~

කොරෝනා වයිරස් විවේචනයෙන් පසු චීන නීති විශාරදයා අත්අඩංගුවට..!

Aljazeera ප්‍රවෘත්තියක පරිවර්තනයකි

(ලංකා ඊ නිව්ස් -2020.මැයි.15, පෙ.ව.10.45) චීනයට නව ආණ්ඩුක‍්‍රම ව්‍යවස්ථාවක් කෙටුම්පත් කරන ලෙස එරට ජාතික මහජන කොංග‍්‍රසයේ සාමාජිකයින්ගෙන් ඉල්ලා සිටිමින් සහ බීජිං පාලනය කොරෝනා වයිරස් ගෝලීය වසංගතය හැසිරවීම විවේචනය කරමින් ලිපියක් පළ කිරීමෙන් පසු චීනය විසින් ෂැංහයි නුවර වෙසෙන කීර්තිමත් ව්‍යවස්ථා විශාරදයකු අත් අඩංගුවට ගෙන රඳවා ගෙන තිබේ. 

South China Morning Post පුවත්පතට අනුව, ෂැං සූෂොං ඉරිදා රාත්‍රියේ පොලීසිය විසින් රඳවා ගෙන සිටි බව වාර්තා වේ. නමුත් Change China වෙබ් අඩවිය මෙහෙය වන යාෂුයේ කාවෝ කියා සිටියේ, මේ වන විට ගෞරවනීය නීතිඥයා නිදහස් කර ඇති බවයි. The China Digital Times ප්‍රවෘත්ති වෙබ් අඩවිය ෂැංගේ සමාජ මාධ්‍ය සටහනක් මෙසේ උපුටා දැක්වීය: "මගේ දැන් තත්වය ගැන හුඟක් මිතුරන් සැලකිලිමත් වන බව මා දුටුවා. ඔබලාට ගොඩක් ස්තූතියි. මා දැන් ගෙදරයි ඉන්නේ. සියල්ල හොඳින් සිදු වෙනවා. හැමෝටම සුභ රාත්‍රියක්."

ව්‍යවස්ථා ප්‍රතිසංස්කරණ, අදහස් ප්‍රකාශ කිරීමේ නිදහස මෙන්ම දේශපාලන රැඳවියන් නිදහස් කරන ලෙස ඉල්ලා සිටින ෂැංගේ ලිපිය ජනප්‍රිය පණිවුඩකරණ යෙදුමක් වන WeChat තුළ පළ වීමෙන් පසුව චීනය පුරා පුළුල් ලෙස සංසරණය විය. 

ප්‍රතිසංස්කරණ සඳහා ඔහුගේ හඬ නැගීම සිදු වූයේ ලබන සතියේ ජාතික කොන්ග්‍රස් රැස්වීම පැවැත්වීමට නියමිතව තිබිය දීය. සමාජ මාධ්‍යවල පළ කරන ලද ලිපියෙන් ෂැං කියා සිටියේ රට තුළ කොරෝනා වෛරසයේ ව්‍යාප්තිය රටේ වත්මන් ව්‍යවස්ථාවේ අඩුපාඩු විදහා දක්වන බවත් එය සංශෝධනය කළ යුත්තේ ඒ නිසා බවත්ය.

“අදහස් ප්‍රකාශ කිරීමේ නිදහස වෙනුවෙන් සටන් කිරීමට ඇති හොඳම ක්‍රමය නම්, අපට දැනටමත් කතා කිරීමේ නිදහස තිබෙන ප්‍රමාණයෙන් සෑම කෙනෙකුම කථා කිරීමයි,” යන ෂැංගේ ප්‍රකාශය South China Morning Post පුවත්පත උපුටා දක්වයි. කොරෝනා වයිරසය පිළිබඳව මුලින් අනතුරු ඇඟවීමක් කොට පසුව එම රෝගයෙන්ම මිය ගිය වුහාන් වෛද්‍යවරයා වන වෛද්‍ය ලී වෙන්ලියන්ග්ට චීන රජය “දඬුවම්” කළ ආකාරය ද ෂැං විවේචනය කළේය.

නව ජනාධිපති පත් වූ දා සිට මර්දනය..

