~

සුදු හාමුදුරුවන්ගේ ඝාතනය පසුපස වජිරාරාමයේ ආනන්ද රඟපෑ චරිතය කුමක්ද? ඝාතනයට බලපෑවේ සී-ප්ලේන් ව්‍යාපෘතියද? පාලම් ව්‍යාපෘතියද?

චන්ද්‍රප්‍රදීප් හෙළිකරයි

(ලංකා ඊ නිව්ස් -2020.‍දෙසැ.13, පෙ.ව.9.45) පසුගියදා ඝාතනය කරන ලද පොල්ගස්දූව ආරණ්‍ය සේනාසනයේ භාවනායෝගීව වැඩ විසූ නෙදර්ලන්තයේ ජිනවංශ හිමි හෙවත් සුදු හාමුදුරුවන්ගේ ඝාතනය පිළිබඳ මූලික මරණ පරීක්ෂණයටත් පෙර එය ඝාතනයක් නොව සිය දිවි නසා ගැනීමකැයි එකී ආරණ්‍යසේනාසනය හිමි බම්බලපිටියේ වජිරාරාමයේ නායක, ත්‍රිකුණාමලයේ ආනන්ද නම් භික්ෂුව විසින් නිවේදන නිකුත් කරමින් ඝාතනය සැඟවීමට දැඩි උත්සාහයක යෙදීම පිළිබඳ ඒ පිළිබඳ පරීක්ෂණ මෙහෙයවන කණ්ඩායමට විශාල සැකයක් පහළ වී තිබේ. ජිනවංශ හිමි ඝාතනය ගැන පරීක්ෂණ මේ වන විට කොළඹ අපරාධ පරීක්ෂණ දෙපාර්තමේන්තුව (සීඅයිඩි ය) වෙත බාර දී තිබේ.

සී ප්ලේන් ව්‍යාපෘතියකට, කොන්ක්‍රීට් පාලමකට සුදු හාමුදුරුවෝ විරුද්ධ වුනා..

වාර්තා වන අන්දමට පොල්ගස්දූව ආරණ්‍ය සේනාසනය පිහිටා ඇති රත්ගම කලපුවේ සංචාරක ව්‍යාපෘතියක් ලෙස ජලය මතු පිටට ගොඩ බෑ හැකි සී ප්ලේන් ව්‍යාපෘතියක් සඳහා විදේශික ආයෝජකයෙක් සමග හමුදාවේ පිරිසක් ද පැමිණ ආරණ්‍ය සේනාසනයේ සිටි ජිනවංශ හිමියන් සමග සාකච්ඡාවක් පවත්වා තිබේ. ඔවුන් පවසා ඇත්තේ බම්බලපිටියේ වජිරාරාමයේ සිටින ප්‍රධාන භික්ෂුව වන පෙර කී නිවේදන නිකුත් කළ ත්‍රිකුණාමලයේ ආනන්ද භික්ෂුව සී ප්ලේන් ව්‍යාපෘතිය සඳහා කැමැත්ත පළ කර තිබෙන බවයි. නමුත් ජිනවංශ හෙවත් සුදු හාමුදුරුවෝ ඊට විරුද්ධත්වය ප්‍රකාශ කර තිබේ. 

එපමණක් නොව ආරණ්‍ය සේනාසනය පිහිටා ඇති පොල්ගස්දූව සහ මැටිදූව නම් අක්කර දහතුන හමාරකින් යුත් මනරම් දූපත් ප්‍රධාන ගොඩබිමට යා කෙරෙන කොන්ක්‍රීට් පාලමක් ඉදි කිරීමට ද ඉහත කී වජිරාරාමයේ ආනන්ද භික්ෂුව සූදානම් වූ අවස්ථාවක දී ද සුදු හාමුදුරුවෝ ඊට විරුද්ධ වී තිබේ. එතුමාගේ මතය වී ඇත්තේ මෙම ස්වභාවික සෞන්දර්යයෙන් අනූන ආරණ්‍ය සේනාසනය කොන්ක්‍රීට් වනාන්තරයක් නොකළ යුතු බවයි. 

තීන්දු ගැනීමේ දී සුදු හාමුදුරුවන්ට තිබූ බලය..

අයිතිය වජිරාරාමය සතු වුවද පොල්දූව සේනාසනය අරභයා තීන්දු තීරණ ගැනීමේ දී විදේශීය සුදු හාමුදුරුවන්ට විශාල බලයක් හිමිව තිබී ඇත. එය නිකම්ම ලැබුනක් නොව ඒ සඳහා ඉතිහාසගත තත්ත්වය ද බලපා තිබේ. වර්තමානයේ කෙසේ හෝ මෙය වජිරාරාමයට අයත් වුවද මෙම ආරණ්‍ය සේනාසනය ආරම්භ කර ඇත්තේ 1911 දී 'කොන්ඩඤ්ඤ' නම්  ගාල්ලේ විසූ භික්ෂුවක් සහ ජර්මනියේ සිට මෙහි පැමිණ 'ඥානාතිලෝක' නමින් සසුන්ගතව සිටි ජර්මන් ජාතික භික්ෂුවක විසිනි. මෙකී ජර්මනියේ ඥානාතිලෝක යනු ප්‍රකට ටිබෙට් ජාතික එස්. මහින්ද හිමියන්ගේ ගෝලයෙකි. ජර්මන් ජාතික ඥානාතිලෝක සහ ලංකාවේ කොන්ඩඤ්ඤ හිමිවරුන් දෙදෙනා විසින් මෙය ආරම්භ කර ඇත්තේම ථෙරවාදය වැළඳ ගන්නා විදෙස් අයට ද මෙහි පහසුකම් සැපයීමේ මූලික අරමුණු සහිතව ය. ඊට ද හේතු තිබේ. මෙම දූපත් හිමිව තිබී ඇත්තේ ලංකාවේ මිනින්දෝරුවකු ලෙස සේවය කළ බ්‍රිතාන්‍ය ජාතික 'නෙල්' නමැත්තෙකුට වන අතර විශ්‍රාම ගැනීමෙන් පසු හේ බ්‍රිතාන්‍යය බලා ගොස් තිබේ. පෙර කී ජර්මන් ජාතික ඥානාතිලෝක හිමි බ්‍රිතාන්‍යයට ගොස් නෙල් හමුවී කරුණු පැහැදිලි කිරීමෙන් පසු නෙල්, ඥානාතිලෝක හිමියන්ට මෙම මනරම් දූපත් පූජා කර තිබේ. පොල්දූව ආරණ්‍ය සේනාසනය ආරම්භ වී ඇත්තේ එපරිද්දෙනි. ඒ අනුව අද මෙහි වැඩ වාසය කළ නෙදර්ලන්තයේ ජිනවංශ හෙවත් සුදු හාමුදුරුවන්ට මෙහි තීන්දු තීරණ ගැනීමේ දී විශාල බලයක් නිතැතින්ම හිමිව තිබේ. ඒ අනුවම සුදු හාමුදුරුවෝ ලංකාවේ සංඝයියලා මෙන් නොව සසුනට ලැදි, දහමට ලැදි, නිවැරදි තීන්දු නහයට කෙළින් ගෙන තිබේ. 

වජිරාරාමයේ ආනන්දගෙන් ප්‍රශ්න කළ යුතුයි..

වජිරාරාමයේ ආනන්ද භික්ෂුව කියන පරිදි සුදු හාමුදුරුවන්ට සිය දිවි නසා ගැනීමට කිසිදු අවශ්‍යතාවයක් තිබී නැත. කකුල් දෙකට ගලක් බැඳ වතුරට පැන සිය දිවි නසා ගන්නා පිහිනීමේ අති දක්ෂ පුද්ගලයෙක් ගැන ආන්නද භික්ෂුව තමා කියවා ඇති පන්සිය පනස් ජාතක කතා පොතේ එක ජාතක කතාවක හෝ කියවා තිබේ දැයි ප්‍රශ්න කළ යුතුය. ආනන්ද භික්ෂුව කියවා ඇත්තේ ජාතක කතා පොත නොව ග්‍රිම් සොහොයුරන්ගේ සුරංගනා කතා පොත විය හැකිය. ආනන්ද භික්ෂුව මෙම ඝාතනය වසන් කිරීමේ කුරිරු වෑයමක නිරත වන්නේ ඇයි දැයි බරපතල ලෙස පරීක්ෂා කළ යුතුය. මන්ද යත් මේ පිළිබඳ මූලික පරීක්ෂණ සිදුකළ පොලිස් නිලධාරීන් පවසන්නේ මෙය ඝාතනයක් බව බැලූ බැල්මට ම හැඟී යන බව නිසා ය. 

මෙම ලිපිය අවසන් කරන්නට යද්දී ලැබුණු තොරතුරු අනුව මේ ඝාතනය පසුපස චීන්නු ද සිටින බවට තොරතුරු හෙළිවී තිබේ. ඒ පිලිබඳ ඉදිරි ලිපියකින් වාර්තා කරමු.

ලිපිය සැකසීමේ දී තොරතුරු හෙළිකළ පොලිස් නිලධාරීන්ට සේම, සේනාසනයේ ඉතිහාසගත තොරතුරු ලබා ගත් රත්ගම, ගාමිණී මහදුර ට ද ස්තූතිය පළ කරමු. (වජිරාරාමවාසී ආනන්ද භික්ෂුවගේ සැක කටයුතු නිවේදනය මෙහි දැක්වේ)

චන්ද්‍රප්‍රදීප්

ලියුම්කරුගේ පෙර ලිපි එකතුව
https://www.lankaenews.com/category/54

සබැඳි පුවත
සුදු හාමුදුරුවන්ගේ ඝාතනයේ අභිරහස විසඳුවේ නැතිනම් රටට අහිතකර වේවි..! -හෙළ බොදු සවිය

---------------------------
by     (2020-12-13 04:25:03)

ඔබගේ කාරුණික පරිත්‍යාගයෙන් තොරව ලංකා ඊ නිව්ස් පවත්වාගෙන යා නොහැක.

Leave a Reply

  0 discussion on this news

News Categories

    අජිත් ගලප්පත්තිගේ සිනමා විචාර එකතුව

    අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි

    අධිකරණ

    අප්පු-ආමි ගේ ‌කොළම

    අඹයාගේ ඇඹුල

    ආචාර්ය අමලානන්ද ‌ගේ ලිපි

    ආණ්ඩුක්‍රම ව්‍යවස්ථාවකට මහජන යෝජනා

    ආනන්දගේ පරිවර්තන

    more

Links