චන්ද්‍රප්‍රදීප්ගේ හෙළිදරව්වකි
(ලංකා ඊ නිව්ස් -2020.දෙසැ.14 ප.ව.5.45) කිසිදු සාධාරණ නීතියකට අනුගත නොවී ඉතාමත් අසාධාරණ ලෙස රිමාන්ඩ් බන්ධනාගාරගත කර සිටින සීඅයිඩියේ හිටපු අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර සහ ශානිට විරුද්ධව බොරු සාක්කි දිය නොහැකි යයි කීම නිසා රිමාන්ඩ් බන්ධනාගාරගත කර සිටින සීඅයිඩියේ හිටපු උප පොලිස් පරීක්ෂක සුගත් මෙන්ඩිස් දෙදෙනා විසින් මහාධිකරණයට ඉදිරිපත් කරන ලද ඇප අයැදුම්පත් පසුගිය දෙසැ 9 වෙනිදා ගම්පහ මහාධිකරණ විනිසුරු නිමල් රණවීර නමැත්තා විසින් ප්‍රතික්ෂේප කර ඔවුන්ගේ සිරගත කිරීම තව දුරටත් අනුමත කෙළේය. ශ්‍රී ලංකාවේ පවතින නීතියට යුක්තියට සපුරා පිටුපාමින් නිමල් රණවීර දුන් තීන්දුව පිළිබඳ නීතිවේදී ප්‍රජාවගේ විස්මයත්, නීති ගරුක ප්‍රජාවගේ කෝපයත් නැගී තිබේ.
දෙපාර්ශවයේ කරුණු අසා 7 වෙනිදාට තීන්දුව දෙන බව කී නිමල් රණවීර 7 වෙනිදා නිවාඩු දමා සිටි අතර තීන්දුව 9 වෙනිදා ලබා දෙන බව කීවේ ය. ඒ අතර 7 වෙනිදා නීතිපතිවරයා විසින් ශානි අබේසේකර පිළිබඳ වෛද්‍ය වාර්තාවක් නඩුකාරයා රණවීර වෙත ඉදිරිපත් කර තිබිණ. එහි වෙනත් කිසිවක් සඳහන් නොවූ අතර සඳහන්ව තිබුනේ ශානි දැනට කොවිඩ්-19 වැළඳී රෝගාතුරව සිටින බවත් ඒ අතරවාරයේ දී ඔහුට හෘදයාබාධයක් ද වැළඳී තිබෙන බවයි. ශානි අබේසේකර යනු දිගු කලක් තිස්සේ හෘද රෝගියෙකු ලෙස සායනික ප්‍රතිකාර ලබා ගන්නා අයෙක් බවද වෛද්‍ය වාර්තාවේ සඳහන් විය. ඇප නඩුවක දී නීතිපතිවරයා විසින් මෙවැනි වෛද්‍ය වාර්තාවක් ඉදිරීපත් කරන්නේම වෛද්‍ය වාර්තාව සලකා බලා විනිසුරුවරයාට ඇප ලබා දීම සඳහා ය. මන්ද යත් හෘද රෝගියෙකු සුළු වරදක් සඳහා රිමාන්ඩ් බාරයේ තබා නොගන්නා නිසා ය.
කෙසේ වෙතත් 9 වෙනිදා ඇප ප්‍රතික්ෂේප කරමින් නඩුකාර නිමල් රණවීර කියා සිටියේ නීතිපතිවරයා ඉදිරිපත් කළ වෛද්‍ය වාර්තාව ද තමා 'සැලකිල්ලට' ගත් බවයි. එලෙස 'සැලකිල්ලටත්' ගෙන ඇප නොදුන්නා නම් නිමල් රණවීර කර ඇත්තේ නීතිපතිවරයා ඉදිරිපත් කළ වෛද්‍ය වාර්තාව ව්‍යාජ එකකැයි නිගමනය කිරීම විය යුතුය.
