(ලංකා ඊ නිව්ස් -2020.මැයි.19, ප.ව.7.40) රණවිරුවන් පීඩාවට ලක් වන ආකාරයෙන් කටයුතු කරන ජාත්‍යන්තර සංවිධාන වල සාමාජිකත්වයෙන් ශ්‍රී ලංකාව ඉවත් වෙන බව ජනාධිපති ගෝඨාභය රාජපක්ෂ අද ප්‍රකාශ කෙළේය. ඔහු මේ ප්‍රකාශය කෙළේ යුද්ධය නිමා කිරීමේ 11 වන සංවත්සරය නිමිත්තෙන් අද සවස 4.00 ට බත්තරමුල්ල රණවිරු ස්මාරකය අසල දී පැවැති ජාතික රණවිරු දින සැමරුම් උත්සවයේ දී ය. ඔහු එහිදී මෙසේ කීය.
"රණවිරුවන්ට හිමි තැන සහ ගෞරවය නැති කිරීමට ගන්නා උත්සාහයන්ට මම කිසිදු ඉඩක් ලබා දෙන්නේ නෑ. මගේ රජය යටතේ මේ රටේ වීරෝධාර රණවිරුවන්ගේ ගරුත්වය හැම විටම ආරක්ෂා කරන බව මම ඔබට සහතික වෙනවා. ඔවුන්ගේ අයිතිවාසිකම් හැම විටම සුරැකීම ජාතික වගකීමක්. ලෝකයේ බලවත් යැයි හඳුන්වන රටවල නායකයන් පවා පැහැදිලිවම තමන්ගේ රටේ රණවිරුවන්ට විරුද්ධව කිසිදු ක්‍රියාමාර්ගයක් ගැනීමට ඉඩ ලබා නොදෙන බව ප්‍රකාශ කර තිබෙන අවස්ථාවක අපි වගේ කුඩා රටක මේ තරම් කැපවීමක් කළ රණවිරුවන් අනවශ්‍ය පරිදි පීඩනයකට පත් කරන්නට මා කිසි විටෙකත් ඉඩ දෙන්නේ නෑ. ඒ අනුව අපේ රටට අසාධාරණයක් වන ආකාරයට යම් කිසි ජාත්‍යන්තර ආයතනයක් හෝ සංවිධානයක් දිගින් දිගටම කටයුතු කරනවා නම් එම ආයතන වන හෝ සංවිධාන වල සාමාජිකත්වයෙන් ශ්‍රී ලංකාව ඉවත් කර ගැනීමට මා කිසිවිටෙකත් පසුබට වන්නේ නෑ.."
මිරිසුවිල් සමූහ ඝාතනයට වරදකරු වී දඬුවම් ලබමින් සිටි හිටපු හමුදා නිලධාරියා ජනාධිපති සමාව යටතේ නිදහස් කළ ජනාධිපති ගෝඨාභය මෙම කොටස පමණක් ඉංග්‍රීසි බසින්ද ප්‍රකාශ කර සිටියේ තමා කව්දැයි ජාත්‍යන්තරයට තේරුම් ගැන්වීමට විය යුතු ය.
කොරෝනා වසංගතයට ලෝකයටම ගොදුරු වී සිටින අවස්ථාවක මෙවැනි උත්සවයක් පැවැත්වූ එකම රට ශ්‍රී ලංකාවය. මෙම උත්සවය සඳහා පෙරහුරු පෙළපාලියේ සිටි නාවික හමුදා සෙබලුන් දෙදෙනෙකුට ද කොරෝනා වෛරසය වැළඳී තිබූ බව ඊයේ වාර්තා විය. එසේ වුවද අද මෙම උත්සවයට සහභාගී වූ ජනාධිපතිවරයා මුව වැස්මක් සහ අත් වැසුම් භාවිතා කෙළේ නැති වීම විශේෂත්වයකි. මෙම උත්සවයට සහභාගීව සිටි හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන ද මුව වැසුම් භාවිතා කර තිබිණ.
යුද්ධයේ ප්‍රතිඵල ලෙස මරාගෙන මැරෙන සතුරු ප්‍රහාරයකට මුහුණ දී ඇසක් ද අහිමි කරගෙන සිටින හිටපු ජනාධිපතිනි චන්ද්‍රිකා බණ්ඩාරනායක කුමාරතුංග සහ යුද්ධයේ දී මරාගෙන මැරෙන ප්‍රහාරයකින් අනූ නවයෙන් දිවි බේරාගෙන අවසන් යුද්දයට නායකත්වය දුන් හිටපු හමුදාපති ෆීල්ඩ් මාර්ෂල් සරත් ෆොන්සේකා මෙම උත්සවයට ආරාධනා නොලැබීමත් ඔවුන්ගේ නමක් හෝ ජනාධිපතිවරයාට අමතක වීමත් ජාතික රණවිරු සැමරුමක දී රටේ නායකයාගේ ජාතික වගකීම ප්‍රශ්න කෙරෙන්නකි.
මේ අතර පසුගියදා අමාත්‍යාංශ ලේකම්වරුන් සහ වැවිලි සහ කර්මාන්ත අංශයට අයත් ආයතන ප්‍රධානීන් සමග ජනාධිපති කාර්යාලයේ පැවැති විශේෂ සාකච්ඡාවක දී ජනාධිපති ගෝඨාභය කියා සිටියේ තමන් ඉදිරියටත් ජ්‍යෙෂ්ඨ පරිපාලන සේවා නිලධාරීන් වෙනුවට හමුදාවේ නිලධාරීන් ඒ ඒ තනතුරු වලට පත් කරන බවත් තමන්ගේ ප්‍රතිපත්තියට විරුද්ධ අයෙක් සිටිනවා නම් රජයේ සේවයෙන් ඉවත්ව යන ලෙසයි.
---------------------------
by (2020-05-19 14:30:44)
Read 15120 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි