(ලංකා ඊ නිව්ස් -2019.නොවැ.22, ප.ව.5.30) නීතිය අකුරට ක්‍රියාත්මක කරමින් විනය ගරුක රටක් හදනවා යැයි කී ගෝඨාභය ජනාධිපතිවීමෙන් දින 3 කට පසුව ‘ලංකාවේ ෂර්ලොක් හෝම්ස්’ නමින් පරසිදු එතෙක් මෙතෙක් ශ්‍රී ලංකාව බිහිකළ දක්ෂතම අපරාධ පරීක්ෂකයා, ජ්‍යෙෂ්ඨ පොලිස් අධිකාරී ශානි අබේසේකර අපරාධ පරීක්ෂණ දෙපාර්තමේන්තුවේ අධ්‍යක්ෂ ධූරයෙන් ඉවත් කර ගාල්ල නියෝජ්‍ය පොලිස්පතිගේ පුද්ගලික සහකාර ලෙස පත් කර තිබේ. ස්වාධීන යැයි කියා ගන්නා ජාතික පොලිස් කොමිෂන් සභාව ඊයේ (21) මෙය තීරණය කළ අතර කොමිෂන් සභාව ගත් එම තීරණයට ඊයේ සවස්වරුවේම පොලිස් කොමිෂන් සභාවේ ලේකම් අත්සන් තැබූ අතර එය ඊයේ පස්වරුවේම පොලිස් මූලස්ථානයට ද යොමු කෙළේය. ශානි මාරු කිරීමට තිබූ හදිසියේ තරම එයින්ම තේරුම් ගත හැකිය.
අබේසේකර ඉවත් කිරීමෙන් ඇතිවූ පුරප්පාඩුවට ජ්‍යෙෂ්ඨ පොලිස් අධිකාරී ඩබ්ලිව් තිලකරත්න පත් කර තිබේ. ශානි අබේසේකර අපරාධ පරීක්ෂණ දෙපාර්තමේන්තුවේ අධ්‍යක්ෂ ලෙස පත් කිරීමට පොලිස් කොමිෂන් සභාව තීරණය කරනු ලැබ ඔහු එම තනතුරට පත් කරනු ලැබුවේ 2017 සැප්තැම්බර් 7 වැනිදාය.
රෝයල් පාර්ක් ඝාතනය, අඟුලාන ද්විත්ව මිනී මැරුම, උඩතලවින්න ඝාතනය, මොහොමඩ් සියාම් ඝාතනය, කෝටි දෙකේ මංකොල්ලය, ටවුන්හෝල් බෝම්බය ඇතුළු සුප්‍රසිද්ධ පරීක්ෂණ රැසක් මෙහෙයවූ ජ්‍යෙෂ්ඨ පොලිස් අධිකාරී ශානි අබේසේකර මහතාගේ අති දක්ෂ විමර්ශනවල ප්‍රතිඵලයක් ලෙස නියෝජ්‍ය පොලිස්පතිවරයකුට පවා මරණ දඬුවම හිමි වීමෙන් ඔහුගේ අපක්ෂපාතීත්වය මොනවට ප්‍රදර්ශනය කර ඇත.
මාධ්‍යවේදී ප්‍රගීත් එක්නැලිගොඩ පැහැර ගැනීම, සන්ඩේලීඩර් කර්තෘ ලසන්ත වික්‍රමතුංග ඝාතනය, මාධ්‍යවේදී කීත් නොයාර්ට සහ රිවිර හිටපු කර්තෘ උපාලි තෙන්නකෝන්ට පහර දීම මෙන්ම රතුපස්වල නිරායුධ සිවිල් වැසියන්ට වෙඩි තබා තිදෙනකු ඝාතනය කිරීම ඇතුළු රාජපක්ෂ යුගයේ අපරාධ රැසක විමර්ශන මේ වන විට ඔහුගේ අධීක්ෂණය යටතේ අපරාධ පරීක්ෂණ දෙපාර්තමේන්තුවෙන් විමර්ශනය කරමින් තිබිණ.
රතුපස්වල අපරාධයට සහ ප්‍රගීත් පැහැර ගැනීමට පමණක් යහපාලන ආණ්ඩුවේ අවසාන තත්පරයේ දී මහාධිකරණයේ අධිචෝදනා ගොනු කර තිබේ.
පසුගිය කාලේ දැඩි ආන්දෝලනයක් ඇති කළ රගර් ක්‍රීඩක වසීම් තාජුදීන් ඝාතනය, බැඳුම්කර ගනුදෙනුව, විද්‍යා දැරියගේ ප්‍රධාන ඝාතකයාට රැකවරණය ලබා දීම වැනි තවත් විමර්ශන රැසක් ශානි අබේසේකරගේ අධීක්ෂණයෙන් සිදු කරමින් තිබිණ. මෑතකදී සිදුවූ පාස්කු ඉරිදා ප්‍රහාරය සම්බන්ධයෙන් විමර්ශන සිදු කරන්නේද ශානි අබේසේකර යටතේය.
රාජපක්ෂලාගේ ආගමනයත් සමග මෙම හදිසි ස්ථාන මාරුව සිදු කරනු ලැබුවේ ඉහත කී අපරාධ පිළිබඳ විමර්ශන අවුල් කිරීමට සහ යට ගසා දැමීමට බව රාජපක්ෂලා ගැන දන්නා කිසිවෙකුට සැකයක් තිබිය නොහැකිය. රාජපක්ෂ පාලනය වැනි වසර 10 ක් ඇර බැලූ මල්ලක තව ඔබා බලන්නට දෙයක් නැත.
ශානි අබේසේකර ඉවත් කිරීමෙන් අනතුරුව අපරාධකරුවන්ට හිසරදයක්ව සිටින අපරාධ පරීක්ෂණ දෙපාර්තමේන්තුවේ ස්ථානාධිපති නිශාන්ත සිල්වා, තිසේරා වැනි නිලධාරීන්ට ද බය ගෝතයන්ගේ ඇඟිල්ල දිගුව තිබේ. නිශාන්ත සිල්වා ඉවත් කිරීමට සිරිසේන ද මහත් වෙහෙසක් ගත් නමුත් ඒ අවස්ථාවේ දී පොලිස් කොමිසම ස්වාධීනව තීන්දු ගත්තේ ය. නමුත් රාජපක්ෂලාගේ ආගමනයත් සමග කොමිසමේ ස්වාධීනත්වය ද බලුගුදයට වැටී තිබෙන බව ශානිට කළ වැඩෙන් පැහැදිලිය. ශානි වැනි අති දක්ෂ ස්වාධීන අපරාධ පරීක්ෂකයෙකු ඩීඅයිජී කෙනෙකුගේ පියන් කෙනෙකු බවට පත්කිරීම සහගහන අපරාධයකි.
තමන්ම වැටුප් ගෙවූ උන් ලවා බෝම්බ පුපුරුවා, ජාතිවාදය ආගම්වාදය අවුස්සා, බයි ජනතාව ජාති ආගම් උම්මතක්කයන් බවට පත් කර, බලය ලබා ගැනීමට රාජපක්ෂලාට අවශ්‍ය වූයේ තමන් සිදුකළ අපරාධ පිළිබඳ විමර්ශන වහාම වළක්වා ගැනීමට බව ශානි අබේසේකරට සිදුකළ දෙයින් මනාව පැහැදිලිය. නීති ගරුක රටක් හැදීමට අවශ්‍ය නම් ශානි වැනි නීතිගරුක, කිසිවෙකුට පක්ෂපාතී නැති, අතිදක්ෂ පොලිස් නිලධාරියෙකුට මෙවැනි දෙයක් කරන්නේ නැත. මේ බව නීති ගරුක ජනතාවට කවදා හෝ තේරුම් යනු ඇත.
---------------------------
by (2019-11-22 12:07:25)
Read 47496 Times
Leave a Reply
0 discussion on this news
අජිත් ගලප්පත්තිගේ සිනමා විචාර එකතුව
අතීතයෙන් පාඩමක් - විශේෂඥ වෛද්‍ය අජිත් අමරසිංහ ලිපි