මීට පෙර ද අප වාර්තා කර ඇති පරිදි ශානි අබේසේකරට නගා තිබෙන්නේ අභූත චෝදනාවකි. එනම් දැනට ෂියාම් ඝාතනයට මරණ දණ්ඩනය හිමි වී ඇති හිටපු නි.පොලිස්පති වාස් ගුණවර්ධන සහ ඔහුගේ පුත්‍රයාගේ නඩුවේ දී සාක්කිකරුවන්ට බලපෑම් කළා කියමිනි. වාස් ගුණවර්ධනගේ නිවස පරීක්ෂා කිරීමේ දී සියාම් ඝාතනය සිදුකළ ටී 56 ගිනි අවිය ඇතුළු ගිනි අවි සොයා ගත් අතර වැටලීම සිදුකළ නිලධාරීන් ඒ පිලිබඳව දණ්ඩ නීති සංග්‍රහයේ 127 වගන්තිය යටතේ අධිකරණයට කරුණු වාර්තා කර තිබිණ. නඩු විභාගයේ දී එකී නිලධාරීන් ඒ පිලිබඳව සාක්කි දුන් අතර අභියාචන විභාග දෙකේදීම එකී සාක්කි අභියෝගයකට ලක් වූයේ ද නැත. දැන් ඇති පුදුමය නම් මහාධිකරණයේ දී ද අභියාචනාධිකරණයේ දී ද ශ්‍රේෂ්ඨාධිකරණයේ දී ද සාක්කි කරුවන්ට බලපෑමක් කළා යැයි කිසිදු සඳහනක් නොතිබියදී ගෝඨාභයගේ ආගමනයෙන් පසු සාක්කි වලට බලපෑම් කළා යයි ශානිට එරෙහිව චෝදනාවක් ගෙන ඒමයි.
අභියාචනාධිකරණ තීන්දුවකින් ද පසු යළි සාක්කි විමසීම ගැන පොලිසියට ප්‍රශ්න කළ නොහැකි බවට සමස්ථ ලෝකයම පිළිගන්නා තත්ත්වයකදී ලංකාවේ රාජපක්ෂ සීසීඩීය විසින් ශානිට අභූත චෝදනා නැගීම ග්‍රහලෝක වාර්තාවකි. අනෙක් අතට සීසීඩීය චෝදනා ගොනු කර ඇත්තේ ගිනි අවි පණත යටතේ ය. එනම් ඒ සොයා ගත් ගිනි අවි ශානි සන්තකයේ තිබූූ ඒවා කියා ය. නමුත් ඒ කියන ගිනි අවි වලින් ශානිට එරෙහිව එක ගිනි අවියක් හෝ අධිකරණයට ඉදිරිපත් කර නැත. මෙය ගිනි අවියක් නොමැතිව ගිනි අවි පණත යටතේ චෝදනා නගා මිනිහෙක් අත් අඩංගුවට ගෙන රිමාන්ඩ් කර ඇති ලෝකයේ ප්‍රථම සහ එකම නඩුව ය. එවන් බහුබූත චෝදනාවක දී චුදිතයාට ඇප ලබා නොදුන් එකම නඩුකාරයා ලෙස නිමල් රණවීර ද ගිනස් වාර්තා පොතට යනු ඇත.
මෙවැනි සියළු අනීතික දේ කරමින් රාජපක්ෂලා යලි ආගමනයෙන් පසු ශානිගෙන් පළිගන්නේ අන් යමක් නිසා නොව ඔහු නීතිය අකුරට ඉටුකරමින් රාජපක්ෂලා පිළිබඳ විමර්ශන සිදුකළ නිසා බව නොදන්නේ ඊයේ ඉපදුනු ළදරුවාත්, 9 වෙනිදා ඇප ප්‍රතික්ෂේප කළ නිමල් රණවීර නමැති නඩුකාරයාත් පමණි.
මෙවැනි පාදඩ තත්ත්වයක දී ඉහත අවනීතික තීන්දුව දුන් නිමල් රණවීර නඩු කාරයා කව්ද? ඔහු එලෙස දීන තීන්දුවක් දුන්නේ මන්ද? කියා ලංකා ඊ නිව්ස් අධිකරණ අභ්‍යන්තර තොරතුරු සේවය කරුණු කාරණා විමර්ශනය කල විට සියල්ල අනාවරණය වී තිබේ. සත්‍ය ඇඟේ මයිල් ඉස්මයිල් කරවන තරම් ය.
නිමල් රණවීර නඩුකාරයා යනු ෂියාම් ඝාතක වාස් ගුණවර්ධන සමග කන බොන, පාටි දමන වාස්ගේ දිගු කාලීන බෝතල් මිත්‍රයෙකි. ඊට සාක්කි මෙසේය.