2012 දී පක්ෂයේ ප්‍රධානියා ලෙස පත් වූ දා සිට ජනාධිපති ෂී ජින්පිං නිදහස් මාධ්‍ය සහ සිවිල් සමාජය දැඩි ලෙස මර්දනය කරමින් මාධ්‍යවේදීන්, නීතිඥයින් සහ රාජ්‍ය නොවන ක්‍රියාකාරීන් බොහෝ දෙනෙකු සිරගත කළේය.

වඩාත් මෑත දී, පසු ගිය වසරේ අග භාගයේ දී ප්‍රථම වරට වුහාන්හි මතු වූ කොරෝනා වෛරසයට රජය දක්වන ප්‍රතිචාරය විවේචනය කළ අය පසු පස රජය හඹා ගොස් තිබේ. කොරෝනා වෛරස ව්‍යාප්තිය හැසිරවීම සම්බන්ධයෙන් ෂී ජින්පිං “කවටයෙකු” ලෙස වක්‍රව හැඳින් වූ ප්‍රමුඛ කොමියුනිස්ට් පක්ෂ සාමාජිකයෙකු “විනය හා නීතිය දැඩිව උල්ලංඝනයට ලක්  කිරීමේ” සැකයක් මත අප්‍රේල් මාසයේ දී විමර්ශනයට ලක් කෙරිණ.

රෙන් ෂිකියැන්ග් අතුරුදහන්..

රෙන් ෂිකියැන්ග් යනු Huayuan Group නම් රාජ්‍ය-පාලිත දේපල වෙළඳාම් සමූහයේ හිටපු ප්‍රධානියෙකු සහ පක්ෂ සාමාජිකයෙකු වන අතර මාධ්‍ය වාරණය වැනි සංවේදී මාතෘකා ගැන කථා කිරීම සම්බන්ධයෙන් ඔහු ප්‍රසිද්ධියක් උසුලයි. රෙන්ගේ මිතුරන් පවසන්නේ රජය විවේචනය කළ ඔහුගේ ලේඛනයක් අන්තර්ජාලය හරහා ප්‍රකාශයට පත් වීමෙන් පසු මාර්තු මැද භාගයේ සිට ඔහු අතුරුදහන් වී ඇති බවයි.

චීනය උදක්ම කියා සිටින්නේ වුහාන් හි රෝගය ව්‍යාප්තිය සම්බන්ධයෙන් ඔවුන් විනිවිදභාවයෙන් කටයුතු කළ බවයි.

සමාජය දැඩි ලෙස පාලනය කිරීම..

රෝග ව්‍යාප්තිය ආරම්භ වූ දා සිට රට පුරා අවම වශයෙන් මරණ 4,633 ක් රජය විසින් නිල වශයෙන් වාර්තා කර තිබේ. චීනයේ පුද්ගලයන් 83,000 කට ආසන්න සංඛ්‍යාවක් ආසාදනය වී ඇති අතර 78,000 කට වැඩි පිරිසක් සුවය ලබා ඇතැයි කියති. 

නීති විශාරද ෂැං චෝදනා කළේ චීන රජයේ පාලන රාමුව මගින් වෛද්‍ය ක්‍ෂේත්‍රයේ මෙන්ම මාධ්‍යයෙන් ද නැගෙන ස්වාධීන හඬට බාධා ඇති කර, කොරෝනා වෛරසයේ භයානකත්වය පිළිබඳව මහජනතාවට වඩ වඩාත් තොරතුරු ලබා දීම වළක්වා ඇති බවයි. 

-මැයි 13 දින පළ වූ, China legal scholar briefly detained after coronavirus criticism නම් Aljazeera ප්‍රවෘත්තිය සිංහලට නැගුවේ,

-ආනන්ද

---------------------------
by     (2020-05-15 05:27:14)

ඔබගේ කාරුණික පරිත්‍යාගයෙන් තොරව ලංකා ඊ නිව්ස් පවත්වාගෙන යා නොහැක.

Leave a Reply

  0 discussion on this news

News Categories

    අජිත් ගලප්පත්තිගේ සිනමා විචාර එකතුව

    අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි

    අධිකරණ

    අප්පු-ආමි ගේ ‌කොළම

    අඹයාගේ ඇඹුල

    ආචාර්ය අමලානන්ද ‌ගේ ලිපි

    ආණ්ඩුක්‍රම ව්‍යවස්ථාවකට මහජන යෝජනා

    ආනන්දගේ පරිවර්තන

    more

Links