සුන්දරා ලියයි
(ලංකා ඊ නිව්ස් -2020.මැයි.07, ප.ව.6.40) වත්මන් ආණ්ඩුවේම ඇමතිවරයකු විසින් ආර්ථික ඝාතකයා ලෙස හැදින්වුණු ජනපති ලේකම් පුංචි බණ්ඩා ජයසුන්දර විසින් රටේ මූල්‍ය තත්වය අයහපත් බව කියමින් තම මැයි මස වැටුප පූජා කරමින් සියළුම රාජ්‍ය සේවකයන්ගේ මැයි මාසේ වැටුප ආණ්ඩුවට පරිත්‍යාග කරන්න යැයි ඉල්ලීමක් කර ඇත. වෙනත් රටවල ජනතාවට ඒ රටවල රජයන් විසින් මූල්‍ය ආධාර ලබා දෙද්දී ලංකාවේ විරුවන් වැඩ්ඩන් යයි කියා ගන්නා රාජපක්ෂලාගේ පාලනය විසින් රාජ්‍ය සේවකයාගේ පඩි පැකට්ටුවටත් වැඩේ දීමට සූදානම් වේ.
කොරොනා වසංගතය හේතුවෙන් සෞඛ්‍යාරක්ෂිත බව පවත්වාගෙන යාමට ජනතාව ක්‍රියා කිරීම නිසා වැඩි වූ ජල පරිභෝජනය ගැන නොතකා, වංචනික ලෙස විශාල ජලබිලක් ජනතාව මත පැටවීම ගැනද මීට ඉහත මේ ලියුම්කරු ලංකා ඊ නිව්ස් වෙත ලිපියක් සැපයුවේ ය.
ශ්‍රී ලංකා ආර්ථිකය බරපතල අගාධයකට රැගෙන යමින් සිටින රාජපක්ෂ පාලනය විසින් රජයේ සේවක වැටුප කප්පාදු කිරීමට සූදානම් වන බව ජනාධිපති ලේකම්ගේ ලිපියෙන් දෙන සංඥාවයි.
වසංගතය හේතුවෙන් ජනතාව පීඩාවට පත් වන්නේ රාජ්‍ය නිලධාරීන් ගේ අකාර්යක්ෂමතාව නිසා පමනක් නොව රටේ පාලකයන් ගේ නොහැකියාව නිසා ය. සැබෑ අසරණයන්ට රුපියල් පන්දහසේ දීමනාව නොලැබීම, කුඹුරු ගොවිතැන ට අවශ්‍ය පොහොර නිසි කලට සැපයීමට අසමත්වීම, මෙන්ම වසංගතය නිසාම ජනිත වී ඇති ජනතා ගැටලු නොසලකා හැරීම ද සිදුවෙමින් පවතී.
රාජ්‍ය නිලධාරීන් නිවසේ සිට වැඩ කිරීම පිලිබඳව රජය ප්‍රකාශයට පත්කළ ද, ජනතාවගෙන් එන විද්‍යුත් තැපැල් ලිපියකටවත් පිලිතුරු දී ගත නොහැකි අසමත් රාජ්‍ය සේවය නිවසේ සිට වැඩකිරීම යනු හිතලුවක් ම පමණි. ආයතන ප්‍රධානීන් ගේ අභිමතය පරිදි තැලෙන යකඩය තලමින් එක් කණ්ඩායමක් පමනක් සේවයට කැඳවද්දී, ආයතන ප්‍රධානීන්ගේ හිත් දිනූ අයට නිවෙස් වලට වී නිවාඩු පිට ආරක්ෂිතව ගත කිරීමට සලසා දී තිබේ. ආයතන ප්‍රධානීන්ට ඒ බලය පවරා ඇත්තේ ආණ්ඩුවම ය.
මේ තත්වය තුල වැඩ කළ හා නොකළ සියලු දෙනාගේ මැයි මස මාසික වැටුප කප්පාදු කරමින් රාජපක්ෂලා ගේ සිත් දිනාගැනීමට ආයතන ප්‍රධානීන් ද වැඩ අරඹා ඇත.
මෙහි ඇති බරපතල ඛෙදවාචකය නම් ජලය, විදුලිය ඇතුළු අත්‍යාවශ්‍ය සේවා වෙනුවෙන් තම පුද්ගලික ප්‍රවාහන ක්‍රම භාවිතාකරමින්, පුද්ගලික වියදමින් ආරක්ෂක උපකරණ සහ ද්‍රව්‍ය සපයා ගනිමින් දිවා රෑ නොබලා රාජකාරි කළ රාජ්‍ය සේවකයාගේ පවා මැයි මස වැටුප කප්පාදු කිරීම ය.
රටේ මූල්‍ය තත්ත්වය අවදානම් කියමින් රටේ සාමාන්‍ය ජනතාව පීඩාවට පත් කරන ආණ්ඩුව රාජපක්ෂ නෑ පරපුරේ සහ දේශපාලන වහලුන්ගේ පවුල් සුඛෝපභෝගී ලෙස නඩත්තු කිරීම සඳහා රජයේ බදු ආදායම සම්පූර්ණයෙන් වාගේ යොදාගනු ලබයි. ලෝක බොරතෙල් මිල විශාල ලෙස අඩු වුවද රටේ ඉන්ධන මිල ශතයකින් අඩු නොකළ ආණ්ඩුව සොච්චම් සහනයක් හෝ ජනතාවට නොදීම තම ප්‍රතිපත්තිය කරගෙන ඇත.
වරායේ හිර වී පැවති කල් ඉකුත් වීමට ආසන්න සැමන් තොගයක් සහ පරිප්පු තොගයක් විකුණා දැමීමට කළ නූල් සූත්තරය පරිදි ජනපති ජාතිය අමතා සැමන් සහ පරිප්පු මිල අඩු කෙළේය. නමුත් තොග අවසන් වන විට ජාතිය අමතන්නේ නැතිවම මිල නැවත වැඩි කෙළේ විලි ලැජ්ජාවක් නැතිවය.
අධිවේගී මාර්ග ව්‍යාපෘති සඳහා කිසිදු විනිවිද භාවයකින් තොරව කොරොනා අස්සේ රහසිගත ගිවිසුම් අත්සන් කර මුදල් ගෙවා ඇත. රාජ්‍ය මූල්‍ය පාලනයේ ප්‍රධාන වගකීම මෙන්ම සුපරීක්ෂාව භාර පාර්ලිමේන්තුව අකර්මණ්‍ය කරමින් සිදුකරන රාජ්‍ය මුදල් අවභාවිතාව හේතුවෙන් ආණ්ඩුවේ මූල්‍ය කටයුතු ගැන බරපතල සැක පහළ වී ඇත. මැයි මස රාජ්‍ය සේවක වැටුප් කප්පාදුව තුළින් පෙනී යන්නේ රාජපක්ෂලා වංචාකරන මුදල් කන්දරාව වෙනුවෙන් ජනතාවට වන්දි ගෙවීමට සිදුව ඇති බවයි.
ලියුම්කරුගේ පෙර ලිපි එකතුව
https://www.lankaenews.com/category/57
---------------------------
by (2020-05-07 13:44:06)
Read 21216 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි