා සොයා බැලීමට හා සාක්ෂි රැස් කිරීමට ජාත්‍යන්තර යාන්ත්‍රණයක් සැකසීමට ද  නිර්දේශ කර තිබේ. 

මේ තරම් බරපතල යෝජනාවක් මීට පෙර ජාත්‍යන්තරයෙන් ශ්‍රී ලංකාවට එල්ල කර නැත. 

මෙම වාර්තාව මේ වන විටත් ශ්‍රී ලංකාවේ ගෝඨාන්ඩුවට  ලබා දී ඇති අතර එයට ප්‍රතිචාර දැක්වීමට ජනවාරි 27 දක්වා කාලය පවතින බව විදේශ ලේකම් අද්මිරාල් ජයනාත් කොළොඹගේ සන්ඩේ ටයිම්ස් පුවත්පතට පවසා තිබේ.  

මේ අතර, මහා බ්‍රිතාන්‍යය විසින් ශ්‍රී ලංකාව ද ඇතුලත්ව මෙහෙයවනු ලබන රටවල් කණ්ඩායමක් විසින් පෙබරවාරි-මාර්තු මාසවල එක්සත් ජාතීන්ගේ මානව හිමිකම් කවුන්සිලයේ සැසිවාරයේදී ඉදිරිපත් කරනු ලබන නව යෝජනාවකට එකඟතාව ලබා දීමට ගෝඨාන්ඩුව තවමත් තීරණය කර නොමැත.  යහපාලන ආණ්ඩු කාලයේ ශ්‍රී ලංකාවේ ද සම යෝජනාවෙන් ඉදිරිපත් කළ 30/1 යෝජනාවෙන් ශ්‍රී ලංකාව ගෝඨාගමනයෙන් පසු  ඉවත් වී ඇති අතර වෙනත් කිසිවෙකුට සම අනුග්‍රහය නොදක්වන බව ද ගෝඨාන්ඩුව දැනටමත් ප්‍රකාශ කර ඇත. 

මේ අතර පසුගියදා ගෝඨාභය තමාට චරිත දෙකක් තිබෙන බවත්, බල්ලෙක් වගේ මරා දැමීමට හැකි යයිද ආදී ලෙස දුරදිග නොබලා කී මිනීමරු ප්‍රකාශ ද ඔහු ආරක්ෂ ලේකම් කාලයේ දී යුද අපරාධ සිද්ධ වූ බව තහවුරු කෙරෙන ප්‍රකාශ වීමද මේවාට බලපා තිබේ.    

කෙසේ වෙතත් පසුගිය වාරවල දී මෙන් නොව ඉන්දියාව ද ශ්‍රී ලංකාවේ ආණ්ඩුවට බලපෑම් එල්ල කෙරෙන යෝජනාවක දී ඊට පක්ෂපාත වනු ඇති බව ලංකා ඊ නිව්ස් වෙත වාර්තා වේ. මීට පෙර ශ්‍රී ලංකාව අරභයා ඉන්දියාව ඡන්දය ප්‍රකාශ කිරීමෙන් වැළකී හිඳ තිබේ. 

ඊට හේතුවූ ඉන්දු-ශ්‍රී ලංකා සම්බන්ධතා සම්බන්ධයෙන් තානාපති ආරංචි මාර්ග මෙසේ පවසයි. 

අජිත් දොවාල් ගෝඨාභයට දැල්වූ රතුඑළි..

ගෝඨාභය ජනාධිපති ලෙස පත්වූ මුල් භාගයේ දී ගෝඨාභයට දුරකථනයෙන් ඇමැතූ ඉන්දීය ආරක්ෂක උපදේශක (ඉන්දියාවේ අගමැතිට පසුව ප්‍රබලම පුද්ගලයා ආරක්ෂක උපදේශකවරයා ය) අජිත් දොවාල් ලංකාවේ යුද අපරාධ වලට නම ගෑවුනු පුද්ගලයින්ට තනතුරු පුදා ඉහළ ස්ථාන වලට පත් කිරීමෙන් වළකින්නැයි පවසා ඇත. ඔහු විශේෂයෙන් නම් සඳහන් කර ඇත්තේ ආරක්ෂක ලේකම් කමල් ගුණරත්න සහ හමුදාපති ශවේන්ද්‍ර සිල්වා පිළිබඳව ය. අජිත් දොවාල් පැහැදිලි කර දී ඇත්තේ එවැනි චුදිතයන් සම්බන්ධයෙන් ජාත්‍යන්තරය ප්‍රශ්න නගන විට ඉන්දියාවට ලංකාව වෙනුවෙන් පෙනී සිටීම අසීරුවන බවයි. දුරකථන සාකච්ඡාවේ දී ගෝඨාභය දොවාල්ට එකඟ වී ඇති නමුත් ඒ සම්බන්ධයෙන් අද දක්වාම කිසිදු ක්‍රියාමාර්ගයක් ගත්තේ නැත. 

තවත් සිදුවීමක් නම් පසුගියදා ඉන්දීය විදේශ ඇමැති ආචාර්ය එස්.ජයිශංකර් ලංකාවට පැමිණි අවස්ථාවේදී කළ කී දෑ ය.

ආචාර්ය ජයිශංකර් ගෝඨාභයට දැල්වූ රතුඑළි..

ගෝඨාණ්ඩුව මේ වන විට පළාත් සභා ඡන්දය පැවැත්වීම දින නියමයක් නොමැතිව අත්හිටුවා ඇති අතර පළාත් සභා වලට විරුද්ධ දැවැන්ත ඝෝෂාවක් ද නගමින් සිටී. එය ඔවුන් ඡන්දයට පෙර සිටම ජාතිවාදීන් පිනවීම සඳහා භාවිතා කළ සටන් පාඨයක් ද විය. නමුත් ලංකාවේ පළාත් සභා පිහිටුවන ලද්දේ ඉන්දු ලංකා ගිවිසුමේ කොටසක් ලෙස ය. සරත් වීරසේකර වැනි රාජ්‍ය තාන්ත්‍රිකභාවය ගැන අන්දෝ සංසාරයක් නොදන්නා වුන් ප්‍රසිද්ධියේ කියන්නේ ඉන්දු ලංකා ගිවිසුම දැන් අහෝසි බවකි. 

ඉහත තත්ත්වය සම්බන්ධයෙන් ලංකාවට ආ ආචාර්ය ජයිශංකර් ජනාධිපති ගෝඨාභයට පවසා ඇත්තේ ඉන්දියාව ලංකාවේ දෙමළ ජනයා වෙනුවෙන් බිහිකළ පළාත් සභා අහෝසි කිරීම පමණක් නොව ඉන්දු- ලංකා ගිවිසුමෙන් ඉවත්වීමට පවා අවශ්‍ය නම් ලංකාවට කළ හැකි බවයි. නමුත් ලංකාව එසේ කෙරෙන්නේ නම් එවැනිම රටවල් දෙක අතර ගිවිසුමක් වූ සිරිමා-ශාස්ත්‍රී ගිවිසුමෙන් ඉන්දියාවද ඉවත්වන බවත් ඉන්පසු සිරිමා-ශාස්ත්‍රී ගිවිසුම අනුව ලංකාවට අයත් වූ කච්චතිවු දූපත යලි ඉන්දියාව අත්පත් කර ගන්නා බවද ආචාර්ය ජයිශංකර් ගෝඨාභයට දැනුම් දී තිබේ. 

ඊටත් අමතරව ඉන්දියාවේ හිත් රිදවූ කාරණයක් වී ඇත්තේ ආචාර්ය ජයිශංකර් ලංකාවේ සිටියදීම ඔහුගේ කණට ගැසුවා සේ යාපනය සරසවියේ කලක් තිස්සේ පිහිටුවා තිබූ මුල්ලවයික්කාහිදී මිය ගිය පුද්ගලයන් සිහිකිරීම‌ වෙනුවෙන් වූ ස්මාරකය බලහත්කාරයෙන් කඩා දැමීමයි. එහි උණුසුම දකුණු ඉන්දියාව කරා ද ව්‍යාප්ත විය. මෙවැනි ගෝනි සෙල්ලම් දැමීම ගෝඨාභයගේ සිරිතකි. එනම් ඉන්දීය විදේශ ඇමැති මෙරට සිටියදීම ලංකාවේ ආණ්ඩුව එවැන්නක් නොකරනු ඇති බවත් එය වෙනත් පාර්ශවයක වැඩක් විය හැකි බවත් සාමාන්‍යයෙන් කෙරෙන තක්සේරුව ප්‍රයෝජනයට ගෙන එයම කිරීම ගෝඨාභයගේ සිරිතකි. 

අතීත ගෝනි සෙල්ලම්..

ඊට අතීතයෙන් අනන්තවත් උදාහරණ දැක්විය හැකිය. පසුගිය රාජපක්ෂ යුගයේ දී එ ජා. මානව හිමිකම් කොමිසමේ නියෝජිත පිරිසක් ලංකාවේ සිටින අවස්ථාවක කොටුවේ දී රතු කුරුස ක්‍රියාකාරීන් සිව් දෙනෙකු පැහැරගෙන ගොස් මරා දැමුවේ ය. තවත් එවැනිම මානව හිමිකම් ජාත්‍යන්තර සමුළුවක් කොළඹ පැවැත්වෙන අවස්ථාවක දී ත්‍රිකුණාමලයේ පාසැල් සිසුන් පිරිසක් වෙඩි තබා මරා දැමුවේ ය. ජාත්‍යන්තර මාධ්‍ය සංවිධාන වල සමුළුවක් කොළඹ පැවැත්වෙද්දී යාපනයේ උදයන් පුවත් පත් කාර්යාලයට බෝම්බ ගැසුවේය. දේශීය මාධ්‍ය සංවිධාන නියෝජිතයන් පිරිසක් සමග ජනාධිපති මහින්ද රාජපක්ෂ අරලියගහ මන්දිරයේ සාකච්ඡාවක් කරමින් සිටිය දී පෝද්දල ජයන්ත පැහැරගෙන ගොස් සිහි නැතිවෙන තුරු පහර දී, කොණ්ඩය කපා කටේ ඔබා, කකුල් දෙකම කඩා දැමුවේ ය. මරා දැමීමට නොහැකි වූයේ එළිය‌ේ සිටි මාධ්‍යවේදීන්ට සිද්ධිය ආරංචි වී වහාම සාකච්ඡා කරමින් සිටි මහින්දට දැන්වීමත් ඉන්පසු ඔහුගේ මැදිහත් වීමත් නිසා ය. 

ආචාර්ය එස්.ජයිශංකර්ට ද ගෝඨාභය පෙන්වුයේ ඉහත කී ගෝනි සෙල්ලමම ය. නමුත් ඉන්දියාව ඉන් බරපතල ලෙස කෝප වී තිබෙන අතර ජිනීවාහිදී ගෙන එන යෝජනාවකට ඉන්දියාවේ සහාය හිමිවන බව මේ වන විටත් ඉන්දියාව ගෝඨාන්ඩුවට දැනුම් දී ඇතැයි තානාපති ආරංචි මාර්ග වැඩිදුරටත් කියයි.

චන්ද්‍රප්‍රදීප්

ලියුම්කරුගේ පෙර ලිපි එකතුව
https://www.lankaenews.com/category/54  

---------------------------
by     (2021-01-24 10:20:42)

Read 52776 Times

Leave a Reply

  0 discussion on this news