වාස් ගුණවර්ධන නියෝජ්‍ය පොලිස්පතිවරයෙක් වීමට පෙර ජ්‍යෙෂ්ඨ පොලිස් අධිකාරීවරයෙක් ලෙස සේවය කෙළේ කුරුණෑගල ය. එකල නිමල් රණවීර ද කුරුණෑගල දිසා විනිසුරුවරයෙකි. දෙදෙනා දැන හැඳින ගන්නේ කුරුණෑගල දී ය. පසුව දෙදෙනා ගජ මිතුරන් වූහ. ඔවුහු නිතර හමු වී කා බී ප්‍රීති වන අතර විටෙක එකී ප්‍රිය සම්භාෂන වලට පවුලේ අයද එකතු කර ගන්නෝ ය. දෙදෙනාගේ මිතුරු කම පිටස්තර අයට අනාවරණය වූයේ නැත. මෙසේ කල් ගෙවෙද්දී වාස් ගුණවර්ධනට නි.පොලිස්පතිවරයෙක් ලෙස උසස් වීමක් ලැබී කුරුණෑගලින් වෙනත් පළාතකට යන්නට සිදුවන්නේ ය. එවිට වාස් ගුණවර්ධන තම කුරුණෑගල ගජ මිතුරු සමාගමට ආරධනා කර සමුගැන්මේ සාදයක් පවත්වන්නේය. ඊට නිමල් රණවීර ද සහභාගී වේ. දිසා විනිසුරු නිමල් රණවීර සහ වාස් ගුණවර්ධන අතර මිත්‍රත්වය පිටස්තර අය දැන ගන්නේ එදින ය. දෙදෙනාගේ මිත්‍රත්වයේ තරම කෙතරම් වී ද යත්
වාස්ගේ සමුගැන්ම වෙනුවෙන් නිමල් රණවීර ද සාදයක් දමන්නේ ය. ඊට වාස් ගුණවර්ධන සහ පිරිවරින් සහභාගී විය. පිටස්තරයන් දෙදෙනාගේ මිත්‍රත්වයේ තරම සහතික කර ගන්නේ එදින ය. (ඉහත සාද දෙකටම සහභාගී වූ පොලිස් නිලධාරීන් ලංකාවේ තවමත් ජීවත් වෙති; සාක්කි සහිත ය.)
වාස් ගුණවර්ධන නිදහස් කර ගැනීමට සහ ශානි අබේසේකර හිර කිරීමට ගෙතූ නඩුවක ශානි ඇප ඉල්ලන්නේ එවැනි තක්කඩි විනි-සොරෙකුගෙනි. නඩුකාර නිමල් රණවීර සාධාරණ යුක්තිය පසිඳලන්නෙක් නම් ඔහු කළ යුතුව තිබුනේ ලබැඳියාවන් අතර ගැටුමක් පවතින නිසා ශානිගේ ඇප ඉල්ලීමේ නඩුව විභාග නොකර ඉවත් වීම ය. ඔහු ඒ බව සඟවා නඩුව විමසීමට විනිසුරු අසුන අරා හිඳ ගත්තේම යටි සිතේ තම මිතුරාට උදව් කිරීමේ සහ ශානිට ඇප ලබා නොදීමේ චිත්තය සහිතවම ය. නීතිපති වෛද්‍ය වාර්තාව පවා කුණු කූඩයට දැම්මේ ඒ නිසා ය.
මෙම විනිසුරා සහ වාස් ගුණවර්ධන අතර ඇති සම්බන්ධය දන්නා පොලිස් නිලධාරීන් ඒ පිලිබඳව ශානිලාගේ නීතිඥ මහත්වරුන් දැනුවත් කළා දැයි නොදනිමු. නීතිඥවරුන් ඒ බව දැන සිටියා නම් නිමල් රණවීර මෙම නඩුව විභාග කරනවාට මුලදීම විරුද්ධ වීමට අවස්ථාව තිබිණ. නමුත් අවාසනාවකට එවැන්නක් සිදුවූයේ නැත.
මෙකී නිමල් රණවීර යනු කිසිසේත් විනිසුරුවරයෙකුට නොහොබිනා අයෙකි. වෙනත් රටක නම් මෙවැනි විනිසුරෙක් මේ තරම් දුර පැමිණීමට ඉඩක් නැත. අප එසේ කියන්නේ මොහු මහේස්ත්‍රාත්වරයෙකුගේ කාලයේ දීම කරන ලද අපචාර සිද්ධි පිළිබඳව වාර්තා වී ඇති නිසාය. එවැනි ප්‍රධාන සිද්ධියක් මෙසේය.
මොහුගේ පළමු පත්වීම ලැබුනේ දඹුල්ල මහේස්ත්‍රාත් ලෙස ය. එහි මහේස්ත්‍රාත් නිල නිවාසය ප්‍රතිසංස්කරණය කිරීමට ඒ වන විට සැලසුම් අනුමත වී, මුදල් වෙන් වී, කොන්ත්‍රාත්කරුවෙක් ද තෝරා තිබිණ. නමුත් මොහුට සහ බිරිඳට ඔවුන්ගේ සැලසුම් අනුව නිවාසය සකස් කිරීමට අවශ්‍ය විය. ඒ අනුව මොහු කොන්ත්‍රාත්කරුට ඒ ගැන බලපෑම් කෙළේය. නමුත් කොන්ත්‍රාත්කරුවාට සැලසුම් හිතූ හිතූ ලෙස වෙනස් කළ නොහැකි ය. මන්ද යත් ඔහු අධිකරණ අමාත්‍යාංශ සමග ගිවිසුම් අත්සන් කර ඇති ආකාරයෙක් පිට ඔහුට ක්‍රියා කළ නොහැකි නිසා ය. නමුත් නිමල් රණවීර තම නඩුකාර කම පෙන්වා දිගින් දිගටම කොන්ත්‍රාත්කරුට බලපෑම් එල්ල කෙළේය. අවසානයේ මොහු කොන්ත්‍රාත්කරුවා හිරේ දමන බවට තර්ජනය කෙළේ ය. කොන්ත්‍රාත්කරු ඒ පිළිබඳව අධිකරණ අමාත්‍යාංශයට පැමිණිලි කෙළේය. එකල අධිකරණ අමාත්‍යාංශ ලේකම් ලෙස කටයුතු කෙළේ සුහද ගම්ලත් ය. සුහද ගම්ලත් විසින් මහේස්ත්‍රාත් නිල නිවාසය ප්‍රතිසංස්කරණය කිරීම අත්හිටුවී ය. නිමල් රණවීර දඹුල්ලෙන් මාරු වී යන තුරුම නිල නිවාසය හැදුනේ නැත. නිමල් රණවීර යනු තම විනිසුරු දිවිය ආරම්භ කරද්දීම එවැනි අපචාර සිදුකළ අයෙකි.
මොහු පොළොන්නරුව මහාධිකරණ විනිසුරු ලෙස ක්‍රියා කරද්දී ද පක්ෂග්‍රාහීව නඩු විමසූ බවට ද සාක්කි තිබේ. ඉන් ප්‍රධාන නඩුවක් වන්නේ හිටපු ජනාධිපති මෛත්‍රීපාල සිරිසේනගේ මල්ලී කෙනෙක් වූ 'වැලි රාජු'ගේ මරණය පිළිබඳ නඩුවයි. වැලි රාජු මරණයට පත්වූයේ නිවසකට බලහත්කාරයෙන් ඇතුළු වී නිවැසියා මරා දමන්නට යද්දී නිවැසියා විසින් පොරොවකින් ප්‍රතිප්‍රහාර දීම නිසා ය. එය පැහැදිලිවම ආත්ම ආරක්ෂාව වෙනුවෙන් සිදුකළ සාවද්‍ය මිනීමැරුමක් නොවන මනුෂ්‍ය ඝාතනයකි. එවැනි වරදක දී කිසිසේත් වරදකරුට මරණ දණ්ඩනය හිමි නොවේ. හිමි වන්නේ වසර 10 ක පමණ සිර දඬුවමකි. නමුත් අප කතානායකයා වන නිමල් රණවීර මෛත්‍රීපාල සිරිසේන ජනාධිපතිගෙන් ලකුණු දමා ගැනීමට වැලි රාජුගේ ඝාතනය සිදුකළ නිවැසියා එල්ලුම් ගහට නියම කෙළේ ය. එය පැහැදිලිවම මොහුගේ නඩු විභාග කිරීමේ පක්ෂග්‍රාහී බවට සාක්කියකි.
නිමල් රණවීරගේ නඩුකාර කමේ දූෂන අක්‍රමිකතා අපචාර සම්බන්ධයෙන් අධිකරණ සේවා කොමිසමට පැමිණිලි ලැබී තිබේ. නමුත් එකල අගවිනිසුරු වූ අශෝක සිල්වා ඒවා යටපත් කර ඇත. ඊට හේතු වී ඇත්තේ අශෝක සිල්වාගේ මල්ලී ප්‍රියන්ත සිල්වා නිමල් රණවීරගේ බෝතල් මිත්‍රයෙකු නිසා ය. ප්‍රියන්ත සිල්වා නිමල් රණවීර ආරක්ෂා කර තිබේ.
නිමල් රණවීර නම් මේ දූෂිත විනිසොරා වර්තමානයේ රාජකාරි කරන ගම්පහ මහාධිකරණයේ මොහු ඉදිරියේ විභාග වන තවත් තීරණාත්මක නඩුවක් තිබේ. ඒ නම් රතුපස්වල දී හමුදාව වෙඩි තබා සිදුකළ ඝාතන පිළිබඳ නඩුවයි. එය විභාග කෙරෙන විනිසුරු තුන් කට්ටුවේ මොහුද සාමාජිකයෙකි. දැඩි ගෝඨා වාදියෙකු වන නිමල් රණවීර එහි දී ද වින්දිතයන්ට සාධාරණය ඉටු නොකර ගෝඨාභයට අවශ්‍ය නඩු තීන්දුව ලබා දෙනු නිසැක ය.
ලියුම්කරුගේ පෙර ලිපි එකතුව
https://www.lankaenews.com/category/54
---------------------------
by (2020-12-14 14:31:59)
Read 32376 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි